OL YANGFALA OLI ASKEM
?Kriesen o Evolusen?—Pat 3: ?From Wanem i Stret Blong Bilif Long Kriesen?
“Sipos yu bilif long kriesen, maet ol man oli ting se yu stupid, o yu bilif nomo from we papa mo mama blong yu i tijim yu olsem, o jos blong yu i fosem yu blong bilif olsem.”—Jinet.
?Yu yu gat sem tingting olsem Jinet? Sipos yes, maet yu no sua se i stret blong bilif long kriesen. I no gat wan long yumi we i wantem se narafala i ting se hem i stupid. ?Wanem i save givhan?
Ol tok blong agensem bilif long kriesen
1. Sipos yu bilif long kriesen, ol man bambae oli ting se yu agensem sayens.
“Tija blong mi i talem se ol man we oli bilif long kriesen oli les blong faenemaot wan narafala rod blong eksplenem olsem wanem wol ya i kamaot.”—Maria.
Samting we yu mas save: Ol man we oli tingting olsem oli no save samting we i tru. Plante saentis olsem Galileo mo Isaac Newton oli bilif long wan Krieta. Be bilif ya i no mekem se oli no moa laekem sayens. Sem mak tede, sam saentis oli agri se sayens i laenap wetem bilif long kriesen.
Samting we yu save mekem: Taepem tok ya “eksplenem bilif blong hem” (wetem ol kwotesen mak tu) long bokis ya ‘Lukaotem’ long Wajtaoa LAEBRI LONG INTENET, blong faenem stori blong sam dokta mo saentis we oli bilif long kriesen. Mo makem gud wanem i givhan long olgeta blong oli bilif.
Samting we i impoten: Sipos yu bilif long kriesen, hemia i no min se yu agensem sayens. Blong talem stret, moa we yu lanem long saed blong ol samting raonabaot long yumi, moa we bambae yu bilif long kriesen.—Rom 1:20.
2. Sipos yu bilif long samting we Baebol i talem long kriesen, ol man bambae oli ting se yu bitim mak long saed blong jos.
“Plante man oli laf long bilif blong kriesen. Oli ting se stori blong kriesen long Jenesis, i wan kastom stori nomo.”—Jasmin.
Samting we yu mas save: Plante man oli gat rong tingting long saed blong stori blong kriesen long Baebol. Samfala oli ting se wol i jes kamaot i no longtaem, mo se laef i kamaot long sikis dei we wanwan long olgeta i gat 24 aoa. Baebol i no sapotem tufala tingting ya.
Jenesis 1:1 i talem nomo se: “Long stat God i mekem heven mo wol.” Tok ya i no agensem ol samting we ol saentis oli faenemaot blong pruvum se wol ya i stat plante bilian yia finis.
Tok ya “dei” we Jenesis i yusum, i save minim wan longfala taem. Olsem long Jenesis 2:4, “dei” i minim ol sikis dei blong kriesen.
Samting we i impoten: Stori blong kriesen long Baebol i laenap wetem ol trufala samting we ol saentis oli faenemaot.
Tingting gud long bilif blong yu
Sipos yu bilif long kriesen, hemia i no min se yu bilif long samting we i no gat pruf blong hem. Be bilif blong yu i stanap long stret tingting. Traem tingbaot:
Evri samting long laef i tijim yu se sipos i gat wan disaen, i mas gat wan we i disaenem. Taem yu luk wan kamera, wan plen, o wan haos, wantaem nomo yu save se i mas gat wan man we i disaenem. ?From wanem yu sakemaot stret tingting ya taem yu tingbaot ae blong yumi, wan pijin long skae, o wol blong yumi?
Blong tingbaot: Plante enjinia oli kopi long samting we oli luk long kriesen, blong mekem samting we oli wokem i gud moa, mo oli wantem se ol man oli leftemap olgeta from. ?I stret blong leftemap man we i wokem samting, be yumi no leftemap Krieta, we ol disaen blong hem oli moa gud olgeta?
?I stret blong ting se wan man i disaenem plen be i no gat man i disaenem pijin?
Ol tul blong halpem yu blong faenem pruf
Yu save mekem bilif blong yu i strong moa long kriesen, sipos yu luk ol pruf long ol samting raonabaot long yu.
Samting we yu save mekem: Taepem tok ya “i gat wan man we i wokem samting ya” (wetem ol kwotesen mak tu) long bokis ya ‘Lukaotem’ long Wajtaoa LAEBRI LONG INTENET. Jusum sam haf blong “?I Gat Wan Man We i Wokem Samting Ya?” long Wekap! we yu intres long olgeta. Long ol wanwan haf ya, traem luksave from wanem samting we oli stap tokbaot i spesel. ?Olsem wanem samting ya i givhan long yu blong bilif long Krieta?
Digim moa: Yu save yusum ol buklet ya blong faenem moa pruf blong kriesen.
Was Life Created?
Wol i stap long stret ples mo i gat evri samting long hem blong sapotem ol laef samting.—Yu luk pej 4-10.
Long ol samting raonabaot long yumi, yumi luk se i mas gat wan man we i disaenem mo wokem olgeta.—Yu luk pej 11-17.
Stori blong kriesen long Jenesis i laenap wetem sayens.—Yu luk pej 24-28.
The Origin of Life—Five Questions Worth Asking
Laef i no save stat hem wan, mo kamaot long samting we i no laef.—Yu luk pej 4-7.
I gat tumas samting we i mas hapen blong mekem wan laef samting, taswe i no save kamaot hem wan, we i no gat man i wokem.—Yu luk pej 8-12.
DNA i save holem moa infomesen, i bitim ol teknoloji blong yumi tede.—Yu luk pej 13-21.
Laef i no kamaot sloslo, stat longtaem finis i kam. Ol olfala bun we oli digimaot long graon oli pruvum se laef blong ol defdefren kaen animol i stat wantaem nomo, i no sloslo.—Yu luk pej 22-29.
“Stat long ol animol i go kasem bigfala yunives we i wok folem oda, kriesen i pruvum long mi se God i stap.”—Tomas.