Ol Refrens Blong Kristin Wok Mo Laef—Buk Blong Miting

Ol Refrens Blong Kristin Wok Mo Laef—Buk Blong Miting

5-11 DISEMBA

OL GUDGUDFALA SAMTING LONG BAEBOL | AESEA 1-5

“Yumi Go Antap Long Hil Blong Jehova”

(Aesea 2:2, 3) Olgeta. I gat taem i stap kam, we hil ya we haos blong mi i stap long hem, bambae i kam hae moa, i winim ol narafala hil. Mo ol man blong ol narafala kantri bambae oli save wokbaot blong kam long hem. ³ Olgeta ya bambae oli kam, oli talem se, “Hae God i God blong Jekob. Yufala i kam. Yumi go antap long hil ya blong hem. Yumi go mekem wosip long haos blong hem. Hem bambae i tijim yumi long ol fasin we hem i wantem blong yumi folem, nao bambae yumi save folem ol rod we hem i jusumaot, from we oltaem, tok blong hem i stap kamaot long taon ya Jerusalem, mo oltaem, long hil ya Saeon, hem i stap tijim ol man blong hem long ol loa long hem.”

ip-1 pej 38-41 haf 6-11

Haos Blong Jehova Bambae i Kam Hae Moa

⁶ ?Profet tok blong Aesea bambae i kamtru wetaem? “I gat taem i stap kam.” Baebol ya New International Version i talem se: “Long ol las dei.” Grik haf blong Baebol i tokbaot ol samting we bambae i soemaot se yumi stap long taem ya. Hemia ol samting olsem ol faet, graon i seksek bigwan, ol strong sik, hadtaem blong kasem kakae, mo “laef long wol ya bambae i kam strong tumas.” (2 Timoti 3:1-5; Luk 21:10, 11) Taem yumi luk ol profet tok olsem oli stap kamtru, hemia i pruvum se yumi stap long ol las dei blong wol ya. Taswe, ol samting we profet Aesea i bin talemaot bambae i kamtru long taem blong yumi.

Wan Hil We i Blong Mekem Wosip

⁷ Long sot tok nomo, Aesea i mekem se yumi save pijarem wan profet tok. Hem i talem se, i gat wan bigfala hil we naesfala haos blong Jehova i stap long hem. Bigfala hil ya i hae moa long ol narafala hil we i stap raonabaot long hem. Nating se i olsem, hil ya i no mekem ol man oli fraet, be i pulum ol man blong oli wantem go long hem. Ol man blong olgeta kantri oli wantem tumas blong go antap long hil ya we haos blong Jehova i stap long hem. Fulap man oli stap wokbaot i kam long hem. I isi blong pijarem profet tok ya, be ?wanem mining blong hem?

⁸ Long taem blong Aesea, tok ya hil i joen wetem wosip. Plante taem, ol hil oli ples blong prea mo mekem wosip long ol giaman god. (Dutronome 12:2; Jeremaea 3:6) Be haos blong Jehova nao i stap antap long Hil ya Moria long Jerusalem. Tri taem long wan yia ol man Isrel we oli obei long Jehova, oli go long Jerusalem antap long hil ya Moria, blong mekem wosip long tru God. (Dutronome 16:16) Taswe, taem ol man blong olgeta kantri oli wokbaot i kam antap long ‘hil ya we haos blong Jehova i stap long hem,’ hemia i wan pija blong ol man we oli stap joen long tru wosip.

⁹ I tru, tede, ol man blong God oli no joen wanples long wan prapa hil we i gat haos prea long hem. Long yia 70, ol ami blong Rom oli spolem haos blong God long Jerusalem. Aposol Pol i talem klia se haos blong God long Jerusalem mo haos tapolen blong bifo, tufala i pijatok nomo. Tufala i pija blong wan samting we i bigwan moa, hemia “prapa Haos Tapolen ya we Hae God nomo i stanemap long heven.” (Hibrus 8:2) Haos tapolen ya, hem i plan we Jehova i stanemap tru long sakrefaes blong Jisas Kraes, blong yumi save wosipim hem. (Hibrus 9:2-10, 23) From samting ya, ‘hil ya we haos blong Jehova i stap long hem’ long Aesea 2:2, hem i minim tru wosip blong Jehova long taem blong yumi. Mo olgeta we oli mekem tru wosip ya oli no joen long wan prapa ples, be oli joen gud blong mekem wosip.

Tru Wosip i Kam Antap

¹⁰ Aesea i talem se ‘hil ya we haos blong Jehova i stap long hem,’ we i minim tru wosip, “bambae i kam hae moa,” mo bambae “i winim ol narafala hil.” Long taem blong King Deved, bokis blong kontrak i stap long hil ya Sinae long Jerusalem. Bokis ya i stap long ples ya go kasem taem we oli finisim haos blong God long hil ya Moria. (2 Samuel 5:7; 6:14-19; 2 Kronikel 3:1; 5:1-10) Taswe long taem blong Aesea, ol man oli leftemap bokis ya i go antap finis, mo oli putum insaed long haos blong God. Hil ya we haos blong God i stap long hem, hem i hae moa long ol narafala hil, we ol man oli stap yusum blong mekem giaman wosip.

¹¹ Blong talem stret, oltaem wosip blong Jehova i hae moa long ol narafala jos we oli stap wosipim ol giaman god. Be tede, Jehova i mekem tru wosip i kam antap moa, i hae moa bitim ol giaman wosip, yes, i bitim “ol narafala hil.” ?Olsem wanem samting ya i hapen? Hemia from bigfala wok ya blong hivimap ol man we oli wantem mekem wosip long hem, long ‘fasin ya we spirit blong God i givhan long olgeta mo long fasin we oli savegud se hem i tru God.’—Jon 4:23.

ip-1 pej 44-45 haf 20-21

Haos Blong Jehova i Go Antap

²⁰ Jehova i no letem ol man blong hem oli stap olsem ol sipsip we oli lus. Hem i yusum Baebol, ol buk mo ol magasin, blong tijim ol “loa blong hem” mo “tok blong hem” long olgeta. Save we oli lanem i halpem olgeta blong oli “save folem ol rod we hem i jusumaot.” Olgeta oli glad tumas long ol save we oli kasem, nao oli stap tokbaot ol save ya long olgeta. Oli joen wanples long ol asembli, ol Haos Kingdom, mo long haos blong olgeta, blong lesin mo lanem ol samting we Jehova i wantem. (Dutronome 31:12, 13) Oli folem eksampol blong ol fas Kristin, we oli joen wanples blong leftemap tingting blong olgeta, mo blong givgivhan long olgeta blong oli ‘strong blong lavem olgeta mo mekem ol gudfala fasin.’—Hibrus 10:24, 25.

