Laef Afta Ded Ol Kwestin We i Stap
“?SIPOS wan man we i strong gud i ded, hem i save laef bakegen?” (Job 14:14) Job, wan man blong bifo, i talemaot tok ya plante handred yia i pas finis. Kam kasem naoia, ol man we oli kam long olgeta grup blong man oli tingtinggud long kwestin ya. Be ol ansa we oli givim oli plante tumas.
Ol man Gris blong bifo oli gat tingting se taem man i ded, bodi blong hem nomo i ded, be sol blong hem (hemia speret no devel blong hem) i stap laef yet. Oli talem se sol blong ol dedman i krosem reva Stikis blong go long wan bigfala kingdom we i stap aninit long wol, nem blong hem ol Hel. Nao sam jaj oli panisim samfala blong harem nogud long wan kalabus we stonwol blong hem i hae tumas, mo sam narafala oli go harem gud blong olwe long heven (we oli kolem ‘Elisean graon’). Sam laen blong man blong bifo oli bilif se sol blong man i jenis i kam sta long heven no i kam sam kaen sta we yumi save luk samtaem nomo, nem blong olgeta ol komet. Sam man blong bifo bakegen oli talem se sol blong ol dedman i gat laet long hem mo mun i pulum ol sol i go long hem. Ale evri manis, taem i gat fulmun, ol sol oli aot long wol i go long san.
Tede tu, ol man oli gat plante defren tingting long laef afta ded. Ol man Indu mo ol man blong Buda oli bilif se taem man i ded, sol blong hem i go laef long wan narafala bodi bakegen. Ol man Maslim oli talem se sol i laef yet afta ded mo long Lasdei, bambae sol i go long paradaes, no hem i go long hel. Bighaf blong ol Protestan oli bilif se sol i laef yet afta ded. Long tingting blong olgeta, sol blong ol dedman i save go harem gud long heven blong olwe, no sipos no, hem i save go trabol long faea blong hel. Ol Katolik tu oli bilif long samting ya, mo oli bilif tu long ol Limbos mo long pegatri (tufala ples blong klinim sol).
Long samfala kantri, ol bilif blong ol man long saed blong sol we i laef yet afta ded oli narakaen tumas. I olsem from we ol man ya oli yusum sam kastom blong ples blong olgeta mo oli joenem olgeta wetem sam tingting we oli talem se oli Kristin tingting. Wan eksampel: Taem wan man i ded long Wes-Afrika, ol Katolik mo ol Prostestan long ples ya oli gat wan kastom blong olgeta. Oli kavremap ol glas we ol man oli stap lukluk fes blong olgeta long hem. Oli stap mekem olsem from we oli no wantem we man i lukluk long glas mo i luk speret blong dedman ya. Fote dei biaen, famle mo ol fren blong hem oli mekem wan bigfala kakae blong makem dei we sol blong hem i go antap long heven. Biaen bakegen, plante taem long Krismis no long Nuyia, ol memba blong famle blong hem oli go long beregraon mo oli kafsaedem wan dring long gref blong hem. Mo tu, oli toktok long dedman blong kasem sapot blong hem mo oli givim sam nyus blong famle long hem.
Taswe, wan samting i klia nomo: Ol bigfala jyos long wol oli gat narnarafala tingting long ol samting we oli stap hapen biaen long ded. Be plante long olgeta oli agri long wan samting, se sol blong man i no save ded samtaem. Hemia stampa bilif blong olgeta skul ya. Ol tijing blong olgeta oli no agri long sam smol poen nomo.
Be naoia yumi save tingbaot ol strong kwestin ya: ?Tijing blong sol we i no save ded samtaem i kam wea? ?Hem i stap long Baebol, no no gat? ?Weswe ol narafala jyos we oli no Kristin oli yusum tijing ya tu? Ol kwestin ya oli impoten, from we nomata wanem jyos blong yu, be ded i wan samting we yu tu yu no save ronwe long hem. Taswe mifala i enkarajem yu blong tingtinggud long ol kwestin ya long nekis haf blong magasin ya.