?Baebol i Talem Wanem Long Saed Blong Fasin Blong Givimbak?
Ansa we Baebol i givim
Maet wan man i harem se i gat raet blong givimbak, be sipos hem i mekem olsem, hem i no obei long advaes blong Baebol se: “Yu no mas talem se: ‘Bambae mi mekem long hem stret olsem we hem i mekem long mi. . . . bambae mi mekem sem mak long hem.’” (Ol Proveb 24:29, futnot) Advaes blong Baebol i givhan long plante man blong oli winim filing ya we oli wantem givimbak.
Long atikol ya
?From wanem i rong blong givimbak?
Sipos narafala i mekem yu yu harem nogud o i spolem yu, i nomol nomo se yu kros mo yu wantem se hem i kasem panis from samting we hem i mekem. Be fasin blong givimbak i agensem Baebol. ?From wanem?
Taem ol man oli givimbak, God i no glad. Long Baebol, Jehovaa God i talem se: “Mi bambae mi givimbak. Mi nao bambae mi givim panis.” (Rom 12:19) Sipos narafala i spolem yumi, Baebol i pulum yumi blong traem mekem pis wetem hem mo stretem trabol ya, i bitim we yumi givimbak. (Rom 12:18) ?Be olsem wanem sipos i no gat rod blong mekem pis o blong stretem problem, o sipos yumi traem blong mekem be i no wok? Baebol i givim advaes se yumi mas trastem Jehova blong stretem ol problem olsem.—Ol Sam 42:10, 11.
?Olsem wanem God i panisim man?
Tede, God i letem ol gavman oli givim panis long ol man from rong we oli mekem. (Rom 13:1-4) Long stret taem, bambae hem i panisim ol man we oli stap spolem narafala, mo bambae hem i meksua se i no moa gat wan man i safa.—Aesea 11:4.
?Olsem wanem mi save winim filing ya blong wantem givimbak?
Tingting gud fastaem. (Ol Proveb 17:27) Man we i mekem samting from kros nomo, biaen hem i rigret. Be man we i tingting gud fastaem, hem i mekem wan gudfala desisen.—Ol Proveb 29:11.
Faenemaot samting we i tru. (Ol Proveb 18:13) Sipos narafala i mekem i no stret long yu, i gud yu askem se: ‘?I gat sam risen we mi no save, blong hem i mekem olsem? ?Hem i stres tumas? ?Hem i no tingbaot se i spolem mi?’ Samtaem yu save ting se narafala i minim nomo blong spolem yu, be maet i mestem nomo.
Rong tingting long saed blong fasin blong givimbak
Rong tingting: Baebol i givim raet long yumi blong givimbak, taem hem i talem se yumi save “spolem ae blong man we i spolem ae blong narafala.”—Levitikas 24:20, Contemporary English Version.
Trutok: Loa ya we i go long ol man Isrel bifo, i no givim raet long wanwan man blong givimbak long narafala. Loa ya i blong halpem ol jaj blong oli givim panis we i stret long rong we man i mekem.b—Dutronome 19:15-21.
Rong tingting: From we Baebol i no letem yumi blong givimbak, hemia i min se yumi no save mekem wan samting taem narafala i atakem yumi.
Trutok: Sipos narafala i atakem yumi, yumi gat raet blong difendem yumi mo askem help blong polis o sam narafala. Be Baebol i talem se yumi mas traehad blong mekem pis.—Ol Proveb 17:14.
a Baebol i talem se nem blong God hemia Jehova.
b Blong kasem save moa long rul ya, yu save luk haf ya: “?Wanem Mining Blong Loa Ya Se, ‘Sipos Wan Man i Spolem Ae Blong Narafala, Ae Blong Hem Tu Yufala i Mas Spolem’”?