²¹ Oli singaotem ol narafala blong oli “go antap” long hil ya blong wosipim Jehova God. Hemia nao samting we Jisas i talem long ol disaepol blong hem blong mekem, bifo we hem i go antap long heven. Hem i talem se: ‘Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit. Mo yufala i mas tijim olgeta blong oli folem olgeta tok ya we mi mi givim finis long yufala.’ (Matiu 28:19, 20) Ol Witnes blong hem oli obei long advaes ya, nao Jehova i givhan long olgeta blong oli go long olgeta ples long wol, blong tijim mo pulum ol man oli kam disaepol, mo blong baptaesem olgeta.

(Aesea 2:4) Mo profet i gohed, i talemaot we Hae God i talem se, “Mi bambae mi jajem ol trabol blong ol naranarafala kantri, mo bambae mi stretem ol rao blong ol man blong plante ples. Long taem ya, ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.”

ip-1 pej 46-47 haf 24-25

Haos Blong Jehova i Go Antap

²⁴ Ol neson blong wol oli no save mekem samting ya. Oli no naf blong mekem. Be profet tok blong Aesea i kamtru long sam man blong olgeta kantri, we oli joen long tru wosip. Jehova i “stretem ol rao” blong olgeta. Hem i tijim olgeta blong oli gat pis. Taswe, nating se ol man long wol ya oli seraot mo oli raorao, be ol man we oli joen long tru wosip, oli hamarem “ol naef blong faet blong olgeta . . . oli kam aean blong digim graon.” ?Oli mekem samting ya olsem wanem?

²⁵ Oli no joen long ol faet long wol. Bifo we Jisas i ded, ol man oli kam wetem ol tul blong faet blong arestem hem. Nao Pita i tekemaot naef blong faet blong hem blong protektem Masta blong hem, be Jisas i talem long hem se : “Yu putumbak naef blong yu long paos blong hem. Man we i stap tekem naef blong faet, hem bambae i ded long naef blong faet.” (Matiu 26:52) Stat long taem ya, oli folem eksampol blong Jisas, nao oli no moa tekem naef blong faet blong go kilim narafala man mo oli no mekem eni samting blong sapotem ol faet. Hemia i olsem we oli hamarem naef blong olgeta i kam aean blong digim graon. ‘Oltaem oli traehad blong joen gud wetem ol narafala man, blong oli stap gud, oli gat pis.’—Hibrus 12:14.

Traem Faenem Ol Gudfala Samting Ya

(Aesea 1:18) Olgeta. I gud yufala i kam, yumi stretem bisnes ya naoia. Nating we ol sin blong yufala i mekem yufala i doti gud, be bambae mi mekem we yufala i klin we i klin. Naoia, yufala i doti we i doti, be bambae yufala i kam klin olgeta.

it-2 pej 761 haf 3

Fren Gud Bakegen

Rod blong fren gud bakegen. Man i brekem loa blong God, taswe, hem nao i mas kam long God blong tufala i save fren gud bakegen. (Sam 51:1-4) God i hae moa long man. Samting we hem i talem se i stret, i no save jenis. (Aes 55:6-11; Mal 3:6; skelem wetem Jem 1:17.) I no man we i jusum samting we hem i mas mekem blong fren gud wetem God, be God nao i talem. (Skelem wetem Job 40:1, 2, 6-8; Aes 40:13, 14.) Plante Baebol oli tanem Aesea 1:18 se: “Hemia tok blong Hae God se, Olgeta, yufala i kam, yumi tokbaot bisnes ya” (KJ; AT; JP; RS). Be i moa gud blong tanem vas ya olsem, se: “Olgeta. Yufala i kam, yumi stretem bisnes ya [“yumi stretem rao ya,” Ro]. Mi mi Jehova mo hemia tok blong mi.” Taswe man nao i gat fol be i no God.—Skelem wetem Esi 18:25, 29-32.

12-18 DISEMBA

OL GUDGUDFALA SAMTING LONG BAEBOL | AESEA 6-10

“Mesaea i Mekem Profet Tok i Kamtru”

(Aesea 9:1, 2) Bifo, Hae God i mekem we ol laen blong Sebulun, mo blong ol laen blong Naftali oli kasem bigfala sem. Nem blong ples blong olgeta i kam nogud olgeta. Be i gat taem i stap kam we bambae hem i leftemap nem blong ol ples ya bakegen, i stat long Mediterenian Si, i go kasem ol ples ya long narasaed Jodan Reva i go, mo i kavremap tu ol ples olbaot long Galili, we ol man blong ol narafala kantri oli stap long hem. ² . . . Hae God. Mifala i man blong yu. Fastaem, mifala i stap wokbaot long tudak, be naoia, mifala i luk wan bigfala laet. Bifo, mifala i stap long tudak we i blong ded nomo, be naoia, laet i saenaot, i kasem mifala.

ip-1 pej 124-126 haf 13-17

Promes Ya Se Wan Pikinini Blong King, i Stamba Blong Pis

“Nem Blong Ples Blong Olgeta i Kam Nogud Olgeta”

¹³ Aesea i tokbaot wan bigfala trabol we i kasem ol man we oli kamaot long ol laen blong Ebraham. Baebol i talem se : “Bifo, Hae God i mekem we ol laen blong Sebulun, mo blong ol laen blong Naftali oli kasem bigfala sem. Nem blong ples blong olgeta i kam nogud olgeta. Be i gat taem i stap kam we bambae hem i leftemap nem blong ol ples ya bakegen, i stat long Mediterenian Si, i go kasem ol ples ya long narasaed Jodan Reva i go, mo i kavremap tu ol ples olbaot long Galili, we ol man blong ol narafala kantri oli stap long hem.” (Aesea 9:1) Galili i wan distrik long not blong Isrel. Profet Aesea i tokbaot ol ples we ol laen blong Sebulun mo ol laen blong Naftali oli stap long hem, mo i tokbaot rod we i stat long bigfala Lagun blong Galili i go kasem Mediterenian Si. Long taem blong Aesea, ol man oli singaot ples ya se ‘Galili we i ples blong ol man we oli no laen blong Isrel,’ from we ol man blong ol narafala kantri oli stap olbaot long ol ples ya. ?Olsem wanem nem blong ol ples ya i kam nogud olgeta? Ol man Asiria oli winim ol ples ya, nao oli tekem ol man Isrel oli go kalabus mo oli putum ol hiten man oli kam stap long ol ples ya. Olgeta ya oli no kamaot long laen blong Ebraham. !From samting ya, ol ten laen blong Isrel i lus!—2 King 17:5, 6, 18, 23, 24.

¹⁴ Ol man Juda tu oli harem nogud from we ol man Asiria oli stap mekem i strong tumas long olgeta. ?Olsem wanem? ?Juda tu bambae i “kasem bigfala sem,” olsem Sebulun mo Naftali we tufala i pija blong ol ten laen blong Isrel? Nogat. “I gat taem i stap kam,” we Jehova bambae i blesem ol man long kingdom blong Juda long saot, mo ol ples we bifo ol ten laen blong Isrel long not oli rul long olgeta. ?Samting ya bambae i hapen olsem wanem?

