Stadi 30
Tok i Folem Rod We i Gat Mining
1-3. ?Ol wod we i joenem tok oli mekem wanem long wan tok, mo olsem wanem blong mekem samting ya?
1 Wan tok we i gat mining, hemia tok we i isi blong ol man oli folem. Be, sipos tok i no folem wan stret plan no rod, tingting blong olgeta bambae i fasfas. I klia se hemia wan impoten samting blong tingbaot taem yu stap mekemrere wan tok; olsemia nao fasin ya blong toktok olsem “Ol wod we oli joenem ol tok” i stap long Pepa Blong Givim Advaes blong yu mas tingtinggud long hem.
2 Ol wod we oli joenem ol tok, i minim se oli joen long wan samting, ol defren haf blong tok oli joen tugeta blong mekem wan fultoktok we i stret. Samtaem yu save mekem samting ya sipos yu putum ol haf blong tok folem ol stret oda blong olgeta. Be long plante tok i gat ol haf we yu mas joenem olgeta wetem sam tok, i no naf nomo blong putum olgeta long stret oda. Long taem olsem hem i nidim wan samting olsem ‘brij’ blong pas long wan poen i go long narafala poen. Yusum sam tok no sam fultoktok blong joenem ol poen we yu jes talem wetem ol nyufala tingting, olsemia yu stap joenem ol tok taem yu jenisim tingting i go long narafala tingting. Hemia nao ol wod we oli joenem ol tok.
3 Eksampel, tok blong yu i gat ol defdefren haf long hem, olsem fastok, bodi blong tok mo lastok, oli no sem mak, nating se i olsem yu mas yusum sam wod blong joenem olgeta. Mo tu, yu mas joenem ol bigfala poen insaed long wan tok, antap moa sipos ol poen ya oli no folfolem olgeta. No samtaem sam fultoktok no sam haf nomo oli nidim ol wod blong joenem olgeta.
4-7. ?Olsem wanem blong yusum ol wod we oli joenem ol tok?
4 Yusum ol tok blong joenem ol narafala tok. Oltaem sipos yu yusumgud ol tok no ol fultoktok we oli stap joenem ol narafala tok, bambae yu save joenem ol tingting. Sam long ol tok ya olsem: mo tu, bakegen, antap moa, from samting ya, sem mak, taswe, olsemia nao, folem tingting ya, nao, biaen, be, defren nao, fastaem, bifo, mo ol narafala tok olsem. Ol tok olsem oli stap joenemgud ol fultoktok mo ol haf.
5 Be, plante taem yu mas ademap sam moa samting long fasin ya blong toktok bitim we yu jes joenem ol tok. Sipos wan tok no wan fultoktok nomo i no naf blong joenem ol poen, nao yu nidim wan samting blong pulum tingting blong ol man we oli stap lesin long wan poen i go long narafala poen. Maet hem i wan fultoktok no maet hem i wan narafala tingting we i blong pulum tingting i long narafala poen.
6 Wan rod blong joenem ol poen ya, sipos yu mekem eksampel blong poen we yu tokbaot finis i olsem fastok blong narafala poen we bambae i kam biaen. Plante taem yumi mekem samting ya taem yumi prij long ol haos wanwan.
7 Bakegen, yumi no mas joenem ol poen ya nomo we oli folfolem olgeta, samtaem yumi mas joenem ol poen we oli no folfolem olgeta. Eksampel, long wan tok, yumi mas joenem lastok wetem fastok. Maet long en blong tok blong yu, yu save talem bakegen wan tingting no wan pijatok we yu bin yusum long fastok blong yu we bambae i pulum tingting blong ol man no hem i blong soem olsem wanem pijatok no tingting ya i laenap wetem tok blong yu. Fasin ya blong talem bakegen sam haf blong pijatok no tingting i olsem wan rod blong joenem ol tok mo i gat mining.
8. ?Olsem wanem fasin blong jusum ol wod we i joenem ol tok i dipen long ol man we oli stap lesin?
