Kilim Man i Ded Long Nem Blong God
MAN BLONG WEKAP! LONG FRANIS I RAETEM STORE YA
Long nem blong god, mifala i kilim man i ded mo bambae mifala i gohed blong kilim man i ded”
A NINIT long tok ya antap, nyuspepa ya International Herald Tribune i talem se: “Sam man we oli traehad blong holem gudfala tingting, oli laekem blong tingbaot handred yia we i jes pas olsem wan taem we save i kam antap bigwan. Be long ol yia ya, i gat nogud fasin ya blong kilim man i ded long nem blong God, olsem i gat long olgeta yia bifo.”
Man we i raetem store ya long nyuspepa i tokbaot sam faet we ol skul oli bin mekem long ol handred yia we oli pas finis, we plante man oli ded long olgeta. Biaen, hem i tokbaot ol faet we oli hapen long ol yia 19 handred, mo i talem se: “Samting we i mekem yumi harem nogud tumas, hemia se olgeta nogud fasin blong kilim man i ded long ol yia we oli pas, oli stap gohed nomo. Wosip i stap yet olsem wan eskyus blong mekem raf fasin long politik mo blong tekem graon blong narafala man.”
Samfala man oli traem soemaot se ol faet blong skul tede oli stret nomo. Oli talem se God i bin agri wetem ol faet we ol man Isrel oli mekem agensem ol man Kenan bifo, we plante man oli ded from. Be, hemia i no givim raet long ol man tede we oli talem se oli Kristin, blong mekem faet. ?From wanem? From we God nao i givim oda blong faet long ol man Isrel. Oli olsem ol man we God i yusum blong mekem ol stretfala jajmen blong hem oli kamtru agensem ol man we oli wosip long ol devel, mo we wosip blong olgeta i joen long ol doti fasin long saed blong seks mo fasin blong kilim pikinini i ded olsem sakrifaes.—Dutronome 7:1-5; 2 Kronikel 28:3.
Wan pruf we i soemaot se ol faet we ol man Isrel bifo oli mekem oli no olsem ol narafala faet, hemia ol merikel we God i mekem blong nesen ya i win. Eksampel, long wan faet oli bin kasem oda blong yusum ol pupu, ol bigfala botel, mo ol stik faea—!ol samting ya oli no ol tul blong faet nating! Long wan narafala faet, ol man blong singsing oli stap long faswan laen blong ami blong Isrel, taem oli fesem wan bigfala strong ami blong plante narafala kantri we oli joen wanples blong faet agensem olgeta.—Jajes 7:17-22; 2 Kronikel 20:10-26.
Sam samtaem ol man Isrel oli mekem faet we God i no bin givim oda long olgeta blong mekem. Long ol taem olsem, God i no blesem olgeta mo oli safa from we ol narafala ami oli winim olgeta. (Dutronome 28:15, 25; Jajes 2:11-14; 1 Samuel 4:1-3, 10, 11) Taswe, man i no save yusum store blong ol faet blong ol man Isrel blong talem se ol faet blong Krisendoma oli stret nomo.
Long nem blong skul, ol Hindu oli faet agensem ol Muslim mo ol Sik. Ol Muslim long saed blong Sia oli faet agensem ol Muslim long saed blong Suni. Mo long Sri Lanka, ol Budis mo ol Hindu oli bin kilkilim olgeta i ded.
Ol faet we oli hapen long Franis long ol yia 15 handred, oli soemaot fasin ya blong kilim narafala i ded long nem blong God. Store blong ol faet ya i soem se Katolik mo Protestan skul long Yurop oli mekem moa blad i ron long taem ya i bitim olgeta narafala taem bifo. Naoia yumi lukluk moa long ol faet ya, mo luk wanem samting we yumi save lanem from olgeta.
[Futnot]
a Ol skul we oli gyaman se oli Kristin.
[Foto Credit Line blong pija long pej 3]
U.S. Army photo