¹⁵ Matiu we i wan aposol blong Jisas i ansa long kwestin ya long buk we tabu spirit i pulum hem blong raetem, blong tokbaot ol wok we Jisas i mekem. Matiu i tokbaot taem ya we Jisas i stat blong prij, i se: “Be [Jisas] i no moa stap long Nasaret, hem i aot, i godaon long Kapaneam, wan taon klosap long bigfala lugun blong Galili, nao i stap long ples ya long distrik blong laen blong Sebulun mo laen blong Naftali bifo. Samting ya i kamaot olsem blong mekem tok ya i kamtru we Profet Aesea i bin talemaot bifo, we i talem se, ‘Graon blong laen blong Sebulun mo graon blong laen blong Naftali i stap long narasaed Jodan Reva i godaon long solwota. Hemia distrik ya Galili we i ples blong ol man we oli no laen blong Isrel. Ol man blong ples ya oli stap long tudak be oli luk wan bigfala laet. Olgeta oli stap oltaem long tudak we i blong ded nomo, be bigfala laet i saenaot i kasem olgeta.’”—Matiu 4:13-16.

¹⁶ Yes, “taem [we] i stap kam” we Aesea i tokbaot, hemia taem ya we Jisas i stap prij long wol. Jisas i wokbaot moa long ples ya Galili. Long ples ya nao, hem i stat blong prij mo i talemaot se: ‘Kingdom blong God i kam klosap finis.’ (Matiu 4:17) Long Galili, hem i talem bigfala toktok blong hem antap long hil, hem i jusum ol aposol blong hem, hem i mekem fas merikel, mo afta we hem i laef bakegen, hem i kamtru long bitim 500 man blong hem. (Matiu 5:1–7:27; 28:16-20; Mak 3:13, 14; Jon 2:8-11; 1 Korin 15:6) Long rod ya, Jisas i mekem profet tok blong Aesea i kamtru. Hem i leftemap nem blong ol ples blong ‘ol laen blong Sebulun mo Naftali.’ I tru, Jisas i no prij long Galili nomo, be hem i prij long olgeta ples. Taswe, Jisas i “leftemap nem” blong olgeta kantri long Isrel mo Juda tu.

“Bigfala Laet”

¹⁷ ?Matiu i minim wanem taem hem i tokbaot “wan bigfala laet” long Galili? Hemia wan tok we profet Aesea i talem, i se : “Fastaem, mifala i stap wokbaot long tudak, be naoia, mifala i luk wan bigfala laet. Bifo, mifala i stap long tudak we i blong ded nomo, be naoia, laet i saenaot, i kasem mifala.” (Aesea 9:2) Long taem blong ol fas Kristin, ol giaman tijing blong ol hiten man oli haedem laet blong trutok. Mo tu, ol lida blong skul we oli strong blong holem ol kastom blong olgeta, oli ‘mekem tok blong God i nating nomo.’ (Matiu 15:6) Ol man we oli gat tingting daon oli harem nogud mo tingting blong olgeta i fasfas, from we ‘ol man we oli lidim olgeta oli blaen.’ (Matiu 23:2-4, 16) Taem Mesaea i kamtru, ae blong olgeta we oli gat tingting daon i open. (Jon 1:9, 12) Buk blong Aesea i talem se ol wok we Jisas i mekem taem hem i stap long wol, mo ol blesing we i kamaot from sakrefaes blong hem, oli olsem “wan bigfala laet.”—Jon 8:12.

(Aesea 9:6) !Wan pikinini boe bambae i bon long mifala! !Pikinini ya, bambae yu yu givim long mifala, mo hem bambae i rul long mifala! Ol nem blong hem, bambae oli singaot hem se, ‘Nambawan Man blong Givhan long Man’, mo ‘God we i Gat Paoa’, mo ‘Papa we bambae i Stap Oltaem’, mo ‘Pikinini ya blong King, we i Stamba blong Pis’.

w07 15/5 pej 6

Yumi Gat Hop Nating Se Wol i Fulap Long Trabol

Hop Blong Fiuja i Stanap Long Fandesen We i Strong

Jisas Kraes i talem long ol disaepol blong hem se: “Yufala i mas prea olsem: ‘Papa blong mifala long heven, plis mekem we ol man oli holem nem blong yu i stap tabu. Yu mekem Kingdom blong yu i kam. Yu mekem samting we yu wantem i kamtru long wol ya olsem long heven.’” (Matiu 6:9, 10, NW) Kingdom ya blong heven, hem i wan gavman we Jisas Kraes i lidim, mo hem i rod we God i yusum blong soemaot hae rul blong hem antap long heven mo wol.—Ol Sam 2:7-12; Daniel 7:13, 14.

Ol trabol we oli stap hapen long wol tede oli soemaot klia se yumi nidim Kingdom ya. !Yumi glad se, samting ya bambae i hapen i no longtaem! Jehova i putumap Jisas Kraes i King, i givim paoa long hem blong i leftemap hae rul mo nem blong God. (Matiu 28:18) I no longtaem, Kingdom bambae i rulum wol mo i finisim ol trabol we i mekem man i fraet mo i wari. Aesea 9:6 i tokbaot ol fasin blong Jisas we bambae oli mekem se hem i wan gudfala Rula. Taswe vas ya i talem se hem i “Nambawan Man blong Givhan long Man,” mo “Papa we bambae i Stap Oltaem,” mo “Pikinini ya blong King, we Hem i Stamba blong Pis.”

Tingbaot tok ya “Papa we bambae i Stap Oltaem.” Tok ya i soemaot se Jisas nomo i gat paoa blong rul long ol man we oli obei, mo i wantem givim laef we i no save finis long olgeta tru long ransom sakrefaes. Hemia i min se bambae oli fri long sin, we fas man ya Adam i pasem long olgeta. (Matiu 20:28; Rom 5:12; 6:23) Mo tu, Kraes bambae i yusum paoa we God i givim long hem, blong mekem plante dedman oli laef bakegen.—Jon 11:25, 26.

Taem Jisas i stap long wol, hem i pruvum se hem i “Nambawan Man blong Givhan long Man.” Hem i gat bigfala save long Tok blong God mo nambawan fasin ya blong kasemsave long man, taswe hem i save olsem wanem blong winim ol trabol blong olgeta. Taem Jisas i kam King long heven, hem i gohed blong soemaot se hem i “Nambawan Man blong Givhan long Man,” from we hem i Nambawan Man we Jehova i yusum blong givim save long ol man. Olgeta advaes blong Jisas long Baebol i waes mo i stret. Taem yumi save samting ya mo yumi bilivim, yumi save rod blong winim problem mo yumi no fraet.

Aesea 9:6 i talem tu se Jisas i ‘Pikinini ya blong King, we i Stamba blong Pis.’ Taswe i no longtaem, bambae hem i mekem se evri man i gat janis blong gat wan gudfala laef. I no moa gat man we i hae moa long narafala long saed blong posisen, mane, mo politik. ?Olsem wanem bambae hem i mekem samting ya? Bambae hem i mekem ol man oli stap long pis, aninit long rul blong Kingdom blong Mesaea.—Daniel 2:44.

