Holemstrong Dei Blong Jeova Long Tingting Blong Yumi

“Dei blong Jeova i kolosap, long flat ples ya blong disisin.”​—⁠JOEL 3:⁠14.

1. ?From wanem tabu faet we Jeova bambae i mekem i defren long ol “tabu” faet we ol man oli mekem?

“YUFALA ol man, talemaot hemia, long medel blong ol nesen, ‘!Leftemap faet!’ ” (Joel 3:⁠9) ?Samting ya i minim wan tabu faet? Luklukbak long ol Krused, ol faet we skul i mekem, mo tu bigfala faet blong wol​—⁠we Krisendoma hem i joen plante long hem​—⁠maet yumi fraet taem yumi tingbaot wan “tabu” faet. Be, tabu faet we i stap long profet tok blong Joel i no wan faet we i kamaot long medel blong ol nesen. Hem i no wan faet we man i mekem long nem blong skul, we i blong winim graon no sam samting nomo, nogat. Hem i wan faet blong stret fasin. Hem i faet blong God blong finisim griri fasin, ol rao, ol kruked fasin, mo fasin we oli mekem ol man oli harem nogud long wol. Bambae hem i leftemap Jeova olsem stret man blong rul antap long olgeta samting we hem i wokem. Faet ya bambae i mekem rod blong Kingdom blong Kraes blong tekem ol man long Wan Taosen Yia rul blong hem long pis, we ol man bambae oli gat plante samting, mo oli glad olsem ol profet blong God oli talem.​—⁠Ol Sam 37:​9-11; Aesea 65:​17, 18; Revelesen 20:⁠6.

2, 3. (a) ?Wanem ya “dei blong Jeova” we profet tok blong Joel 3:14 i tokbaot? (b) ?From wanem i stret blong ol nesen oli kasem panis long dei ya?

² ?Be nao, wanem ya “dei blong Jeova” we Joel 3:14 i stap tokbaot? Jeova hem wan i talem se, “!Sore tumas from dei ya, from we dei blong Jeova i kolosap, mo bambae i kam olsem wan trabol we i kamaot long Hae God!” ?Olsem wanem hem i wan trabol? Biaen profet ya i eksplenem se: “Fulap fulap man oli hivap long flat ples blong disisin, from we dei blong Jeova i kolosap, long flat ples ya blong disisin.” (Joel 1:15; 3:14) Hemia dei we Jeova bambae i jajem fulap man we oli no wantem obei long God, oli sakemaot raet blong God blong rul long heven mo long wol. Hemia i disisin blong Jeova blong spolem fasin ya blong wol blong Setan we i holemtaet ol man longtaem tumas.​—⁠Jeremaea 17:​5-7; 25:​31-33.

³ Ol rabis fasin long wol ya bambae oli fesem disisin ya blong God. ?Be fasin blong wol ya i rili nogud? !Man we i lukluk ol samting ya i luksave nomo! Jisas i talem wan rul long Matyu 7:16 i se: “Bambae yufala i save makem olgeta, long frut we i kamaot long laef blong olgeta.” ?Olsem wanem long ol bigfala taon long wol, yu ting se oli ples blong ol drag, fasin blong brekem loa, fraet, rabis fasin long saed blong seks, mo fasin blong mekem ples i doti? Long plante ples we ol man oli kam fri, politik, kakae i sot, mo fasin blong man i kam pua oli spolem nyufala fasin fri ya. Bitim wan bilyan man oli no gat naf kakae. Mo tu, sik ya AIDS, we i stap kasem olgeta ples from drag mo rabis fasin long saed blong seks, i olsem wan bigfala blak klaod antap long wol. Speseli i stat long Faswan Bigfala Faet Blong Wol long 1914, evri haf blong laef blong ol man blong fulwol i kam nogud.​—⁠Lukluk 2 Timote 3:​1-5.

4. ?Wanem samting Jeova i talem long ol nesen?

