?Hu Ya Jon Baptaes?

Ansa we Baebol i givim

Jon Baptaes i wan profet blong God. (Luk 1:76) Hem i bon bifo we Jisas i bon, mo hem i laef long faswan handred yia K.T. God i givim wok long hem blong rerem rod blong Mesaea o Kraes. Jon i mekem olsem taem hem i talemaot mesej blong God long ol man Jiu, blong pulum olgeta oli kambak long God.—Mak 1:1-4; Luk 1:13, 16, 17.

Mesej we Jon i talemaot i givhan long ol man we hat blong olgeta i stret, blong oli luksave se Jisas blong Nasaret i Mesaea we ol profet tok i talemaot. (Matiu 11:10) Jon i talem se oli mas tanem tingting blong olgeta from ol sin we oli mekem mo baptaes blong soemaot samting ya. (Luk 3:3-6) Oli singaotem hem se Jon Baptaes from we hem i baptaesem plante man. Be baptaes blong Jisas i moa impoten i bitim ol nara baptaes we Jon i mekem.a—Mak 1:9.

Long atikol ya

• ?From wanem Jon Baptaes i defren long ol narafala?

• ?Hu ya papa mo mama blong Jon Baptaes?

• ?Hu i kilim Jon Baptaes i ded?

• Jon Baptaes mo Jisas, ?tufala i traem winim tufala?

• ?I gat hamas man long Baebol we nem blong olgeta Jon?

?From wanem Jon Baptaes i defren long ol narafala?

Baebol i talemaot wok we hem i mekem: Wok blong prij we Jon i mekem i soemaot se hem i mesenja blong Jehova we profet tok blong Baebol i talemaot. (Malakae 3:1; Matiu 3:1-3) Wok blong hem i “mekem ol man oli rere long Jehova,” i min se hem i halpem ol man Jiu blong akseptem mesej blong Jehova we Jisas Kraes bambae i talemaot.—Luk 1:17.

Presen we Jon bambae i kasem: Jisas i talem se “i no gat wan we i hae moa long Jon Baptaes. Be man we i daon moa insaed long Kingdom blong heven, hem i hae moa long Jon.” (Matiu 11:11) I no gat wan man blong God bifo long Jon we i hae moa long hem, from we Jon i wan profet, mo tu hem i “mesenja” we ol profet tok oli talemaot. Ol tok blong Jisas oli soemaot tu se Jon bambae i no rul olsem wan king long Kingdom blong God long heven.b Jon i ded bifo we Jisas i openem rod blong man i save go long heven. (Hibru 10:19, 20) Be Jon bambae i gat janis blong laef olwe long Paradaes long wol, aninit long rul blong Kingdom blong God.—Ol Sam 37:29; Luk 23:43.

?Hu ya papa mo mama blong Jon Baptaes?

Papa mo mama blong Jon, hemia Sekaraea mo waef blong hem Elisabet. Sekaraea i wan man Jiu mo i wan pris. I wan merikel we Jon i bon, from we mama blong hem i no save karem pikinini, mo tu, hem mo Sekaraea “i olfala finis.”—Luk 1:5-7, 13.

?Hu i kilim Jon Baptaes i ded?

King Herod Antipas i givim oda blong oli katemaot hed blong Jon. Hem i mekem olsem from we waef blong hem Herodias, i askem long hem blong mekem. Woman ya i no laekem Jon nating, from we Jon i tok stret long Herod, we i stap talem se hem i wan man Jiu, se hem i brekem loa blong ol man Jiu taem hem i maredem woman ya.—Matiu 14:1-12; Mak 6:16-19.

Jon Baptaes mo Jisas, ?tufala i traem winim tufala?

Tingting ya se Jon mo Jisas i traem winim tufala i no stap long Baebol. (Jon 3:25-30) Jon i talem stret se wok blong hem i blong mekem rere rod blong Mesaea, be i no blong traem winim hem. Hem i talem se: “Mi stap baptaesem ol man long wota, blong mi save soemaot [Jisas] long ol man Isrel.” Mo hem i gohed se: “Man ya i Pikinini blong God.” (Jon 1:26-34) Taswe Jon i glad tumas blong harem nius blong ol wok we Jisas i mekem.