BAEBOL I TALEM WANEM
?Wanem i Hapen Long Yumi Taem Yumi Ded?
Ol skul oli gat defdefren tingting long ol dedman. Be Baebol i eksplenem klia.
?Taem yumi ded, yumi go laef long wan narafala ples bakegen?
?OL MAN OLI TALEM WANEM?
Plante man oli bilif se afta we yumi ded, bambae yumi go laef long wan narafala ples. Samfala oli ting se bambae yumi kambak long wan narafala bodi. Sam narafala bakegen oli bilif se bambae yumi go long heven no long helfaea.
?BAEBOL I TALEM WANEM?
Baebol i no talem se bambae yumi go laef long wan narafala ples bakegen. Baebol i talem se taem yumi ded, yumi gobak long graon nomo, be i no gat wan samting insaed long yumi we i go laef long wan narafala ples. Taem God i talemaot panis we Adam bambae i kasem, hem i talem se Adam bambae i gobak long graon, i min se Adam i no moa laef.
“Mi mi wokem yu long graon fastaem, mo bambae yu yu kam graon bakegen.”—Jenesis 3:19.
?Ol dedman oli stap olsem wanem?
?BAEBOL I TALEM WANEM?
Baebol i talem se taem yumi ded, bodi blong yumi i lus. Mo tu, “i no gat wok, mo tingting, mo save, mo waes” long beregraon. (Prija 9:10) Taem ol man oli ded, “oli stap gobak long graon nomo, nao ol plan blong olgeta oli no save kamtru.” (Ol Sam 146:4) Man we i ded i no save mekem wan samting. Taswe, Baebol i tokbaot dedman se “i stap slip nomo.”—Matiu 9:24.
?FROM WANEM SAVE YA I IMPOTEN?
Taem wan fren no famle blong yu i ded, yu wantem save ansa blong ol kwestin olsem: ?Oli stap wea? ?Oli stap harem gud no oli harem nogud? From we Baebol i talem se dedman i no save samting, yumi save se famle ya no fren blong yumi i no stap harem nogud samples. Yumi glad blong save samting ya.
“Ol man we oli ded finis oli no moa save wan samting.”—Prija 9:5.
?Olsem wanem long ol dedman long fiuja?
?BAEBOL I TALEM WANEM?
God i promes se ol dedman we hem i tingbaot olgeta yet, bambae oli laef bakegen long wan niufala wol we stret fasin nomo i stap long hem. Ol man ya bambae oli slip long beregraon gogo God i mekem olgeta oli laef bakegen. Jehova i wantem tumas blong yusum paoa blong hem blong givim laef long olgeta. Yumi harem gud blong save se Jehova i promes blong wekemap ol dedman long fiuja.—Ol Wok 24:15.