⁴ Be, Jeova i stap hivimap wan kampani blong man we oli kamaot long olgeta nesen we oli stap glad blong kasem ol tok long saed blong ol rod blong God mo wokbaot long rod blong hem. Olgeta ya oli tanem naef blong faet blong olgeta i kam tul blong wokem garen, oli livim ol raf fasin blong wol ya. (Aesea 2:​2-4) !Yes, ol naef blong faet oli kam aean blong brekem graon long garen! ?Be olsem wanem, samting ya i narakaen long tok we Jeova i talem long Joel 3:​9, 10? Long ples ya yumi ridim se: “Yufala ol man, talemaot hemia, long medel blong ol nesen, ‘!Leftemap faet! !Wekemap ol strong man blong hem! !Talem long olgeta oli kam kolosap! !Talem long olgeta oli kam, olgeta man blong faet! Tekem hama mo kilim ol aean blong brekem graon long garen oli kam naef blong faet mo ol sisis blong katem han blong tri oli kam ol spia.’ ” Yes, long ples ya Jeova i stap tok long ol haeman long wol blong oli hivimap ol ami blong olgeta blong oli agensem hem long Amageden. !Be oli no save win! !Bambae olgeta oli lus olgeta!​—⁠Revelesen 16:⁠16.

5. ?Wanem samting bambae i kamaot taem Jisas i “katemaot olgeta ya we oli olsem frut blong rop ya we oli yusum blong mekem waen”?

⁵ Ol haeman blong rulum ol man oli wokem ol nogud tul blong faet, samting ya i no laenap wetem tingting blong Hae God Jeova​—⁠!be oli no save win from! Jeova i givim oda long Joel 3:13 se: “Tekem huknaef blong yu, from we ol kakae long garen oli raep finis. Yu kam, from we ples blong purumbut long frut blong rop ya i fulap finis. From we tang blong hem i fulap gud. Mo ol nogud fasin blong olgeta i kam bigwan tumas.” Ol tok ya oli sem mak nomo long tok blong Revelesen 14:​18-20, we i tokbaot wan enjel i go wetem wan huknaef blong “katemaot olgeta ya we oli olsem frut blong rop ya we oli yusum blong mekem waen. From we plante man oli stap olsem frut ya we i raep finis, i rere blong katem.” Enjel hem i tekem huknaef blong hem mo i katemaot ol nesen ya we oli nogud “nao i sakem olgeta oli go long wan ples we i olsem wan bigfala ples blong man i purumpurumbut long frut blong rop ya, blong mekem wora blong hem i kamaot. Ples ya i afsaed long taon, i ples kros blong God i kasem man.” !Olsem pija tok, blad i kamaot long ples ya i olsem wan bigfala wora we i ron mo i dip olsem we i kasem maot blong hos, mo i longfala olsem 300 kilomita! !Hemia wan bigfala samting blong fraet long ol nesen we oli no ona long Jeova!

Man Ples We Oli Obei Long Loa

6. ?Wanem tingting blong ol Wetnes blong Jeova long ol nesen mo ol man blong rul long olgeta?

⁶ ?Samting ya i min se ol Wetnes blong Jeova oli no stap ona long ol nesen mo ol man blong rul? !No gat! Olgeta oli no laekem ol rabis fasin we yumi save luk, mo oli stap givim woning long ol man long dei blong Jeova we i stap kam kwik, we bambae hem i mekem disisin blong hem blong jajem olgeta, i kamtru long olgeta. Long semtaem we oli stap mekem, oli stap obei long tok blong aposol Pol long Rom 13:1 we i talem se: “Olgeta man oli mas ona long gavman.” Olgeta Wetnes blong Jeova oli ona long ol haeman be oli no mekem wosip long olgeta. Olsem ol man ples we oli stap ona long loa, olgeta oli folem ol rul blong Baebol, oli wantem talem trutok, mo oli gat klin fasin mo oli tijim ol gudfala fasin long ol famle blong olgeta. Oli givhan long ol narafala man blong save olsem wanem blong olgeta tu oli save mekem olsemia. Oli gat pis wetem olgeta man, oli no stap joen long ol maj long rod no long ol grup blong politik we oli girap agens long gavman. Ol Wetnes blong Jeova oli wantem obei long ol loa blong ol haeman, taem oli stap wet long Hemia we i Hae Olgeta, Hae Masta Jeova, blong stanemap trufala pis mo stret gavman long wol ya bakegen.