Aninit long rul blong Kingdom, bambae i gat pis long fulwol. ?Olsem wanem yumi save samting ya? Aesea 11:9 i talem se: “Bambae i no moa gat man we i save mekem i nogud long narafala man, mo i no moa gat wan samting we i save spolem man. Kantri ya bambae i fulap gud long ol man [we oli obei long Kingdom] we oli savegud Hae God, olsem we solwota i fulap gud long ples blong hem.” Sloslo, olgeta man long wol bambae oli kasem stret save blong God mo obei long hem. ?Yu yu harem gud long samting ya? Sipos yes, yu no mas tektaem blong save gud Jehova.

Baebol i tokbaot ol trabol long taem blong yumi, mo gudfala fiuja we God i promes. Sipos yu stadi long Baebol, bambae yu kasem ol save blong God we i mekem bilif i strong mo i givim laef. Mifala i wantem we yu stadi Baebol wetem ol Witnes blong Jehova long ples blong yu. Hemia nao rod blong winim fraet mo blong gat wan gudfala hop long wol ya we i fulap long trabol.

(Aesea 9:7) Taem we hem i stap rul, oltaem paoa blong hem bambae i stap kam bigwan moa, mo ples we hem bambae i rul long hem, oltaem bambae i stap kwaet. Bambae hem i wan man we i kamaot biaen long King Deved, mo bambae hem i rul long ples blong king ya. Paoa blong hem bambae i stanap long ol fasin blong hem we i stret olgeta, mo long stret fasin blong hem blong jajem man, mo bambae hem i stap rul oltaem nomo, i stat naoia, gogo i no save finis. Hae God. Yu yu gat olgeta paoa, mo yu yu mekem tingting blong yu i strong finis, blong mekem olgeta samting ya i kamtru.

ip-1 pej 132 haf 28-29

Promes Blong Pikinini Ya Blong King, We i Stamba Blong Pis

²⁸ Long stret taem blong God, Kraes bambae i putum pis i stap olwe long fulwol. (Ol Wok 1:7) “Taem we hem i stap rul, oltaem paoa blong hem bambae i stap kam bigwan moa, mo ples we hem bambae i rul long hem, oltaem bambae i stap kwaet. Bambae hem i wan man we i kamaot biaen long King Deved, mo bambae hem i rul long ples blong king ya. Paoa blong hem bambae i stanap long ol fasin blong hem we i stret olgeta, mo long stret fasin blong hem blong jajem man, mo bambae hem i stap rul oltaem nomo, i stat naoia, gogo i no save finis.” (Aesea 9:7a) Taem Jisas i rul bambae hem i no mekem i strong long ol man. Bambae hem i no yusum paoa blong hem blong fosem ol man, bambae oli fri yet blong jus. Bambae ol fasin blong hem oli stret olgeta mo hem i jajem man long stret fasin. !Ol man bambae oli harem gud tumas!

²⁹ Taem yumi tingbaot mining blong nem ya we profet Aesea i givim long Jisas, yumi harem gud tumas long nekis tok blong hem, we i talem se: “Hae God. Yu yu gat olgeta paoa, mo yu yu mekem tingting blong yu i strong finis, blong mekem olgeta samting ya i kamtru.” (Aesea 9:7b) Yes, Jehova i gat strong tingting blong mekem samting ya i kamtru. Tingting blong hem i no hafhaf. Yumi save se bambae hem i mekem promes blong hem i kamtru. Taswe, eni man we i wantem stap olwe long pis, i mas mekem wok blong Jehova long olgeta hat blong hem. Olgeta man blong God oli mas “strong blong mekem ol gudfala samting,” olsem Jehova God mo Jisas.—Taetas 2:14.

Traem Faenem Ol Gudfala Samting Ya

(Isaiah 8:1-4) Nao Profet Aesea i talemaot we Hae God i talem long hem se, “Aesea. Yu go tekem wan bigfala pepa, yu raetemdaon nem ya long hem, se Mahe-salal-has-bas, we i min se ‘Tekem kwiktaem long faet, lusum bakegen kwiktaem long faet.’ ² Nao yu mas tekem tu gudfala man i kam, blong tufala i witnes long nem ya. I gud yu tekem Hae Pris ya Uria wetem Sekaraea we papa blong hem Jeberekia.” ³ Nao profet i talem se, “Nao i no longtaem, woman blong mi i gat bel, mo i bonem wan boe blong mitufala bakegen. Nao Hae God i talem long mi se, ‘Yu mas putum nem ya long hem, se Mahe-salal-has-bas. ⁴ Taem we pikinini ya i no save toktok yet blong talem se, “Mama” no “Papa”, be king blong Asiria bambae i kam mekem faet long ol man Damaskes, i tekemaot olgeta gudgudfala samting blong taon ya. Mo bambae hem i kam mekem faet tu long ol man Sameria, i tekemaot olgeta samting ya bakegen we ol man blong ples ya oli bin tekem long taem blong faet.’”

it-1 pej 1219

Aesea

Taem Aesea i mekem wok blong profet long Juda, i gat fulap rabis fasin long ples ya, antap moa long taem blong King Ahas. Ol haeman mo ol narafala man oli rebel, mo Jehova i luk se neson ya i sik long tingting mo hat blong hem. Ol lida oli “olsem ol lida blong taon ya Sodom bifo” mo ol narafala man oli “olsem ol man blong taon ya Gomora bifo.” (Aes 1:2-10) Aesea i save finis se bambae oli no lesin. Jehova i talem se bambae i gohed olsem gogo neson ya i lus, mo bambae i wan smol grup nomo i stap. “Wan man nomo i stap” long ples we fastaem i gat ten man long hem. Smol grup ya, hemia ol man blong God we oli olsem stamba blong wan bigfala tri. Yumi save se wok blong profet Aesea i leftemap tingting blong smol grup ya mo i mekem bilif blong olgeta i strong, nating se ol narafala long neson oli no wantem lesin.—Aes 6:1-13.

Aesea i talem plante profet tok long saed blong Juda. Be hem i talem sam long saed blong Isrel mo ol narafala neson tu, from we ol samting we oli hapen long ol neson ya i gat paoa long Juda. Aesea i mekem wok blong profet longtaem, i stat samwe long 778 bifo Kraes, taem King Usia i ded, mo i gohed kasem namba 14 yia blong rul blong King Hesekia (732 bifo Kraes).—Aes 36:1, 2; 37:37, 38.

Famle blong Aesea. Aesea i mared, mo Baebol i talem se woman blong hem i wan “woman profet.” (Aes 8:3, NW) Hemia i no minim nomo se hem i woman blong profet Aesea. I klia se Jehova i givim wan wok long hem tu, olsem Debora long taem blong ol Jaj, mo Hulda long taem blong King Josaea.—Ja 4:4; 2Ki 22:14.