8 I stret long ol man we oli lesin long yu. Sipos yu yu tingtinggud long ol man we oli lesin long yu, bambae yu luksave sipos yu mas yusum ol tok blong joenem ol narafala poen. Samting ya i no min se sam grup blong ol man we oli stap lesin oli no nidim ol tok blong joenem ol narafala poen, no gat. Be, long sam grup blong ol man we oli lesin, oli nidim blong mekem i klia moa, from we maet oli no savegud ol tingting we bambae yu joenem olgeta. Eksampel, ol Wetnes blong Jeova oli save joenem wan vas we i tokbaot en blong rabis fasin blong naoia wetem vas we i tokbaot Kingdom. Be sipos yu toktok long wan man we i ting se Kingdom i stap long tingting no long hat blong man, bambae hem i no save olsem wanem Kingdom mo en blong wol tufala i joen mo yu mas talem sam tingting blong mekem i klia moa long hem. Oltaem yumi mas jenisim tok blong yumi olsem taem yumi stap prij long ol haos wanwan.
9-13. ?Wanem ya, tok i folem rod we i gat mining, mo wanem tu rod blong folem blong mekem wan tok?
9 Wan narafala fasin blong toktok we kolosap i sem mak hemia “Tok i folem rod we i gat mining” mo hemia tu i stap long Pepa Blong Givim Advaes. Hem i wan impoten haf long toktok we i pulum man.
10 ?Wanem ya ‘tok i folem rod’? Long saed ya maet yumi save talem se hem i tingting we i stret, no hem i wan tingting we i gat gudfala risen long hem. Hem i mekem man i kasem save from hem i wan rod blong eksplenem ol defren haf blong wan samting. Tok i folem rod, hem i soem from wanem ol defren haf blong wan samting oli olsem mo from wanem oli joen wanples. Sipos tok i folem rod we i gat mining, hem i bildimap ol poen long tok blong hem long fasin we olgeta haf blong tok oli joengud. Tok i folem rod we i gat mining, maet ol poen blong tok ya oli folfolem olgeta long oda. Maet hem i stat long ol poen we oli no impoten tumas go kasem olgeta we oli impoten, no maet hem i folem taem, stat long taem bifo kam kasem naoia, maet i stat long trabol go kasem ansa blong trabol ya. Hemia sam long ol rod ya nomo be i gat ol narafala moa.
11 Sipos i gat kwestin blong ansa, i gat tu rod blong folem blong mekem tok ya. (1) Talemaot trutok stret long ol man we oli lesin, soemaot ol pruf long samting ya. (2) Soemaot ol gyaman samting we i stap, nao yu save livim trutok i stap klia. Nao trutok nomo i stap blong yu save yusum long tok blong yu.
12 Tu man blong givim tok tufala i no save yusum sem tingting blong givim ansa long wan kwestin. Wan gudfala eksampel hemia ol raeting blong fo Gospel we oli tokbaot sem samting long ol defren fasin. Fo disaepol blong Jisas oli raetem prapa store blong olgeta long wok blong Jisas. Wanwan long olgeta oli defren, be evriwan oli raet folem wan rod we i stret. Evri Gospel oli gat risen blong hem mo evriwan oli gud.
13 Long fasin ya blong tok man we i givim advaes i mas luksave plan blong yu mo traehad blong skelem rod we yu folem blong mekem tok blong yu mo sipos yu yu kasem mak we yu yu wantem givim long tok blong yu. Yu save givhan long hem mo long ol man we oli lesin, sipos yu mekem plan blong tok blong yu i klia, olsem fastok mo lastok blong yu.
14, 15. ?Soem from wanem fasin blong putum ol poen long tok folem stret oda i impoten tumas?
14 Tok i folem stret oda. Fastaem, taem yu mekemrere tok no plan blong tok blong yu, meksua se i no gat tok no tingting we yu talem long tok blong yu be yu no putum faondesen blong hem fastaem. Oltaem yu mas askem ol kwestin ya long yu wan se: ?Wanem samting i stret moa blong i kam biaen long poen ya? ?Naoia wanem kwestin i stret moa blong mi save askem? Taem yu makem kwestin ya finis, nao givim ansa long hem. Oltaem ol man we oli lesin long yu oli save talem se: “From ol samting we yu bin talem finis mi luk se poen ya i olsem.” Sipos yu no stanemap faondesen fastaem, plante taem ol man oli save ting se poen ya i no laenapgud. I gat wan samting i no stap.