Mekem Disisin Blong Hem i Kamtru

7, 8. (a) ?Long wanem fasin bambae ol nesen oli seksek mo tudak i kamdaon long olgeta? (b) ?Joel i pija blong hu tede? ?Defren long ol narafala man long wol, olsem wanem bambae oli kasem blesing?

⁷ Long pija tok, Jeova i gohed blong tokbaot disisin we bambae hem i mekem i kamtru, i se: “San mo mun tufala bambae i kam tudak. Mo ol sta bambae oli no moa saen. Mo Jeova bambae i singaot olsem laeon, mo noes ya i kamaot long Saeon. Mo voes blong hem bambae i kamaot long Jerusalem. Mo tru, heven mo wol bambae tufala i seksek. Be Jeova bambae i olsem wan sefples long ol man blong hem, wan strong haos we ol pikinini blong Isrel oli save haed long hem.” (Joel 3:​15, 16) !Laef blong ol man we i luk gud olsem we i saen, bambae hem i kam tudak mo ol haf blong fasin blong wol ya bambae oli seksek, bambae oli finis olgeta, i olsem we oli brokbrok evriwan from we graon i seksek bigfala!​—⁠Hagae 2:​20-22.

⁸ !Tingbaot gudfala promes ya se Jeova bambae i olsem wan sefples long ol man blong hem mo wan strong haos we oli save haed long hem! ?From wanem? From we olgeta oli wan kampani blong ol man​—⁠wan kampani blong ol man raon long olgeta ples long wol​—⁠we oli lesin long ol tok blong Jeova: “Bambae yufala i save we mi mi Jeova, mi God blong yufala.” (Joel 3:17) Nao from we nem blong Joel i min se “Jeova i God,” i stret nomo se hem i pija blong ol Wetnes blong Jeova we tabu speret i makemaot olgeta long taem blong yumi, we oli stap gohed strong blong talemaot hae rul blong Jeova. (Lukluk Malakae 1:11.) Taem yumi luk ol fastok blong profet Joel, bambae yumi faenemaot se hem i stap talem klia ol wok we ol man blong God oli stap mekem tede.

Ol Lokis

9, 10. (a) ?Wanem trabol Joel i bin tokbaot? (b) ?Olsem wanem Revelesen i talem bakegen ol profet tok blong Joel long saed blong wan trabol, mo ol samting ya bambae oli mekem wanem long Krisendom?

⁹ Lesin naoia long “tok blong Jeova we i kamtru long Joel”: “Yufala ol olfala man, yufala i harem hemia, mo yufala i lesingud, yufala we i stap long ples ya. ?Samting ya i kamaot long taem blong yufala, no long taem blong bubu blong yufala? Long saed ya yufala i mas talemaot long ol pikinini boe blong yufala, mo olgeta oli save talemaot long ol pikinini boe blong olgeta tu, mo olgeta ya oli save talemaot long ol pikinini boe blong olgeta we oli kamaot biaen long olgeta. Wanem samting we i stap we katapila i no kakae, lokis i kakae. Mo wanem samting we lokis i no kakae i stap yet, lokis we i no gat wing we i wokbaot long graon i kakae. Mo wanem samting we lokis we i no gat wing i no kakae, kakros i kakae.”​—⁠Joel 1:​1-4.