Baebol i talem nem blong tu pikinini boe blong Aesea we Jehova i givim “olsem saen blong hem” long Isrel. (Aes 8:18) Long taem blong King Ahas, wan long tufala boe ya we nem blong hem Seajasub, i folem papa blong hem Aesea, taem Aesea i karem wan mesej i go long king. Nem ya Seajasub i minim “Wan Smol Grup Nomo Bambae i Kambak.” Nem ya i olsem wan profet tok, from we i soemaot se taem ol enemi oli winim Juda mo oli tekem ol man oli go kalabus, bambae wan smol grup nomo i kambak. (Aes 7:3; 10:20-23) Samting ya i hapen long 537 bifo Kraes, taem King Sirus blong Pesia i letem olgeta we oli kalabus blong 70 yia, oli go fri.—2Kr 36:22, 23; Esr 1:1; 2:1, 2.

Aesea i save nem blong narafala pikinini boe blong hem bifo we woman blong hem i gat bel. Oli raetemdaon nem blong boe ya mo tu man i witnes long nem ya. Oli jes talemaot nem blong hem taem i bon finis. Ol witnes oli talem se Aesea i bin talemaot wan profet tok se boe ya bambae i bon. God i talem se nem blong boe ya, hemia Mahe-salal-has-bas, we i min se, “Tekem kwiktaem long faet, lusum bakegen kwiktaem long faet.” Profet tok ya i talem se bifo we boe ya i save toktok mo talem “Papa” mo “Mama,” plan blong Siria mo ol ten laen blong Isrel blong agensem Juda, bambae i finis.—Aes 8:1-4.

Profet tok ya i soemaot se i no longtaem Juda i save harem gud. Hemia i kamtru taem Asiria i blokem King Resin blong Siria mo King Peka blong Isrel, blong tufala i no moa faet agensem Juda. Ol ami blong Asiria oli winim taon ya Damaskes, mo long 740 bifo Kraes, oli spolemgud kingdom blong Isrel. Samting we i hapen i stret long mining blong nem blong boe blong Aesea. (2Ki 16:5-9; 17:1-6) Be King Ahas i no trastem Jehova. Hem i pem king blong Asiria blong i givhan long hem blong blokem Siria mo Isrel. From samting ya, Jehova i letem Asiria i mekem bigfala trabol long Juda. Ol ami blong Asiria oli kam insaed long Juda mo oli kam kasem Jerusalem, olsem Aesea i bin talem.—Aes 7:17-20.

Plante taem, Aesea i tokbaot ol “saen” we Jehova i givim. Wan long olgeta, hem i long saed blong tufala boe blong Aesea, mo narawan, hem i long saed blong Aesea hem wan. Jehova i talem long hem se i mas wokbaot neked mo drae leg blong tri yia. Hemia wan saen blong soemaot se king blong Asiria bambae i tekem ol man Ijip mo Itiopia oli go kalabus.—Aes 20:1-6; skelem wetem Aes 7:11, 14; 19:20; 37:30; 38:7, 22; 55:13; 66:19.

Profet i Talemaot Se Bambae Oli Kalabus Mo Oli Kam Fri Bakegen. Aesea i talemaot se i no Asiria we bambae i spolem Jerusalem mo tekemaot ol king blong Juda long jea blong king, be Babilon nao bambae i mekem olsem. (Aes 39:6, 7) Taem ol ami blong Asiria oli kam fulap long Juda we ‘klosap oli kavremap evri ples,’ Aesea i talemaot gud nius long King Hesekia se ol ami ya bambae oli no kam insaed long taon ya Jerusalem. (Aes 8:7, 8) Jehova i mekem tok ya i kamtru taem hem i sanem wan enjel blong kilim i 185,000 ami blong Asiria.—2Kr 32:21.

Jehova i givim bigfala blesing long Aesea, blong i talemaot mo raetemdaon plante profet tok long saed blong taem ya we ol man blong hem bambae oli kambak blong wokem Jerusalem bakegen. I tru, Jehova i letem ol man blong hem oli go kalabus long Babilon from we oli rebel agens long hem. Be hem i jajem Babilon tu, from we oli no laekem nating ol man blong God mo oli wantem holem olgeta oli stap kalabus blong olwe. Plante profet tok blong Aesea oli talemaot jajmen blong God long Babilon, se bambae hem i stap nating nomo we neva bambae ol man oli wokemgud bakegen.—Aes 45:1, 2; jap 13, 14, 46-48.

ip-1 pej 111-112 haf 23-24

Trastem Jehova Taem yu Fesem Trabol

Ol Tok We i Kamtru

²³ Naoia Aesea i tokbaot bakegen samting we i stap hapen long taem ya. Taem ol ami blong Siria mo Isrel oli stap raon long Jerusalem, “Profet Aesea i talemaot we Hae God i talem long hem se, ‘Aesea. Yu go tekem wan bigfala pepa, yu raetemdaon nem ya long hem, se Mahe-salal-has-bas, we i min se “Tekem kwiktaem long faet, lusum bakegen kwiktaem long faet.” Nao yu mas tekem tu gudfala man i kam, blong tufala i witnes long nem ya. I gud yu tekem Hae Pris ya Uria wetem Sekaraea we papa blong hem Jeberekia.’” (Aesea 8:1, 2) Nem ya Mahe-salal-has-bas i min se “Tekem kwiktaem long faet, lusum bakegen kwiktaem long faet.” Aesea i askem long tu impoten man blong tufala i witnes long nem ya we hem i raetemdaon, nao biaen tufala i save pruvum se ol tok long pepa ya oli tru. Be i gat wan narafala saen tu blong soemaot se faswan i tru.

²⁴ Aesea i talem se: “I no longtaem, woman blong mi i gat bel, mo i bonem wan boe blong mitufala bakegen. Nao Hae God i talem long mi se, ‘Yu mas putum nem ya long hem, se Mahe-salal-has-bas. Taem we pikinini ya i no save toktok yet blong talem se, “Mama” no “Papa”, be king blong Asiria bambae i kam mekem faet long ol man Damaskes, i tekemaot olgeta gudgudfala samting blong taon ya. Mo bambae hem i kam mekem faet tu long ol man Sameria, i tekemaot olgeta samting ya bakegen we ol man blong ples ya oli bin tekem long taem blong faet.’” (Aesea 8:3, 4) Pepa we Aesea i raetem mo pikinini we i jes bon, tufala i olsem saen blong soemaot se, i no longtaem, Asiria bambae i tekemaot ol gudgudfala samting blong Siria mo Isrel, we tufala i agensem Juda. ?Samting ya bambae i hapen wetaem? Bifo we pikinini ya i save toktok blong talem “Papa” mo “Mama.” Wan profet tok olsem we i makem gud taem ya, i mas mekem ol man oli trastem Jehova moa. Be i save mekem tu se samfala oli jikim Aesea mo tufala boe blong hem. Nating se i olsem wanem, profet tok blong Aesea i kamtru.—2 King 17:1-6.

