!Mekem Sua Se Yu Gobak Bakegen!
1 “!Man, wan gudfala storian ya! Mi mas rimemba blong kam visitim man ya bakegen.” ?Yu bin talem ol toktok ya finis, be nomo se biaen yu fogetem weples man ya i stap? Sipos i olsem, yu save se wan rod nomo blong mekem sua se yu gobak, hemia blong raetem daon nem blong man ya mo ples we hem i stap long hem.
2 Raetem Daon Evri Samting: Taem yu jes storian nomo wetem wan man we i intres, tekem smol taem blong raetem daon olgeta stret save long saed blong man ya we yu toktok wetem hem. Makem daon nem blong hem mo olsem wanem bambae yu save luksave hem. Raetem adres blong hem, be yu no mas sua long saed ya—yu mas jekem blong sua gud se wanem we yu raetem i stret. Makem daon samting we yu tokbaot, ol vas we yu ridim, mo buk we yu livim wetem hem.
3 Sipos yu livim man ya wetem wan kwestin, mo yu plan blong kambak nekis taem blong givim ansa, yu mas raetem daon kwestin ya. ?Yu yu kasem save sam samting long saed blong man ya, famle blong hem, no skul blong hem? Sipos yes, makem daon ol samting ya. Ale, nekis taem we yu gobak blong luk hem, bambae yu save tokbaot ol samting ya. Mo long rod ya, yu soem se yu intres long man ya. Biaen, raetem daon dei mo taem blong faswan visit mo taem blong nekis wan visit we bambae yu mekem long man ya. Taem yu raetem daon ol samting ya, bambae yu yu save rimemba klia mo bambae i no isi blong fogetem promes we yu mekem blong kambak.—1 Tim. 1:12.
4 Taem yu makem daon olgeta samting ya finis, putum not ya wetem ol narafala samting we yu stap yusum long wok blong prij—basket blong buk, Baebol, Reasoning buk, mo ol narafala buk—blong mekem se oltaem, not ya i stap wetem yu long wok blong prij. I gud blong yusum wan narafala pepa blong makem daon olgeta haos we i no gat man long hem, be i no sem pepa we nem blong ol visit i stap long hem. !Yes, nating se yu makem gud ol visit, be impoten samting nao se yu mas mekem sua blong gobak!
5 Tingbaot Man Ya: Taem yu stap mekem rere wok blong prij, lukluk bak long ol samting we yu makem long saed blong visit blong yu. Tingbaot wanwan man mo wanem toktok we i beswan blong yusum taem yu go luk man ya nekis taem. Tingbaot olsem wanem yu save bildimap intres blong man ya blong pulum hem i go long wan Baebol stadi. Ol gudfala plan olsem oli save givhan long yu blong kam gud moa long wok blong talemaot gud nius mo, i mekem se yu wan yu glad.—Prov. 21:5a.
6 Taswe, nekis taem we yu faenem wan man we i glad blong lesin, yu no mas tingting se i isi blong rimemba man ya we yu bin toktok wetem hem. !I moa gud, yu raetem daon, lukluk bakegen long ol samting we yu bin raetem daon, gohed blong tingbaot man ya mo mekem sua se yu gobak!