¹⁰ Hemia wan samting we i narakaen, wan samting we ol man oli save tingbaot blong longtaem. Plante plante bebet, speseli lokis, oli spolem graon ya. ?Samting ya i minim wanem? Revelesen 9:​1-12 tu i stap tokbaot fulap lokis we Jeova i sanem. “Oli gat [king, NW] blong olgeta, . . . hemia enjel ya we i bos blong bigfala hol ya we i godaon we i godaon olgeta,” hem i lidim ol lokis ya. King ya hem i Jisas Kraes. Ol nem blong hem olsem Abadon (long Hibru) mo Apolion (Grik) i min se “Spolem ol samting” mo “Man blong spolem evri samting.” Ol lokis ya oli pija blong smolhaf blong ol Kristin we tabu speret i makemaot we oli stap yet long wol, mo long dei blong Masta blong yumi, oli go blong spolem ol ples blong Krisendom taem oli taltalemaot klia ol gyaman skul mo oli talemaot kros blong Jeova long olgeta.

11. ?Wanem i kamaot biaen long ol lokis tede, mo oli stap talemaot jajmen long hu?

¹¹ Olsem Revelesen 9:​13-21 i talem, biaen long trabol we lokis i mekem, nao wan bigfala hif blong soldia i kamaot. !Samting ya i tru tede, smol namba blong ol Kristin we tabu speret i makemaot olgeta wetem bitim fo milyan “narafala sipsip” oli olsem bigfala hif blong soldia! !Ol man oli no save blokem olgeta! (Jon 10:16) Olgeta oli joen blong talemaot ol jajmen blong Jeova we i stikim ol skul long Krisendom we oli stap wosip long ol gyaman god, mo olgeta we oli “no tanem tingting blong olgeta tu from ol sin blong olgeta, we oli kilim man i ded mo oli wokem ol bisnes blong posen mo kleva, mo oli ronem woman, mo oli stil.” Ol lida blong jyos​—⁠blong Katolik mo Protestan​—⁠we oli stap sapotem ol faet we oli kilim plante man i ded long laswan handred yia, mo tu ol pris mo ol man blong prij long televisin we oli stap mekem rabis fasin long saed blong seks, oli haf blong olgeta ya we mesej blong jajmen i go long olgeta.

12. ?From wanem ol lida blong Krisendom oli mas kasem mesej blong jajmen, mo bambae i no longtaem wanem samting i hapen long olgeta, wetem olgeta memba blong Bigfala Babilon?

¹² Long olgeta “man ya” we oli gat ol spesel klos we oli stap mekem ol nogud fasin olsemia, tok blong Jeova i go long olgeta se: “Yufala i wekap, yufala ol drong man, mo yufala i krae. Mo singaot bigwan, yufala ya we i stap dring waen, hemia swit waen, from we naoia i no moa stap long maot blong yufala.” (Joel 1:⁠5) Long taem blong yumi, ol skul blong Krisendom oli jenisim ol klin rul blong God long Baebol wetem ol rabis fasin. !Ol fasin ya oli swit long ol gyaman skul mo ol man we oli stap go long ol gyaman skul blong oli karem ol fasin blong wol! !Be oli stap kasem nogud frut blong hem long saed blong speret mo oli stap kasem sik long bodi blong olgeta tu! I no longtaem, olsem Revelesen 17:​16, 17 i tokbaot, bambae God i putum long tingting blong ol haeman blong politik blong oli mekem olsem “we hem i wantem,” bambae oli agensem strong ol gyaman skul long wol, hemia Bigfala Babilon, mo bambae oli spolem hem wantaem. Long taem ya nomo, taem hem i luk disisin we Jeova i mekem agens long hem, bambae hem i “wekap” from fasin drong blong hem.

“Kampani Blong Man We Oli Plante Mo Oli Strong”

13. ?Olsem wanem ol lokis oli “kampani blong man we oli plante mo oli strong” long lukluk blong ol man long Krisendom?

