?Famle Laef i Save Hapi Moa Sipos i No Gat Televisin?

LONG Febuwari long yia ya, magasin ya The Wall Street Journal i karem store ya: “No gat TV: Sam Famle Oli Haremgud Moa Taem Oli No Gat Televisin.” Magasin ya i givim ripot ya se: “Smol namba blong ol famle long Amerika we oli no moa lukluk televisin nating, oli stap laef yet—mo oli glad moa long laef ya.”

I no longtaem i pas, ol man oli joen blong selebretem namba 40 yia blong resis ya we Roger Bannister i winim from we hem i faswan man blong ron wan mael we i no tekem fo menet blong mekem. Ale long taem ya, oli tokbaot trabol we televisin i save mekem long famle. Jim Ryun, we hem i wan jampion long ol resis blong wan mael long ol yia bitwin 1960 mo 1970 i talem se, Roger i tokbaot poen ya taem oli stap kakae wanples, bifo we oli mekem Olympik long 1968.

Ryun i eksplenem se: “Long taem ya, mi mo waef blong mi, Anne, mitufala i mekem promes blong mared. Ale Roger i talem long mitufala se hem i faenem wan samting we i rili mekem famle laef blong hem i kam moa gud. Mitufala i rili lesingud. Nao, hem i talemaot samting we hem i mekem. Hem i tekemaot televisin long haos. Ale samting ya i givim moa taem long olgeta, olsem wan famle, blong stap tugeta, toktok, mo rid tugeta.”

Ryun i talem se: “Samting we [Roger] i talem i gat bigfala paoa long mitufala. Mitufala i stat blong luksave se, ‘Mitufala i no rili nidim wan televisin.’ ”

Sam man oli luksave sem samting ya. ?From wanem? From trabol we televisin i save mekem taem i pulum ol man blong lukluk hem oltaem, mo samting ya i kamaot moa long ol yangfala. Wan mama long Merilan, Yunaeted Stet, i talem se, taem hem i stap givim titi long bebi gel blong hem long fored blong televisin, wantaem nomo, bebi i save “tanem fes blong hem, i no moa lukluk mi, be i lukluk strong long televisin. Mifala i stap tingting se, sipos hem i mekem fasin ya taem hem i smol olsem, ?olsem wanem taem hem i kam bigwan?” Ale, famle ya i sakemaot televisin.

Sipos yu no blokem fulwan fasin ya blong lukluk televisin, i waes blong kontrolem, ?no? Karen Stevenson, faswan blak woman we i kasem wan ‘Rhodes Skolasip’ blong stadi long Oksfod Yunivesiti long Engglan, i tokbaot laef blong hem taem hem i pikinini, se: “Long ol dei blong wik, mama i no letem mifala blong lukluk televisin. Sipos i gat wan program we mifala i rili intres blong luk . . . , mifala i mas tokbaot wetem [hem] long Sande bifo mo mifala i plan from.”

?Olsem wanem long fasin blong lukluk televisin long famle blong yu? ?Yu yu luksave from wanem i impoten tumas blong putum wan mak, no blong karemaot fulwan blong smoltaem?