Bigfala Hil Blong Sinae Wan Sas Ston Long Draeples

BAMBAE mi neva fogetem filing blong mi, taem fastaem mi luk ples ya, we bigfala hil blong Sinae i stap long hem. Taem mifala i ron long trak, ples i hot tumas, mo rod we i go long hil blong Sinae, long Ijip, i fulap long smok blong graon. Mo i no longtaem taksi i kasem wan level ples, we oli kolem er-Raha. Bigfala hil blong Sinae i stap saengud long level ples ya. Hem i luk olsem wan sas ston, we i stap saen long draeples. Mitufala i stap tingting se, !maet long bigfala hil ya nao we Moses i kasem loa blong God!.

Naoia i gat sam toktok yet i kamaot, long saed blong stret ples we Hil Sinae i bin stap long hem, olsem Baebol i talem. Plante yia finis nao, ol man blong plante kantri oli stap kam wosip long ples ya, from we oli bilif se hemia nao hil we Baebol i tokbaot. Stat bifo long yia 300 K.T.,a ol man ascetic we oli wantem laef olgeta nomo, longwe long ol narafala man, oli kam blong wosip long ples ya. Long yia 600, Bigfala king blong ol man Rom blong Byzantium, nem blong hem Justinian 1, i givim oda blong bildim ol strongfala stonwol raonabaot long vilej ya blong ol pris, blong protektem olgeta, mo tu, blong mekem se ol man Rom oli gat paoa long ples ya. Vilej ya i stap klosap long bigfala hil blong Sinae, we naoia oli kolem joshaos blong St. Catherine. !I gud yu folem mitufala long trip ya, long Hil blong Sinae!

Lukluk Bigfala Hil Ya

Afta we mitufala i ron long trak tru long drae ples, man blong taksi, wan man ples, i dropem mi wetem fren blong mi, klosap long vilej ya. Long ples ya, mitufala i save luk ol bigbigfala hil blong ston raonabaot, oli blokem lukluk olsem wan wol. Defren olgeta, ol tri we oli gru long jos ya wetem wan garen oli gringud. Be mifala i wokbaot i go, from we mifala i wantem klaem hil ya we i luk i go long saot, blong slip antap long hem long naet ya. Ol kastom stori oli talem se Hil ya Gebel Musa, we i minim “Hil blong Moses,” i sem mak long bigfala hil blong Sinae we Baebol i tokbaot.

Afta we mitufala i wokbaot tu aoa, mitufala i kasem wan ples we oli kolem Besin blong Elaeja. Hem i wan ples daon we krik i save ron long hem. Hil blong Sinae, longfala blong hem, tri kilometa, mo ples daon ya i spletem hem long tu haf. Folem ol kastom stori, klosap long wan hol blong ston we i stap long ples ya nao, Elaeja i harem voes blong God. (1 King 19:8-13) Mifala i stop blong spel aninit long wan tri we i gat 500 yia nao. Mo tu, i gat wan wel blong bifo i stap long ples ya. Wan man ples i givim wota we i klia mo kolgud long mifala. !Mifala i haremgud tumas blong dring!

Taem mifala i folem rod blong ol turis, i gat 750 step we mifala i mas traehad blong wokbaot long hem. Mo i tekem 20 moa menet blong kasem top blong hil.[11] Long ples ya, mifala i faenem wan smol joshaos. Ol pris oli bilif strong se oli bildim jos ya long stret ples we Moses i bin kasem loa blong God. Klosap long jos, i gat wan smol hol long ston. Oli talem se long ples ya nao we Moses i haedem hem, taem God i pas klosap long hem. (Eksodas 33:21-23) Be blong talem tru, i no gat wan man i save stret ples we ol samting ya oli hapen long taem ya. Nao mifala i kasem top blong hil ya mo mifala i lukluk. !Ples ya i naes we i naes! Mifala i lukluk long ol ples biaen, ol laen blong ol hil blong bigfala red ston, mo long fored, wan flat ples we i fulap long ol smol ston. Long saot wes, hil ya Gebel Katherina i stanap, we hae blong hem i kasem 2637 mita. Hem i mama blong ol hil long ples ya.

Klaem Hil Blong Ras Safsafa

Narafala dei, mitufala i gat jans blong klaem hil blong Ras Safsafa. Top blong hem i stap long sem level long ol hil blong Gebel Musa. Ras Safsafa i wan hil long not, mo hem i daon moa smol long hil blong Gebel Musa. Hil blong Ras Safsafa i stanap stret antap long Flat Ples blong er-Raha. Ating long ples ya nao, ol man Isrel oli bin stap long hem, taem Moses i go antap long hil blong kasem loa blong Jeova.

