Yumi Planem Mo Yumi Mekem Ol Sid Blong Trutok Oli Gru
1 Taem yumi givim wetnes long ol man, yumi seremaot ol buk long olgeta mo yumi livim ol traket no ol pepa blong singaot olgeta oli kam long wan spesel miting. Ale, i olsem we yumi stap sakem ol sid blong Kingdom long ol man. Jisas i tokbaot wok ya we yumi stap mekem tede, nao hem i yusum pija tok blong wan man blong planem sid. (Luk 8:5–8) Yumi wanwan i wantem sakem plante moa sid olsem, yes, yumi tajem hat blong ol man wetem trutok blong Kingdom. ?Olsem wanem long yu? ?Yu tu yu gat tingting blong mekem olsem?
2 Olsem we Kingdom Wok blong manis Ogis i talem, bambae yumi seremaot buk ya Laef Foreva long manis Septemba. I luk olsem we olgeta pablisa oli wantem yusum gud buk ya long wok blong prij, ale oli wok strong blong planem sam moa sid blong trutok bakegen.
3 Plante long yumi oli spenem moa taem blong prij long olgeta haos wanwan mo samting ya i gud. Long evri haos wanwan, yumi traehad blong toktok wetem wan man blong haos ya. Maet samtaem i gat nid blong yumi kambak plante taem sipos yumi wantem toktok long wan man. Long ples blong wok tu, yumi givim wetnes long ol man we i stap. Kingdom Wok i enkarajem yumi oltaem blong go toktok long ol man we oli stap long garen no long yad blong olgeta. Samting ya i tru tu long saed blong ol man we oli kam putum ol samting we yumi pem long stoa no sipos sam man oli kam fiksimap wan samting long haos, yumi save holem jans blong talem trutok long olgeta. Eklesiastis 11:6 i talem se yumi mas gohed nomo blong ‘planem ol sid blong yumi’ from we yumi no save weples bambae oli gru gud.
OL VISIT
4 Aposol Pol i talem se fastaem yumi mas planem ol sid blong trutok, be biaen yumi mas wasem ol sid ya. (1 Korin 3:6) Samting ya i stret gud wetem oda we Jisas i givim long yumi, se yumi mekem disaepol mo yumi tijim ol man. (Mat. 28:19, 20) Yumi gat responsabiliti blong go visitim bakegen ol man we oli lesin long mesej blong yumi. Yumi mas wok had blong wasem ol sid we yumi planem mo yumi mas lukaot gud long olgeta blong mekem se oli gru gud. ?Yumi save mekem wanem blong kasem mak ya?
5 Mesej blong Kingdom i wan gud nyus blong ol man we oli rili lukaot God. Kingdom blong God nomo bambae i finisim ol trabol blong ol man mo hem nomo i save givim ol samting we olgeta man oli nidim tumas tede. Sipos yu go luk wan man bakegen, yu save tekem Baebol mo soemaot long hem ol gudfala samting we Kingdom blong God bambae i mekem blong ol man. Be taem yu mekem olsem, yu mas traem faenemaot wanem samting man ya i intres long hem mo wanem samting hem i tingting long hem longtaem. Rod olsem i save givhan long yu blong yu luksave wanem blesing blong Kingdom bambae yu tokbaot long man ya blong tajem hat blong hem.—Mat. 10:7, 12, 13; 9:36.
YUMI JOEN OLTAEM LONG WOK BLONG PRIJ
6 Yumi mas jusum wan taem blong mekem ol visit mo blong traem statem ol Baebol–stadi. Fulap long yumi oli joen long wok blong prij long evri haos wanwan long Sandei. Bighaf blong ol pablisa oli luksave se yumi no mas wet tumas blong go visitim ol man bakegen, yumi mas kwik nomo blong mekem olsem. ?Yu yu folem advaes ya finis? ?Yu yu gobak sam dei nomo afta, from we man ya i intres long trutok yet? Sipos yumi gat fasin olsem long wok blong prij, bambae yumi save kasem plante gudfala frut from.