15 Taem yu mekemrere tok blong yu, yu mas tingbaot ol haf we oli folfolem olgeta. Yu mas traehad blong luksave olsem wanem ol haf ya oli joen mo mekem olsem long plan blong yu. I olsem fasin blong bildim wan haos. Man i no save stanemap wol blong haos sipos hem i no wokem faondesen blong hem fastaem. Mo tu man i no save putum ol paep blong wora afta we hem i putum simen finis long wol blong haos. Taswe i mas sem mak taem yu mekem plan blong wan tok. Evri haf blong tok i mas givhan blong mekem wan ful tok, evriwan oli mas folem prapa oda blong olgeta, evriwan oli joejoenem olgeta mo mekemrere rod blong narafala haf we i kam biaen. Oltaem yu mas gat risen long rod ya we yu folem blong pruvum ol samting long tok blong yu.
16-20. ?Olsem wanem man i save se ol poen long tok blong hem oli laenapgud?
16 Yusum ol poen ya nomo we oli stret. Evri poen we yu yusum i mas joengud long tok. Sipos no, bambae i luk olsem we hem i no laenap, i no stret; bambae hem i wan haf we i no laenapgud, i min se hem i no sapotem no i joen wetem tok blong yu.
17 Be, man blong givim advaes bambae hem i no talem se wan samting i no laenap sipos yu yu joenemgud long tok blong yu. Maet yu yu gat risen blong yusum poen ya, mo sipos hem i laenap wetem stampa tok, poen ya i haf blong tok, mo i folem rod we i gat mining, man blong givim advaes long yu bambae i akseptem.
18 ?Taem yu mekemrere tok blong yu, olsem wanem blong makemaot kwiktaem ol poen we oli no laenap wetem tok blong yu? Plan blong tok we yu raetemdaon i save givhan long saed ya. Hem i givhan blong putum ol poen blong yu long oda. Traem yusum ol kad no samting we i sem mak we yu raetem ol haf blong tok long ol kad ya wanwan. Nao, putum ol kad ya long wan stret oda long rod we yu ting se i gud blong folem blong givim tok. Samting ya bambae i givhan long yu blong luksave wanem rod yu mas folem blong givim tok blong yu, be i no hemia nomo, hem i givhan tu long yu blong faenem ol samting we oli no laenap wetem stampa tok. Ol poen ya we oli no folem stret oda yu mas jenisim blong oli laenap, sipos ol poen ya oli impoten tumas long tok blong yu. Be, sipos no, yu mas tekemaot ol poen ya from we oli no laenap wetem stampa tok blong yu.
19 Olsemia nao yu save luk kwiktaem se stampa tok blong yu, we yu jusum from we yu tingbaot ol man we oli lesin long yu mo plan blong tok we yu tingrere long hem, oli soem sipos wan poen i laenap no no gat. Samtaem, wan poen nomo i save mekem poen we yu wantem talem i kam klia, i dipen long save blong ol man we oli lesin long yu. Be, long defren grup blong ol man no wetem defren stampa tok maet yu no nidim poen ya no maet hem i no save laenap nating.
20 Taem yumi tingbaot samting ya ?olsem wanem yumi save kavremap olgeta haf long wan tok? Yu no mas spolem fasin ya blong joenem ol tok mo folem rod we i gat mining from we yu wantem talem evri poen we oli stap long tok blong yu. I gud blong jusum wan rod blong mekem tok ya we bambae yu save yusum ol gudfala poen we man i save yusum, from ol tok we ol studen oli stap mekem hem i haf blong tijing long Tiokratik Skul. Yes, yu no save livim ol impoten poen we oli impoten tumas blong sapotem stampa tok blong yu.
21. ?From wanem i impoten se yu no mas livim ol impoten tingting?
21 Yu no mas livim ol impoten poen long tok. ?Olsem wanem blong save sipos wan tingting i impoten no no gat? Tingting i impoten, sipos yu no talem bambae ol man oli no save kasem save long samting we yu wantem talem long tok blong yu. Antap moa sipos tingting ya i stret, mo i folem rod we i gat mining. ?Eksampel, wanem samting bambae yu mekem sipos wan kampani blong wokem haos i wokem tu haos store blong yu mo i no mekem ol step blong hem? Sem mak, long wan tok we yu livim ol impoten poen long hem i no joengud mo i no folem rod we i gat mining. I gat wan samting we i mestem mo bambae tingting blong ol man i fasfas. Be samting ya i no save kamaot sipos ol wod oli joengud mo tok i folem rod we i gat mining.