Taem mitufala i wokbaot long hil blong Ras Safsafa tru long wan ples we i gat smol hil mo ol flat ples, mitufala i luk ol jos, ol garen, mo ol springwora we i no moa gat man i lukaot long olgeta. Hemia ol samting blong bifo, we bitim wan handred pris mo ol man ascetic oli bin wokem, taem oli stap long ol hol blong ston mo long ol smol haos blong ston. Naoia i gat wan pris nomo i stap long ples ya.

Mifala i mitim pris ya long wan garen we oli raonem long wan fenis blong babwaea. Hem i letem mifala i go insaed, mo i eksplenem se hem i bin wok long garen ya, blong faef yia nao. Mo hem i stap go long jos wan taem nomo evri wik. [19] Pris ya i soem rod long mifala long hil blong Ras Safsafa, mo mifala i gohed blong wokbaot kasem we mifala i stap antap olgeta long ol narafala hil we i stap raonabaot. Daon long mifala, mifala i save luk Flat Ples blong er-Raha. Ples ya we i naes, ating kamp blong ol man Isrel i stap long hem bifo. Nao mi save tingbaot we Moses i aot long ples ya blong go klaem hil ya, blong God i toktok wetem hem. Mi stap mekem pija long tingting blong mi, taem tri milyan man Isrel oli hivap wanples “long fored blong bigfala hil” long bigfala flat ples. Mi stap tingting se Moses i aot long hil ya mo i kamdaon, we i stap karem tufala flat ston ya we God i bin raetem Tenkomanmen blong hem long tu saed blong hem.—Eksodas 19:2; 20:18; 32:15.

Mifala i haremgud blong luk se ol traehad blong mifala blong klaem hil ya, i no blong nating nomo. Taem san i stap godaon, mifala i gobak sloslou long smol haos tapolen blong mifala. Ale, mifala i laetem wan smol faea, mo mifala i ridim ol haf blong buk blong Eksodas we i tokbaot ol samting we i kamaot long laef blong Moses, taem hem i stap long ples ya stret. Mo biaen mifala i go slip. Long nekis moning, klosap long medeldei, mifala i go kilkilim doa blong joshaos blong St. Catherine.

Insaed Long Joshaos

Jos blong St. Catherine ol man blong Krisendomb oli tinghae long hem. Ol pris blong ol Otodoks Skul long Gris oli holem jos ya. Plante man oli savegud ples ya, from ples we hem i stap long hem, mo tu from ol spesel pija ya ikon, mo ol buk blong hem tu. Long ol taem bifo, i no plante man we oli kam visitim jos ya, nao blong welkamem olgeta, ol pris oli kisim olgeta, mo tu oli wasem leg blong olgeta. Nao ol man we oli kam blong visitim jos ya, oli fri blong wokbaot long olgeta haos blong vilej ya we wan bigfala stonwol i raonem, we hae blong wol ya i kasem 15 mita. Ol pris oli stap talem oltaem se: ‘Yu save stap wan wik, wan manis, longtaem olsem yu wantem.’ Hemia fasin blong bifo. Be tede, i gat samwe long twelef pris nomo i stap, mo oli no save tekem olgeta man i kam long haos blong olgeta. From we naoia evri yia, i bitim 50,000 man we oli kam visitim ples ya.

From we i gat plante man oli kam visitim ples ya, oli katem ol aoa blong visitim ples, tri aoa nomo long wan dei, faef dei evri wik. Ol turis oli save visitim wan haf nomo blong vilej ya—wan yad we i gat ‘Wel blong Moses’ (kastom stori i talem se long ples ya nao, Moses i mitim waef blong hem), Transfiguration Jos (blong makem ples we ‘bodi blong Moses i jenis.’ Ating hem i olfala moa, bitim olgeta narafala jos long wol we ol man oli stap mekem wosip yet long hem), mo wan stoa blong salem ol buk. Mo tu, ol turis oli save luk Burning Bush Jos, we ol pris oli talem se, long ples ya nao God i toktok fastaem wetem Moses. From samting ya, ol pris oli luk ples ya olsem wan ples we i tabu tumas long wol. Oli askem ol man we oli kam blong visitim ples ya, blong oli tekemaot sus blong olgeta, olsem God i bin askem Moses blong mekem.—Eksodas 3:5.

Mitufala i sore tumas, taem oli no letem mifala blong luk ol naesfala buk, we mitufala i intres tumas long hem. Taem mifala i askem man we i soem ples long mifala, blong oli letem mifala i luk ples blong ol buk, hem i se: “!No, yufala i no save go! Jos bambae i klos i no longtaem.” Be biaen, taem mifala i stap longwe long grup blong ol turis, man we i stap lidim mifala i toktok smol long mifala se: “!Yutufala i kam long rod ya!” Nao mifala i wokbaot aninit long ol rop, folem sam step, mo mifala i mitim wan pris blong Franis we i sek blong luk mitufala long ples ya. !Mifala i kasem ples we sam long ol moa olfala mo nambawan buk blong wol oli stap long hem! Insaed long ples ya i gat bitim 4500 buk, we oli raetem long ol lanwis blong bifo blong ol man Gris, Arab, Ijip, mo lanwis Syriak. Bifo, longtaem tumas, nambawan buk blong Codex Sinaiticus i bin stap long hem tu.—Lukluk bokis long pej 18.

