Oli Sef From We Oli Lesin Long Woning
FASIN blong laef blong ol man Jiu we i stanap long tempol long Jerusalem, i lus. Be bifo long taem ya, Jisas Kraes i givim woning. Hem i no talem stret dei we samting ya bambae i hapen. Be hem i talem sam samting we oli mas kamaot bifo we taon ya i lus. Hem i talem long ol disaepol blong hem se oli mas stap wekap gud mo oli mas aot long ples we i denja.
Jisas i talem se: “Taem we yufala i luk ol soldia oli stap kam plante raonabaot long taon ya Jerusalem, blong oli blokem ol man oli stap insaed, yufala i mas save we bambae i no longtaem oli save spolemgud ples ya.” Mo hem i talem tu se: “Taem bambae yufala i luk rabis samting ya we i spolem evri samting, . . . i stap stanap long wan tabu ples, . . . olgeta we oli stap long Judia oli mas stat blong ronwe, oli mas go long ol hil.” Jisas i talem long ol disaepol blong hem se oli no mas gobak blong karem olting blong olgeta. Oli mas aot kwik blong sevem laef blong olgeta.—Luk 21:20, 21; Matiu 24:15, 16, NW.
Long yia 66 K.T., Cestius Gallus blong Rom i lidim ol ami blong hem oli go long Jerusalem. Hemia blong finisim wan rebelian we i gohed longtaem finis. Oli go insaed long taon ya mo oli raonem tempol. Ol man insaed oli ronron olbaot. Olgeta we oli stap wekap gud oli luksave se taon bambae i lus. ?Olsem wanem? ?I let tumas blong oli aot long taon ya? Nogat. Oli sek we Cestius Gallus i girap, i lidim ol ami blong hem oli aot long taon ya bakegen. Ol man Jiu we oli rebel oli biaen long ol ami ya blong traem kasem olgeta. !Naoia i stret taem blong ol man oli aot long Jerusalem mo olgeta ples long Judia!
Long nekis yia, Vespasian mo pikinini blong hem Titus tufala i lidim ol ami blong Rom oli kambak. Faet i kamaot long olgeta ples long kantri ya. Long stat blong yia 70 K.T., ol soldia blong Rom oli raonem Jerusalem, oli stanemap ol pos i goraon long taon ya blong blokem fulwan. Ol man oli no moa save aot. (Luk 19:43, 44) Ol defdefren grup oli stap faetfaetem olgeta, mo fulap blad i ron. Ol narafala man, ol soldia blong Rom oli kilim sam long olgeta i ded mo oli holem ol narawan, oli tekem olgeta oli go kalabus. Oli spolemgud taon ya mo tempol blong hem. Wan man Jiu we i raetem histri long faswan handred yia, nem blong hem Josephus, i talem se fulnamba blong ol man Jiu we oli ded mo oli kasem kil, i bitim wan milian. Mo i no gat wan man i bildim tempol bakegen.
Sipos ol Kristin oli no bin aot long Jerusalem long yia 70 K.T., bambae oli ded no oli kalabus wetem ol narafala man. Be ol man blong raetem histri oli talem se ol Kristin oli lesin long woning we i kamaot long God, oli aot long Jerusalem mo ol narafala ples long Judia, mo oli ronwe i go long ol hil long is saed blong Jodan Reva. Sam long olgeta oli mekem ples blong olgeta long Pela, long provins blong Perea. Oli aot long Judia mo oli no gobak samtaem. From we oli lesin long woning blong Jisas, oli sevem laef blong olgeta.
?Yu Yu Obei Long Ol Woning We Oli Tru?
Plante man oli no moa trastem ol woning from we oli harem plante stori long saed blong woning we i no kamtru. Nating se i olsem, yu save sevem laef blong yu sipos yu obei long woning.
Long Jaena, long yia 1975, woning i goaot se graon bambae i seksek bigwan. Ol haeman oli tekem aksen. Ol man oli folem oda ya se oli mas aot. Samting ya i sevem laef blong plante taosen man.
Long Filipin, long Eprel 1991, ol man we oli stap long ol vilej long saed blong bigfala hil ya Pinatubo, oli luk se i gat smok mo asis i stap kamaot long hil ya. Ale, grup we i stadi long ol volkeno mo etkwek long Filipin oli wajem gud hil ya blong tu manis. Biaen oli givim woning se volkeno ya bambae i bosta. Kwiktaem nomo, oli muvumaot samwe long 35,000 man i go long ol narafala ples. Nao long moning blong Jun 15, volkeno ya i bosta, mo i sakem plante milian tan blong ston mo asis faea i go long skae, we i folfoldaon long ol ples raonabaot. Plante taosen man we oli obei long woning, oli sevem laef blong olgeta.
Baebol i givim woning se en blong rabis fasin blong wol ya i klosap. Yumi stap finis long ol las dei. ?Olsem wanem? ?Taem en ya i stap kam klosap moa, yu yu stap lukaot gud? ?Yu yu stap tekem aksen blong aot long ples blong denja? ?Yu yu stap wok wetem tingting se taem i sot, blong talemaot woning long ol narafala?
[Tok blong pija long pej 20]
Taem volkeno ya Pinatubo i sakemaot asis faea, plante man we oli obei long woning oli no ded
[Tok blong pija long pej 21]
Taem ol ami oli spolem Jerusalem long yia 70 K.T., ol Kristin we oli obei long woning blong Jisas, oli no ded