19-25 DISEMBA

OL GUDGUDFALA SAMTING LONG BAEBOL | AESEA 11-16

“Bambae Wol i Fulap Gud Long Ol Save Blong Jehova”

(Aesea 11:3-5) Oltaem nomo, king ya bambae i glad tumas blong obei long Hae God. Sipos hem i jajem man, bambae hem i no save luk long ol samting ya nomo we ol man oli save luk long ae blong olgeta, bambae hem i no save tingbaot ol samting ya nomo we ol man oli stap talem long hem. ⁴ Bambae hem i stretem bisnes blong ol man we trabol i kasem olgeta, mo bambae i mekem long fasin we i stret olgeta. Bambae hem i mekem rod blong ol puaman oli save kasem ol samting we oli gat raet blong kasem. Bambae hem i tok, nao ol man bambae oli kasem panis. Long ol strong tok ya blong hem, bambae hem i kilim ol man nogud oli ded. ⁵ Fasin blong hem blong i rul long ol man blong hem, oltaem bambae hem i stap mekem i stret nomo, mo fasin blong hem blong jajem man bambae i stap sem mak oltaem.

ip-1 pej 160-161 haf 9-11

Yumi Glad Tumas Long Rul Blong Mesaea We i Sevem Yumi

Wan Jaj We i Stret Mo i Gat Sore

⁹ Aesea i talemaot sam fasin blong Mesaea, i se: “Sipos hem i jajem man, bambae hem i no save luk long ol samting ya nomo we ol man oli save luk long ae blong olgeta, bambae hem i no save tingbaot ol samting ya nomo we ol man oli stap talem long hem.” (Aesea 11:3b) Sipos yu stanap long fored blong wan jaj long kot, ?bambae yu glad sipos jaj ya i gat ol fasin we vas ya i tokbaot? Taem Mesaea i jajem ol man, hem i no lesin long ol giaman toktok, ol trik olsem samfala oli yusum long kot, ol toktok olbaot, mo ol samting we man i save luk, olsem ol sas samting. Hem i luksave taem man i giaman, mo i no luk fes blong man nomo, be hem i save samting we i haed, hemia ol fasin mo tingting blong man. (1 Pita 3:4) Jisas i soemaot nambawan eksampol we ol brata oli save folem, taem oli mas stretem wan trabol long Kristin kongregesen.—1 Korin 6:1-4.

¹⁰ ?Ol gudfala fasin blong Mesaea oli givhan olsem wanem long hem, taem hem i jajem man? Aesea i talem se: “Bambae hem i stretem bisnes blong ol man we trabol i kasem olgeta, mo bambae i mekem long fasin we i stret olgeta. Bambae hem i mekem rod blong ol puaman oli save kasem ol samting we oli gat raet blong kasem. Bambae hem i tok, nao ol man bambae oli kasem panis. Long ol strong tok ya blong hem, bambae hem i kilim ol man nogud oli ded. Fasin blong hem blong i rul long ol man blong hem, oltaem bambae hem i stap mekem i stret nomo, mo fasin blong hem blong jajem man bambae i stap sem mak oltaem.”—Aesea 11:4, 5.

¹¹ Jisas i stretem ol man blong hem long fasin we i givhan gud long olgeta. Hemia wan gudfala eksampol blong ol elda oli folem. Be ol rabis man, hem i jajem olgeta long strong fasin. Taem God i jajem rabis wol ya, Mesaea bambae i singaot strong blong “kilim ol man,” hemia i min se bambae hem i jajem ol rabis man se oli mas ded. (Ol Sam 2:9; skelem wetem Revelesen 19:15.) Afta long taem ya, bambae ol rabis man oli no moa stap blong spolem pis long wol. (Ol Sam 37:10, 11) Jisas, we i gat stret fasin mo i stap holem gud promes blong hem, i gat paoa blong mekem tok ya i kamtru.—Ol Sam 45:3-7.

(Aesea 11:9) Long Saeon ya, tabu hil blong Hae God, bambae i no moa gat man we i save mekem i nogud long narafala man, mo i no moa gat wan samting we i save spolem man. Kantri ya bambae i fulap gud long ol man we oli savegud Hae God, olsem we solwota i fulap gud long ples blong hem.

w16.06 5 ¶9 (Hemia i stap long Bislama long pej 5, be i no long pej 8 olsem inglis)

Yumi Glad Se Jehova i Olsem Man Blong Wokem Graonpot

w13 1/6 pej 7

?Wetaem Bambae i No Moa Gat Man We i Agensem Narafala From Kala No Laen Blong Hem?

KINGDOM BLONG GOD BAMBAE I FINISIM FASIN AGENS YA

Ol tok blong Baebol i save givhan long yumi, blong yumi bos long tingting blong agensem narafala. Be i gat tu samting we i mas finis bifo we yumi save winim fasin ya fulwan. Faswan, hemia sin we yumi bon wetem. Baebol i talem klia se: “I no gat wan man nating long wol ya we i no mekem sin.” (1 King 8:46) Taswe, nating se yumi traehad, be i gat wan faet i stap gohed insaed long yumi, olsem aposol Pol i tokbaot se: “Taem mi wantem mekem ol samting we i gud, be oltaem mi stap jusumaot ol samting nomo we i nogud olgeta.” (Rom 7:21) Taswe, from we yumi sinman, samtaem yumi save gat “rabis tingting” we i pulum yumi blong agensem narafala.—Mak 7:21.

Seken samting se, Setan i save pulum yumi. Baebol i talem se hem i “man blong kilim man” mo i “stap giaman long olgeta man long wol, i lidim olgeta oli go krangke.” (Jon 8:44; Revelesen 12:9) Hemia nao from wanem plante man oli agensem narafala from kala, laen, no skul blong hem. Ol man oli no save faenem rod blong blokem ol fasin ya.

Taswe, blong finisim fulwan ol fasin agens ya, sin i mas finis mo Setan tu. Baebol i talem se, Kingdom blong God nao bambae i mekem samting ya.

Jisas Kraes i tijim ol man blong hem blong prea se: “Yu mekem Kingdom blong yu i kam. Yu mekem samting we yu wantem i kamtru long wol ya olsem long heven.” (Matiu 6:10, NW) Kingdom blong God, hemia nao rod blong finisim ol fasin blong agensem narafala from kala no laen blong hem.

Taem Kingdom blong God i kam blong rulum wol, bambae oli “fasem” Setan blong “i no moa giaman long ol man, blong pulum olgeta oli go krangke.” (Revelesen 20:2, 3) Bambae i gat “wan niufala wol,” we i minim ol man, mo bambae oli mekem “stret fasin nomo.”—2 Pita 3:13.

