Strong Wok Blong Sevem Man

Man blong Wekap! long BENIN i raetem stori ya

“TRIFALA man ya oli laef nomo from we ol Witnes blong Jeova oli sevem trifala.” Hemia nius we i goraon long taon ya Calavi, long kantri ya Benin long Wes Afrika, long Wenesde, Eprel 19, 2000. ?Hu ya trifala man ya? ?Olsem wanem ol Witnes blong Jeova oli sevem trifala ya?

Long haf pas 6 long moning, Philippe Elegbe mo Roger Kounougbe, tufala i stap mekemrere blong go wok long stadium we bambae ol Witnes blong Jeova oli mekem asembli long hem, klosap nomo long ofis blong Watch Tower Sosaeti long Benin. Long naet ya, bambae i gat plante handred man oli hivap long stadium ya blong mekem Memoriol blong ded blong Jisas Kraes, olsem evri yia.a Nao, wantaem nomo, wan bigbigfala noes i spolem kwaet taem blong moning. Philippe mo Roger i save wantaem nomo se i gat wan aksiden long big rod.

Sam seken biaen, tufala i harem wan man i singaot strong se: “Ol bag simen ya oli berem trifala wokman blong mi.” Tufala i spid i go long big rod. Nao tufala i luk wan kameong we i save karem 20 tan, i kafsaed, i stap slip long saed blong hem. Plante bag simen oli folfoldaon olbaot long rod.

Josué Didolanvi we hem tu i stap wok long stadium, i stap finis klosap long kameong, i stap pulum wan man i kamaot long smol ples bitwin ol bag simen mo fored blong kameong. Man we i draevem kameong ya, i kamaot finis, be hem i stap seksek tumas. Nating se i olsem, hem i faenem paoa blong singaot strong se: “I gat tu man i stap yet aninit long simen ya.” Sam man we oli stanap raonabaot oli karemaot sam bag, be oli mekem blong smoltaem nomo from we ol bag ya oli hot bitim mak. Simen ya i jes kamaot long oven long ples blong wokem simen.

Sevem Tufala

Philippe, Roger, mo Josué, trifala i stat karemaot ol bag wanwan, we oli olsem wan bigfala hil. Ol han blong trifala oli soa bitim mak, from hot blong ol bag ya mo from we wan bag i hevi olsem 50 kilo. Antap long hemia, sam bag oli brobrok, mo simen i stap kamkamaot olbaot. Hemia i mekem ol fingga blong trifala oli solap mo i had blong oli pulum win. Biaen, Josué i talem se: “I olsem we faea i laet long tufala han blong mi, antap moa, ol fingga blong mi. Be mi stap tingbaot se maet mitrifala i save sevem tufala man we simen ya i berem tufala.”

Afta we trifala i karemaot 40 bag, oli luk wan gras mat. Oli sek we tufala man ya oli stap stret long ples ya, aninit long mat. Yes, tufala i laef i stap. Taem kameong ya i kafsaed, tufala i stap slip long mat ya antap long ol bag. Taem tufala i foldaon long graon, mat i foldaon antap long tufala, i blokem tufala long bigfala hot blong ol bag simen we oli berem tufala.

Taem ol wok ya i stap gohed, wan bigfala hip man oli kam stanap raonabaot. Olgeta ya oli sapraes tumas se Philippe, Roger, mo Josué i bin karemaot tu tan simen long wan sot taem nomo, nating se i hadwok tumas. Oli sapraes tu se trifala ya oli glad blong mekem strong wok ya blong givhan long sam man we trifala i no save olgeta nating. I no longtaem, olgeta man long Calavi oli save long nambawan wok ya we trifala i mekem.

[Futnot]

[Tok blong pija long pej 31]

Roger i stap holem mat afta we trifala i sevem ol man ya