?Olsem Wanem Mi Save Skul Gud Long Haos?

Naoia, plante studen oli skul long wan defren “klasrum,” hemia haos blong olgeta. Sipos yu stap skul long haos, ?olsem wanem blong mekem se yu kasem gudfala edukesen, olsem taem yu go long skul? Tingbaot ol advaes ya.a

• Faef advaes blong givhan long yu

• Sam yangfala oli talem wanem

Faef advaes blong givhan long yu

• Mekem wan program. Traem folem wan program olsem we yu folem long skul. Makemaot stret taem blong mekem skulwok, ol wok long haos, mo ol narafala impoten samting. Samtaem maet yu mas mekem sam jenis long program ya.

  Rul blong Baebol: “Olgeta samting oli mas hapen long fasin we i gat oda.”—1 Korin 14:40, futnot.

  “Mekem plan blong dei blong yu olsem se yu stap long skul. Yu mas mekem ol wok blong yu long wan stret taem.”—Kati.

  Tingbaot: ?From wanem i gud blong raetemdaon program blong yu mo putum long ples we yu save luk oltaem?

• Strong long yu wan. Blong kam wan bigman long tingting blong yu, yu mas luksave se, nating we yu no wantem mekem wok we i stap fored long yu, be yu mas mekem. !Yu no mas lego i stap blong mekem long wan narafala taem!

  Rul blong Baebol: “Yufala i mas wok had, mo yufala i no pleplei long wok.”—Rom 12:11, futnot.

  “I had blong strong long yu wan. I isi blong mekem eskius se, ‘Bae mi mekem skulwok blong mi long wan narafala taem.’ Be bambae yu no mekem, nao i hivap gogo yu gat tumas samting blong mekem.”—Aleksandra.

  Tingbaot: Sipos mi mekem skulwok blong mi long sem ples mo sem taem evri dei, ?olsem wanem hemia i tijim mi blong stretem mi wan?

• Setemap wan ples blong stadi. Putum evri samting we yu nidim i stap klosap long yu. Mekem ples we yu stadi i kam wan ples we yu harem gud long hem, be i no wan ples blong slip. !Yu kam long ples ya blong wok, i no blong slip! Sipos i no gat wan spesel ples blong mekem skulwok blong yu, maet yu save mekem long kijin o long bedrum, long taem we yu no yusum rum ya.

  Rul blong Baebol: “Man we i stap wok had, i sua se ol plan blong hem bambae oli go gud.”—Ol Proveb 21:5.

  “Putum basketbol mo ol video gem long kabod, ofem fon blong yu, mo putum gita long bokis blong hem. I no mas gat wan samting raonabaot long yu we i save pulumaot yu long skulwok blong yu.”—Elisabet.

  Tingbaot: ?Yu save jenisim wanem samting, blong mekem se ples we yu stadi long hem, i stret blong mekem ol skulwok blong yu?

• Putum tingting blong yu long skulwok nomo. Yu no mas traem mekem plante samting long sem taem, be putum tingting blong yu long skulwok nomo. Sipos yu traem mekem narafala samting long semtaem, i sua se bambae yu mekem sam mastik, mo bambae i tekem longtaem moa blong finisim.

  Rul blong Baebol: “Yufala i yusum gud taem blong yufala.”—Efesas 5:16.

  “Mi no save putum tingting blong mi long skulwok taem mi holem fon blong mi. Mi westem plante taem long ol samting we oli no impoten.”—Olivia.

  Tingbaot: ?Yu save mekem se taem ya we yu putum tingting blong yu long skulwok nomo, i kam longfala moa evri taem?

• Mekem narafala samting blong smoltaem. Go wokbaot, ron long baskel, mekem eksasaes, o mekem samting we yu laekem blong mekem. Hemia i save givim paoa blong yu gohed long skulwok blong yu. Buk ya School Power i talem se: “Finisim skulwok we yu mas mekem fastaem. Olsem nao, bambae yu harem gud moa blong mekem narafala samting.”

  Rul blong Baebol: “I moa gud man i spel smol, i bitim we hem i stap wok had tumas mo i stap ronem win.”—Prija 4:6.

  “Long skul, yu save lanem blong plei wan instramen o blong dro. Mi rili misim ol samting ya. Taswe, i gud blong traem mekem wan samting olsem long haos, antap long ol skulwok blong yu.”—Taylor.

  Tingbaot: ?Wanem narafala samting we yu save mekem blong kliarem tingting blong yu, bifo we yu gohed wetem skulwok blong yu?