Olgeta man ya we oli mekem stret fasin bambae oli kam fri long sin, yes, bambae oli stret gud olgeta. (Rom 8:21) Ol man we oli obei long Kingdom blong God, bambae oli no “save mekem i nogud long narafala man.” ?From wanem? From we wol “bambae i fulap gud long ol man we oli savegud Hae God, olsem we solwota i fulap gud long ples blong hem.” (Aesea 11:9) Long taem ya, olgeta man bambae oli lanem ol rod blong Jehova mo bambae oli folem ol gudfala fasin blong hem. Hemia bambae i finisim olgeta fasin agens, “from we God i stap mekem i sem mak nomo long olgeta man.”—Rom 2:11.

²⁶ DISEMBA–1 JENUWARE

OL GUDGUDFALA SAMTING LONG BAEBOL | AESEA 17-23

“Man We i Yusum Paoa Long Fasin We i No Stret, Hem i Lusum Haenem”

(Aesea 22:15, 16) Nao Profet Aesea i talem se, “Hae God i gat olgeta paoa, mo hem i Masta blong yumi, mo hem i talem long mi blong mi go luk haeman ya Sebna, we i bos blong ol man blong wok long haos blong king. Mo hem i talem long mi blong mi go talemaot tok blong hem long Sebna se, ¹⁶ ‘!Sebna! ?Yu yu wanem man ya? ?Olsem wanem yu yu go katem wan hol long ston ya long saed blong hil, blong bambae oli berem yu long hem?’”

ip-1 pej 238 haf 16-17

Lanem Lesen Blong Mekem Gud Wok Blong Yumi

Wan Haeman We i Tingbaot Hem Wan Nomo

¹⁶ Profet i no moa tokbaot wan grup blong man, be i tokbaot wan man nomo we i no holemstrong long Jehova, i se: “Hae God i gat olgeta paoa, mo hem i Masta blong yumi, mo hem i talem long mi blong mi go luk haeman ya Sebna, we i bos blong ol man blong wok long haos blong king. Mo hem i talem long mi blong mi go talemaot tok blong hem long Sebna se, ‘!Sebna! ?Yu yu wanem man ya? ?Olsem wanem yu yu go katem wan hol long ston ya long saed blong hil, blong bambae oli berem yu long hem?’”—Aesea 22:15, 16.

¹⁷ Sebna i “bos blong ol man blong wok long haos blong king,” maet King Hesekia. Sebna i wan haeman, king nomo i hae moa long hem. From samting ya, wok blong hem i impoten. (1 Korin 4:2) Be Sebna i tingbaot hem wan nomo, i no tingbaot ol man long neson ya. Hem i katem wan hol long ston long saed blong hil blong bambae oli berem hem long hem. Be hemia fasin we oli mekem blong ol king nomo. Jehova i luk samting ya, nao hem i talem long Aesea blong i givim woning long Sebna se: “Maet yu yu wan haeman tru, be mi bambae mi pikimap yu, mi sakemaot yu olgeta. Bambae mi pikimap yu, mi sakemaot yu yu go long wan narafala kantri we i moa big olgeta, olsem we man i pikimap ston, i slingim i go longwe. Long ples ya, bambae yu yu ded klosap long ol kat blong faet ya, we fastaem yu stap flas tumas long olgeta. Yu yu man blong pulum sem nomo i kam long haos blong masta blong yu. Mi bambae mi tekemaot yu long wok ya blong yu, mo bambae mi tekemaot hae nem ya blong yu, mi mekem yu yu stap daon.” (Aesea 22:17-19) From we Sebna i tingbaot hem wan nomo, bambae oli no berem hem nating long Jerusalem. Be bambae Jehova i slingim hem olsem wan ston, i go long wan narafala kantri we i longwe. Stori ya i tijim ol man we oli gat wok blong lukaot long ol man blong God. Sipos oli yusum paoa blong olgeta long fasin we i no stret, bambae oli lusum wok ya mo Jehova bambae i sakemaot olgeta.

(Aesea 22:17-22) Maet yu yu wan haeman tru, be mi bambae mi pikimap yu, mi sakemaot yu olgeta. ¹⁸ Bambae mi pikimap yu, mi sakemaot yu yu go long wan narafala kantri we i moa big olgeta, olsem we man i pikimap ston, i slingim i go longwe. Long ples ya, bambae yu yu ded klosap long ol kat blong faet ya, we fastaem yu stap flas tumas long olgeta. Yu yu man blong pulum sem nomo i kam long haos blong masta blong yu. ¹⁹ Mi bambae mi tekemaot yu long wok ya blong yu, mo bambae mi tekemaot hae nem ya blong yu, mi mekem yu yu stap daon. ²⁰ Sebna. Long taem ya, bambae mi mi singaot man ya blong wok blong mi Eliakim, we papa blong hem Hilkia. ²¹ Nao taem hem i kam, bambae mi tekemaot kot ya blong yu wetem strap ya blong yu we tufala i soemaot we yu yu gat hae nem, nao bambae mi putum tufala long hem, mo bambae mi givim paoa long hem, blong i mekem olgeta wok ya blong yu. Nao hem bambae i kam olsem papa blong ol man Jerusalem, mo blong ol narafala man Juda tu. ²² Bambae mi mekem we hem i kam nambawan haeman blong king ya we i kamaot biaen long King Deved, mo bambae hem i wok aninit long hem. Hem nomo bambae i holem ol ki blong evri samting long wok blong hem. Ol samting we hem bambae i openem, narafala man bambae i no save satem, mo ol samting we hem bambae i satem, narafala man bambae i no save openem.

ip-1 pej 238-239 haf 17-18

Lanem Lesen Blong Mekem Gud Wok Blong Yumi

¹⁸ ?Olsem wanem Sebna bambae i lusum haenem blong hem? Jehova i talem long Aesea se: “Long taem ya, bambae mi mi singaot man ya blong wok blong mi Eliakim, we papa blong hem Hilkia. Nao taem hem i kam, bambae mi tekemaot kot ya blong yu wetem strap ya blong yu we tufala i soemaot we yu yu gat hae nem, nao bambae mi putum tufala long hem, mo bambae mi givim paoa long hem, blong i mekem olgeta wok ya blong yu. Nao hem bambae i kam olsem papa blong ol man Jerusalem, mo blong ol narafala man Juda tu. Bambae mi mekem we hem i kam nambawan haeman blong king ya we i kamaot biaen long King Deved, mo bambae hem i wok aninit long hem. Hem nomo bambae i holem ol ki blong evri samting long wok blong hem. Ol samting we hem bambae i openem, narafala man bambae i no save satem, mo ol samting we hem bambae i satem, narafala man bambae i no save openem.” (Aesea 22:20-22) Eliakim bambae i tekem ples blong Sebna, bambae i kasem klos blong Sebna mo ki blong evri samting long haos blong Deved. Baebol i yusum tok ya “ki” blong minim paoa, gavman, mo haenem. (Skelem wetem Matiu 16:19.) Long taem bifo, maet advaesa blong king we i holem ki ya, i lukaot long ol samting long haos blong king, maet hem i mekem desisen se hu nao i save wok blong king. (Skelem wetem Revelesen 3:7, 8.) Taswe, wok ya blong bos long ol man blong wok blong king, i wan impoten wok, mo king i askem plante samting long man ya. (Luk 12:48) Ating Sebna i gat plante save, be Jehova i no moa wantem hem from we hem i no mekem gud wok blong hem.