¹³ Profet blong Jeova i gohed blong tokbaot ol lokis olsem “kampani blong man we oli plante mo oli strong,” mo i tru se Bigfala Babilon i stap lukluk olgeta olsemia. (Joel 2:⁠2) Eksampel, ol lida blong Krisendom oli sapraes from we ol skul blong olgeta oli no pulum ol man we oli stap wosip long Buda long Japan. Be tede, bitim 160,000 Wetnes blong Jeova long Japan oli stap kavremap kantri ya mo oli stap mekem ol Baebol stadi long bitim 200,000 haos blong ol man. Long Itali i gat 180,000 Wetnes blong Jeova, naoia ol man oli luk we oli plante olsem oli kam namba tu long skul Katolik. Wan haeman blong Roman Katolik jyos long Itali i talem se ol Wetnes blong Jeova oli stap tekemaot samwe long ‘10,000 man Katolik’ long skul blong olgeta long evri yia.b Ol Wetnes oli glad blong welkamem olgeta man olsem.​—⁠Aesea 60:​8, 22.

14, 15. ?Olsem wanem Joel i tokbaot ol lokis, mo olsem wanem samting ya i kamtru tede?

¹⁴ Blong tokbaot ol lokis, hemia ol Wetnes we tabu speret i makemaot olgeta, Joel 2:​7-9 i talem se: “Oli ron olsem ol man we oli gat paoa. Oli klaem i go antap long ol stonwol olsem ol man blong faet. Mo evriwan oli stap go long prapa rod blong olgeta, mo oli no jenisim rod blong olgeta. Mo oli no stap puspusum olgeta. Oli stap gohed nomo olsem wan strong man. Mo sipos sam oli foldaon long medel blong ol ara, ol narafala oli no stop long resis blong olgeta. Oli stap ron i go insaed long ol taon. Long stonwol oli stap ron i go long hem. Oli stap go antap long ol haos. Oli stap pastru long ol windo olsem man blong stil.”

¹⁵ !Hemia wan klia pija blong ami blong ol Kristin we tabu speret i makemaot olgeta we oli olsem ol “lokis,” mo naoia bitim fo milyan narafala sipsip oli joen wetem olgeta! Ol “stonwol,” hemia fasin blong ol narafala skul blong agensem olgeta, oli no save stopem olgeta. Oli no fraet, oli ‘gohed long rod ya we oli folem finis’ blong prij mo mekem ol narafala Kristin wok. (Lukluk Filipae 3:16.) Oli no lego bilif blong olgeta, oli rere blong ded from bilif blong olgeta, olsem plante taosen Wetnes we “oli foldaon long medel blong ol ara” from we oli no wantem wosip long Katolik man ya Hitler long Jemani long taem blong Nasi gavman. Ol lokis oli mekem gudfala wok blong prij long “ol taon” blong Krisendom, oli klaem antap long ol samting we oli stap traem blokem olgeta, mo oli gotru long olgeta ples, olsem we wan man blong stil i go insaed long haos. Oli stap seremaot plante milyan buk we oli tokbaot Baebol long wok blong olgeta long ol haos wanwan. Hemia i wil blong Jeova blong oli mekem wok blong prij olsem, mo i no gat paoa long heven mo long wol we i save stopem wok ya.​—⁠Aesea 55:⁠11.

“Tabu Speret i Kam Fulap Long Olgeta”

16, 17. (a) ?Wetaem ol tok blong Joel 2:​28, 29 oli kamtru bigwan? (b) ?Wanem profet tok blong Joel we oli no kamtru fulwan long faswan handred yia?

¹⁶ Jeova i talem long ol Wetnes blong hem se: “Bambae yufala i mas save se mi mi stap long medel blong Isrel [long saed blong speret], mo mi ya mi Jeova, God blong yufala mo i no gat narafala God.” (Joel 2:27) Ol man blong Jeova oli luksave samting ya taem Hem i mekem ol tok blong hem long Joel 2:​28, 29 i kamtru i se: “Bambae i mas hapen olsemia: Bambae mi mi kafsaedem speret blong mi long olkaen man, mo ol boe mo gel blong yufala bambae oli talemaot profet tok.” Samting ya i kamtru long Pentekos long yia 33 K.T., taem ol disaepol blong Jisas oli hivap mo God i makemaot olgeta “mo olgeta evriwan, Tabu Speret i kam fulap long olgeta.” Ale oli stap prij long paoa blong tabu speret, mo long dei ya nomo, “samting olsem tri taosen man oli joen long kampani blong olgeta.”​—⁠Ol Wok 2:​4, 16, 17, 41.

