?Kriesen o Evolusen?—Pat 4: ?Olsem Wanem Blong Eksplenem Bilif Blong Mi Long Kriesen?

!Yu yu naf!

Maet yu ting se: ‘Mi mi no gat naf save blong tokbaot sayens mo agensem evolusen.’ Hemia nao tingting blong Daniele. Hem i talem se: “Mi no wantem agensem tija mo ol yangfala long klas. Taem oli yusum ol tok blong sayens blong tokbaot evolusen, mi konfius.”

Be, bigfala tingting blong yu i no blong winim wan rao. Mo samting we i gud se, yu no nid blong gat bigfala save long saed blong sayens blong eksplenem from wanem yu yu luksave se i mas gat wan Krieta blong ol samting raonabaot long yumi.

Advaes: Yusum tingting ya we i isi mo i stret, long Hibru 3:4 we i talem se: “Evri haos i gat man we i wokem, be God i wokem olgeta samting we i stap.”

Wan yangfala we nem blong hem Karol, i tingting gud long stamba trutok long Hibru 3:4, nao hem i eksplenem olsem: “Traem tingbaot se yu stap wokbaot long dak bus. I no gat wan narafala man i stap, ol man oli stap plante kilometa longwe. Be wantaem nomo, yu luk wan mases long graon. ?Wanem tingting blong yu? Bighaf blong ol man bambae oli talem se, ‘I gat wan man i bin kam long ples ya.’ !Sipos samting we i smol mo i no impoten olsem wan mases i pruvum se i gat wan man i stap, bigfala yunives mo evri samting long hem i mas pruvum moa!”

Sipos wan man i talem se: “Be sipos kriesen i tru, ?hu i wokem Krieta?”

Yu save ansa olsem: “I tru, yumi no kasemsave evri samting long saed blong Krieta, be hemia i no min se Krieta i no stap. Traem tingbaot: Maet yu no save evri samting long saed blong man we i wokem mobaelfon blong yu, be yu bilif yet se i mas gat wan man we i wokem, ?i tru? [Wet long ansa.] I gat plante samting we yumi save kasem save long olgeta, long saed blong Krieta. Sipos yu wantem save moa, mi mi glad blong serem samting we mi lanem finis.”

Yu mas rere

Baebol i talem se yu mas ‘rere oltaem blong ansa long eni man we i askem kwestin long saed blong hop blong yu, be yu mekem long kwaet fasin mo bigfala respek.” (1 Pita 3:15) Taswe, yu mas tingbaot tu samting: wanem we yu talem mo olsem wanem yu talem.

1. Wanem we yu talem. Lav we yu yu gat long God i impoten tumas, mo i save pulum yu blong toktok. Be sipos yu talem nomo long ol narafala se yu lavem God, maet hemia i no naf blong pulum olgeta blong bilif se God i krietem ol samting. Maet i moa gud blong yusum eksampol blong sam samting we God i wokem, blong soemaot from wanem i stret blong bilif long kriesen.

2. Olsem wanem yu talem. Yu mas toktok wetem bilif, be yu mas soemaot respek tu, yu no mas mekem olsem se ol narafala oli daon moa long yu. Sipos yu toktok wetem respek mo yu soemaot se ol man oli gat raet blong mekem prapa desisen blong olgeta, ating bambae oli glad blong lesin long yu.

   “I impoten se yu neva yusum ol tok we oli spolem man, o mekem olsem se yu save evri samting. Sipos yu toktok olsem se yu gud moa long ol narafala, hemia bambae i blokem gudfala frut we i save kamaot.”—Ilein.

Ol tul blong halpem yu blong eksplenem bilif blong yu

Wan tineja we nem blong hem Alisia, i talem se: “Sipos yumi no rere, bambae yumi wantem stap kwaet nomo, yumi no wantem sem long fored blong ol narafala.” Olsem Alisia i talem, i impoten blong rere gud. Jena i talem se: “Mi harem gud moa blong tokbaot kriesen taem mi rerem finis wan gudfala eksampol blong sapotem bilif blong mi.”

?Yu save faenem ol eksampol ya wea? Plante yangfala oli yusum hemia:

• Was Life Created?

• The Origin of Life—Five Questions Worth Asking

• Ol Samting We God i Wokem Oli Leftemap Hem (video)

• Haf ya “?I Gat Wan Man We i Wokem Samting Ya?” long Wekap! (Taepem tok ya “i gat wan man we i wokem samting ya” [wetem ol kwotesen mak tu] long bokis ya ‘Lukaotem’ long Wajtaoa LAEBRI LONG INTENET.)

• Yusum Wajtaoa LAEBRI LONG INTENET blong mekem moa risej.

Maet i gud tu blong yu lukluk bak long ol narafala haf long “?Kriesen o Evolusen?”

1. Pat 1: ?From Wanem i Stret Blong Bilif Long God?

2. Pat 2: ?I Stret Blong Kwestinim Evolusen?

3. Pat 3: ?From Wanem i Stret Blong Bilif Long Kriesen?

Advaes: Jusum ol eksampol we oli bildimap bilif blong yu. Olsem nao, bambae i isi blong rimemba olgeta mo tokbaot olgeta wetem bilif. I gud yu praktis olsem wanem blong eksplenem bilif blong yu.