Wan Smol Gel i Tingbaot Wan Nambawan Fiuja
WEKAP! i kasem wan leta long wan smol gel we i gat 12 yia, nem blong hem Stephanie. Hem i talem se: “Mi mi wantem talem olsem wanem ol buk blong yufala oli bin givhan long mi long skul. I no longtaem i pas, tija i talem long klas blong mekem wan projek long saed blong ‘Ol Defdefren Kastom Blong Ol Man.’ Mi wetem famle blong mi, mifala i lukluk ol buk we yufala i wokem, mo mifala i katemaot ol pija mo ol tok we oli stret long stamba tok ya. Afta, mi putum olgeta samting ya tugeta blong wokem wan bigfala pija.” Tija blong Stephanie i talem long klas blong jusum faef projek we oli ting se oli beswan. Stepanie i raetem se: “Long nekis dei, mi faenemaot se oli jusum projek blong mi wetem faef ya.”
Wan buk we Stephanie i yusum, hemia Wekap! blong Oktoba 22, 1998 (Inglis mo Franis), nem blong hem “?Bambae Ol Man Oli Laeklaekem Olgeta Samtaem?” From we Stephanie i wan Witnes blong Jeova, hem i bilif fulwan se ol man blong ol defdefren kastom oli save stap tugeta long pis. Yes, hem wan i joen long wan kampani blong man long fulwol we oli olsem ol brata nomo. Long kampani ya, trutok blong Baebol i mekem ol man we fastaem oli enemi, oli joengud. Sam long olgeta ya, i gat ol Tutsi mo Hutu, ol man Jemani mo ol man Rasia, ol man Amenia mo ol man Teki, ol man Japan mo ol man Amerika. Olgeta ya evriwan oli traehad blong folem fasin blong Bigfala Man we i Wokem olgeta. ?Olsem wanem oli mekem samting ya? Wan vas blong Baebol we Stephanie i yusum long projek blong hem i givim ansa. Vas ya i talem olsem: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10:34, 35) Ol Witnes blong Jeova oli traehad blong soemaot fasin ya.
Stephanie i stap wet long taem ya we promes blong Baebol bambae i kamtru, se i no longtaem, Kingdom blong God bambae i mekem wol i fulap long stret fasin. (Revelesen 21:3, 4) Plante yangfala long wol ya oli fraet long fiuja mo oli no sua se wanem samting bambae i hapen. Be Stephanie i defren, hem i putum tingting blong hem i stap strong long wan nambawan fiuja.