¹⁷ Long taem ya we oli stap glad long hem, Pita i talem tok ya we i stap long Joel 2:​30-32 i se: “Bambae mi mi givim ol saen long skae mo long wol ya, bambae i gat blad mo faea mo bigfala smok. San bambae i kam tudak, mo mun bambae i kam olsem blad, bifo we bigfala dei blong Jeova i kam, we i mekem ol man oli fraet. Mo tru, olgeta we oli singaot long nem blong Jeova bambae oli stap sef.” Ol tok ya oli kamtru long fasin we i smol, taem ol man oli spolem Jerusalem long yia 70 K.T.

18. ?Wetaem tok blong Joel 2:​28, 29 i stat blong kamtru fulwan?

¹⁸ I gat narafala mining blong tok profet long Joel 2:​28-32. Yes, profet tok ya i stap kamaot stat long Septemba 1919. Long taem ya i gat wan asembli blong ol man blong Jeova long Seda Poen, Ohaeo, Amerika, oli no save fogetem taem ya. I klia nomo se speret blong God i stap long taem ya, mo ol man blong hem we hem i makemaot olgeta, tingting blong olgeta i kam strong blong wetnes long olgeta ples long wol, mo samting ya i stap gohed kam kasem taem blong yumi. !I gat ol bigfala frut we oli kamaot from! I gat bitim 7,000 i stap long asembli ya long Seda Poen, be namba ya i stap gru kasem 10,650,158 we oli kam long Memoriol blong ded blong Jisas long Maj 30, 1991. Long olgeta ya, i gat 8,850 Kristin man we oli talem se tabu speret i makemaot olgeta. !Olgeta ya oli glad tumas blong luk frut we i kamaot long olgeta ples long wol from bigfala paoa blong Jeova!​—⁠Aesea 40:​29, 31.

19. ?From we dei blong Jeova i kolosap, wanem tingting yumi wanwan i mas gat?

¹⁹ Long fyuja i gat “bigfala dei blong Jeova i kam, we i mekem ol man oli fraet” we bambae i spolemgud ol samting we Setan i stampa blong olgeta. (Joel 2:31) Be yumi glad, se “sipos man i singaot mi long nem blong mi, we mi mi [Jeova, NW], mi bambae mi sevem hem.” (Ol Wok 2:21) ?Olsem wanem? Aposol Pita i talem long yumi se “Dei blong Masta blong yumi [Jeova, NW] bambae i kam, olsem we man blong stil i kam,” mo i gohed blong talem se: “From we skae mo wol wetem olgeta samting ya bambae oli lus olsem, yufala i mas lukluk gud long laef blong yufala. Yufala i mas tabu, yufala i man blong God, mo yufala i mas mekem ol fasin we hem i wantem. Yufala i mas stap wet long Dei blong God bambae i kamtru.” Yumi mas tingbaot se dei blong Jeova i kolosap, taswe bambae yumi glad from we yumi save luk promes blong Jeova i kamtru long saed blong “nyufala skae mo nyufala wol.”​—⁠2 Pita 3:​10-13.

[Ol futnot]

?Yu Save Eksplenem?

◻ ?Wanem ya “dei blong Jeova”?

◻ ?Olsem wanem bambae Jisas i “katemaot olgeta ya we oli olsem frut blong rop ya we oli yusum blong mekem waen,” mo from wanem?

◻ ?Olsem wanem ol lokis oli mekem trabol long Krisendom stat long 1919?

◻ ?Olsem wanem speret blong Jeova i kam long ol man blong hem long 33 K.T., mo bakegen long 1919?