Visitim Ol Dedbodi, Mo Livim Ples

Long en blong visit ya, mitufala i go afsaed long yad blong jos, blong visitim ples we oli putum ol dedbodi. Long ples ya, oli hivimap ol bun blong ol pris mo ol man hermit, we oli bin laef bifo kasem taem blong yumi. Oli seraotem long ol defren hip, ol bun blong leg i go wansaed, ol bun blong han i go wansaed, mo sem mak long ol bun blong hed, mo ol narafala bun. Ol bun blong hed oli hivap kasem ruf blong haos. ?From wanem oli wokem wan nogud ples blong fraet olsem? Beregraon we ol pris oli gat i smol tumas. Taswe, taem wan long olgeta i ded, folem kastom blong olgeta, oli tekemaot ol bun we i stap long wan olfala gref, blong mekem se i gat ples blong putum niufala dedbodi long hem. Wanwan long ol pris oli save se wan dei, ol bun blong olgeta bambae i go joen long olgeta we i stap finis long ples blong ol dedbodi.

Visit blong mitufala i finis wetem ol dedbodi ya. Be mifala i no harem nogud. Mifala i glad blong lukluk sam naesfala ples mo bigfala vilej ya we plante man oli save long hem. Be taem mifala i aot, mifala i tingting strong se maet mitufala i bin wokbaot long ol trak blong Moses mo ol man Isrel bifo, 3500 yia i pas finis, long Bigfala hil blong Sinae—Hemia wan sas ston long draeples.—Wan man i givim stori ya long mifala.

[Futnot]

[[Bokis blong pija long pej 18]

Oli Faenemaot Wan Nambawan Buk

Long ol yia we i pas, Konstantin von Tischendorf, wan man blong stadi long Baebol long Jemani, i go long jos blong St. Catherine. Hem i faenemaot wan olfala hanraet blong Grik haf blong Baebol, blong ol yia 300. Naoia oli kolem hanraet ya Codex Sinaiticus. Insaed i gat fulap buk blong Hibru haf blong Baebol long Grik Septuagint Baebol, mo olgeta buk blong Grik haf blong Baebol. I gat wanwan olfala hanraet olsem nomo, we i gat Grik haf blong Baebol fulwan.

Tischendorf i wantem prentem ol tok blong hanraet ya, mo hem i talem se “i no gat narafala buk olsem long wol.” Folem tingting blong Ti­schendorf, hem i askem long ol pris blong givim olfala hanraet ya long king blong Rasia, Alexander II​—⁠we i olsem man blong protektem Otodoks Jos, mo ol man long joshaos blong St Catherine oli save bilivim hem.

Oli transletem wan leta we Tischendorf i raetem i kam long olgeta, mo tede oli pinim hem long wan wol blong haos ya. Long leta ya, hem i bin promes blong givimbak olfala hanraet ya, blong hem i save stapgud ‘wetem ol brata blong Hil blong Sinae, taem bambae olgeta oli askem.’ Be Tischendorf i neva givimbak hanraet ya. Hem i tingbaot se ol pris oli no luksave se hanraet ya i impoten olsem wanem, no maet biaen oli no letem ol man oli mekem kopi blong hem. Biaen, nomata we ol pris oli akseptem 7,000 rubles mane long Gavman blong Rasia, from oli lusum hanraet ya, be ol pris oli no moa trastem ol man blong hae save we oli intres long ol hanraet blong olgeta. Tede yu save luk Codex Sinaiticus long British Museum.

Long 1975, oli digim graon aninit long wol blong joshaos blong St. Catherine, long saed i go long not. Nao oli faenemaot 47 bokis blong ol ikon blong olgeta mo ol olfala hanraet. Long ol hanraet ya, i gat bitim twelef pej we i bin lus long Codex Sinaiticus. Kasem naoia, i gat smol man blong save nomo we oli gat raet blong luk ol ­hanraet ya.

[Map blong pija long pej 17]

Hil blong Sinae

[Credit Lines]

NASA photo

Mountain High Maps® Copyright © 1997 Digital Wisdom, Inc.

[Tok blong pija long pej 16, 17]

Flat Ples blong er-Raha, mo Ras Safsafa

[Credit Line]

Pictorial Archive (Near Eastern History) Est.

[Tok blong pija long pej 18]

Gebel Musa mo joshaos blong St. Catherine

[Credit Lines]

Pictorial Archive (Near Eastern History) Est.

Photograph taken by courtesy of the British Museum