(Aesea 22:23-25) Bambae mi putum hem i stap strong long ples blong hem, olsem we huk i fas strong long wol blong haos, mo from we hem i gat hae nem, olgeta famle blong hem tu bambae oli gat hae nem. ²⁴ Be ol famle ya blong hem wetem ol laen blong hem, bambae oli kam olsem hevi samting, blong hem i karem. Bambae oli stap hang long hem, olsem we ol sospen mo ol besin oli hang long huk. ²⁵ Long taem ya, huk ya we fastaem i fas strong long wol, bambae i stap kam slak, gogo i kamaot, i foldaon. Mo taem hem i foldaon, olgeta samting we i stap hang long hem bambae oli foldaon wetem hem. Mi mi Hae God, mo hemia tok blong mi.

ip-1 pej 240-241 haf 19-20

Lanem Lesen Blong Mekem Gud Wok Blong Yumi

Tu Huk

¹⁹ Jehova i yusum wan pijatok blong soemaot se bambae hem i tekemaot paoa long Sebna mo i givim long Eliakim, i se: “Bambae mi putum hem [Eliakim] i stap strong long ples blong hem, olsem we huk i fas strong long wol blong haos, mo from we hem i gat hae nem, olgeta famle blong hem tu bambae oli gat hae nem. Be ol famle ya blong hem wetem ol laen blong hem, bambae oli kam olsem hevi samting, blong hem i karem. Bambae oli stap hang long hem, olsem we ol sospen mo ol besin oli hang long huk. Long taem ya, huk ya [Sebna] we fastaem i fas strong long wol, bambae i stap kam slak, gogo i kamaot, i foldaon. Mo taem hem i foldaon, olgeta samting we i stap hang long hem bambae oli foldaon wetem hem. Mi mi Hae God, mo hemia tok blong mi.”—Aesea 22:23-25.

²⁰ Fas huk we ol vas ya oli tokbaot, hemia Eliakim. Bambae “hem i gat haenem” long haos blong papa blong hem Hilkia. Bambae hem i no pulum sem i kam long famle blong hem, olsem Sebna. Ol samting long haos, olsem ol sospen mo ol besin, hemia i minim ol narafala man we oli wok blong king. Bambae olgeta ya oli hang long Eliakim, olsem sospen i hang long huk. (2 Timoti 2:20, 21) Nambatu huk, hemia Sebna. I luk olsem se hem i fas strong, be bambae hem i foldaon. Olgeta we oli hang long hem, bambae oli foldaon tu.

Traem Faenem Ol Gudfala Samting Ya

(Aesea 23:17, 18) Taem we ol yia ya i pas, mi bambae mi letem ol man blong taon ya oli gohed bakegen long bisnes we oli stap mekem fastaem. Nao taon ya bambae i save mekem bisnes bakegen wetem ol narafala kantri long wol, blong winim mane long olgeta. ¹⁸ Be ol mane we ol man ya bambae oli winim long ol bisnes ya we bambae oli stap mekem, bambae oli no save hivimap i stap. Ol mane ya bambae i kam tabu, i blong mi, mo olgeta we oli stap mekem wosip long mi, bambae oli yusum mane ya blong pem plante kakae wetem ol gudgudfala klos blong olgeta.

ip-1 pej 253-254 haf 22-24

Ol Man Bambae Oli Fogetem Taon Ya Taea

Aesea i gohed se: “I gat taem i stap kam, we ol man bambae oli fogetem taon ya blong yufala gogo seventi yia i pas. Taem ya i olsem laef blong wan king, we oli stap makem i stat long taem ya we hem i bon, gogo kasem we hem i ded. Mo taem we ol yia ya i finis, taon ya bambae i girap bakegen, i mekem olsem woman blong rod ya we olfala sing i tokbaot, we i talem se, ‘!O, woman blong rod! !Sore tumas long yu! !Ol man oli fogetem yu finis! Yu go tekem gita blong yu, yu wokbaot long taon. I gud yu kilim gita blong yu bakegen, mo yu sing long ol sing blong yu, blong pulum ol man oli kam, oli hivap raon long yu bakegen.’ Taem we ol yia ya i pas, mi bambae mi letem ol man blong taon ya oli gohed bakegen long bisnes we oli stap mekem fastaem. Nao taon ya bambae i save mekem bisnes bakegen wetem ol narafala kantri long wol.”—Aesea 23:15b-17.

²³ Taem Babilon i foldaon long yia 539 bifo Kraes, King Sirus blong Pesia i

stat blong rul long Fonisia. Aninit long rul blong hem we i no strong tumas, taon ya blong Taea i stat kamgud bakegen, blong mekem bisnes mo blong pulum plante ol man oli kam long hem olsem bifo. Ol man oli fogetem taon ya finis, mo oli luk hem olsem wan woman blong rod we ol man oli lego hem finis, nao i stap plei gita mo singsing blong pulum olgeta oli kambak long hem. ?Taea bambae i kam gud bakegen? Yes, Jehova bambae i mekem i samting ya. Bambae taon ya i kam wan nambawan taon, olsem profet Sekaraea i talem klosap long yia 500 bifo Kraes, se: “Ol man Taea oli bin wokem bigfala stonwol i goraon long taon blong olgeta, mo oli hivimap fulap silva mo gol long ples blong olgeta, we i plante we plante olsem doti nomo.”—Sekaraea 9:3.

‘Ol Mane Ya Bambae i Kam Tabu’

²⁴I gud yumi tingbaot profet tok ya we i talem se: “Ol mane we ol man ya bambae oli winim long ol bisnes ya we bambae oli stap mekem, bambae oli no save hivimap i stap. Ol mane ya bambae i kam tabu, i blong mi, mo olgeta we oli stap mekem wosip long mi, bambae oli yusum mane ya blong pem plante kakae wetem ol gudgudfala klos blong olgeta.” (Aesea 23:18) ?Olsem wanem ol mane blong Taea i kam tabu? Jehova i lidim bisnes ya blong i kamtru olsem hem i wantem. Oli yusum mane ya blong pem plante kakae mo ol gudgudfala klos blong ol man blong hem. Hemia i kamtru taem ol man Isrel oli aot long kalabus long Babilon, oli kambak. Ol man Taea oli givhan taem oli sanem ol wud ya sida, blong yusum long haos blong God we oli wokem bakegen. Mo tu, oli pem mo salem ol samting bakegen long taon ya Jerusalem.—Esra 3:7; Nehemaea 13:16.