Jajmen i Kamaot Long Flatples Blong Disisen

“Olgeta nesen . . . oli mas kam long flatples blong Jeosafat, from we long ples ya bambae mi mi sidaon blong jajem olgeta nesen.”​—JOEL 3:​12.

1. ?From wanem Joel i luk fulap fulap man long “flatples blong disisen”?

FULAP fulap man oli hivap long flatples blong disisen”! Yumi ridim tok ya long Joel 3:14. ?From wanem fulap man oli kam wanples? Joel i ansa se: “Dei blong Jeova i kolosap.” Hemia bigfala dei we Jeova bambae i win long hem. Hemia dei blong jajem olgeta man we oli sakemaot Kingdom we God i stanemap tru long Jisas Kraes. Long taem ya nao, ol “fo enjel” blong Revelesen japta 7 bambae oli lego “ol fo win long wol” we oli bin stap blokem, mo samting ya bambae i mekem ‘bigfala trabol tumas i kamaot, we neva man i luk olsem bifo, i stat long taem we God i wokem wol, i kam kasem tede, mo bambae i no moa gat sam bigfala trabol olsem bakegen samtaem.’​—Revelesen 7:1; Matyu 24:21.

2. (a) ?From wanem i stret we ples blong mekem ol jajmen blong Jeova oli kamtru, i karem nem ya se “flatples blong Jeosafat”? (b) ?Wanem samting we Jeosafat i mekem we i stret nomo, taem ol ami oli kam faet agensem hem?

² Long Joel 3:​12, nem blong ples we jajmen ya bambae i kamaot long hem, hemia “flatples blong Jeosafat.” Nem ya i stret nomo from we, long wan trabol taem long histri blong Juda, Jeova i bin mekem jajmen blong hem i kamaot long ples ya blong givhan long gudfala King ya Jeosafat, we nem blong hem i minim “Jeova i Jaj.” Sipos yumi tingbaot wanem i bin hapen long taem ya, bambae samting ya i halpem yumi blong save moa long wanem we bambae i mas hapen long taem blong yumi. Store ya i stap long 2 Kronikel japta 20. Long vas 1 yumi ridim se, “ol man blong Moab mo ol man blong Amon, wetem sam man Amonim, oli kam faet agensem Jeosafat.” ?Jeosafat i mekem wanem? Hem i mekem wan samting we olgeta man blong Jeova we oli gat strong bilif, oli stap mekem taem oli fesem trabol. Hem i lukluk i go long Jeova blong i lidim hem, hem i prea strong se: “O God blong mifala, yu mas jajem olgeta. From we, mifala i no gat paoa nating long fored blong bigfala hif man ya we i stap kam agensem mifala. Mo mifala i no save wanem we bambae mifala i mas mekem. Ae blong mifala i lukluk i go long yu nomo.”​—2 Kronikel 20:12.

Jeova i Ansarem Prea

3. ?Jeova i talem long Juda blong mekem wanem taem ol nesen raonabaot oli wantem faet agensem olgeta?

³ Taem “olgeta man blong Juda oli stap stanap fored blong Jeova, wetem ol smol pikinini blong olgeta, ol waef blong olgeta mo ol pikinini boe blong olgeta,” Jeova i ansa long Jeosafat. (2 Kronikel 20:13) Olsem we Jeova i yusum ‘slef we i stret mo waes’ tede, bigfala Man ya blong Harem ol Prea i givim paoa long profet Jasel we i wan man Livae, blong i talemaot ansa blong Hem long olgeta we oli hivap i stap wanples long taem bifo. (Matyu 24:45) Yumi ridim se: “Hemia tok we Jeova i talem long yufala: ‘Yufala i no mas seksek mo yufala i no mas fraet long ol man ya we oli fulap tumas, from we faet ya i no blong yu, be hem i faet blong God . . . Bambae yufala i no nid blong faet long taem ya. Yufala i tekem ples blong yufala, stanap stret, mo luk we Jeova bambae i sevem yufala. . . . Yufala i no mas seksek mo yufala i no mas fraet. Tumora yufala i mas goaot agensem olgeta, mo Jeova bambae i stap wetem yufala.’ ”​—2 Kronikel 20:15-​17.

4. ?Long wanem fasin, Jeova i wantem se ol man blong hem oli wok, i bitim we oli sidaon nomo mo wet, taem ol enemi oli girap agensem olgeta?

⁴ Jeova i no minim se King Jeosafat mo ol man blong hem bambae oli jes sidaon olsem nomo, mo wet blong Jeova i mekem wan merikel blong sevem olgeta. No gat. Oli mas goaot mo fesem ol enemi blong olgeta long faet ya. Ale, king wetem ‘olgeta man long Juda, ol smol pikinini blong olgeta tu, wetem ol waef mo boe blong olgeta,’ oli soemaot strongfala bilif mo fasin obei taem oli girap eli long moning mo maj i go blong mitim ol man blong faet ya we oli fulap tumas. Long rod, king i stap givim ol tiokratik advaes long olgeta mo i stap leftemap tingting blong olgeta, i se: “Yufala i mas bilif long Jeova, God blong yufala, blong bambae yufala i save stap laef longtaem. Yufala i mas bilif long ol profet blong hem nao bambae yufala i save win.” (2 Kronikel 20:20) !Bilif long Jeova! !Bilif long ol profet blong hem! Long rod ya nomo bambae oli save win. !Long sem fasin, tede, taem yumi gohed strong long wok blong Jeova, yumi no mas gat tingting we i hafhaf. !Bambae Jeova i mekem bilif blong yumi i win fulwan!

5. ?Olsem wanem ol Wetnes blong Jeova tede oli wok strong blong presem Jeova?

⁵ Olsem ol man Juda long taem blong Jeosafat, yumi mas “presem Jeova, from we lav mo kaengud fasin blong hem oli stap gogo i no save finis.” ?Olsem wanem yumi save presem hem olsemia? !Hemia taem yumi strong long wok blong talemaot Kingdom! Ol man Juda ya oli “stat wokbaot we oli singaot from glad mo oli presem God.” Long sem fasin, yumi mas joenem wok i go wetem bilif blong yumi. (2 Kronikel 20:21, 22) !Yes, long taem ya we Jeova i stap mekemrere blong agensem ol enemi blong hem, yumi mas soemaot trufala bilif olsem ol man Juda ya! Nating we maet i luk olsem se rod i longfala tumas, yumi mas gat strong tingting blong stanap strong, mo stap wok oltaem wetem bilif. Hemia wanem we ol man blong Jeova oli stap mekem tede, long ol ples blong wol we laef i strong. Long sam kantri we ol man oli stap mekem trabol long ol man blong God, mo we i gat raf fasin, sot long kakae, mo hadtaem blong kasem mane, ol man blong God oli stap kasem gudfala frut, olsem 1998 Yearbook of Jehovah’s Witnesses i soemaot.

Jeova i Sevem Ol Man Blong Hem

6. ?Olsem wanem strongfala bilif i halpem yumi blong stap tru, tede?

⁶ Ol nesen raonabaot long Juda we oli no wosip long trufala God, oli traem finisim ol man blong God fulwan. Be taem oli mekem olsem, ol man blong Jeova oli soemaot gudfala eksampel long saed blong bilif, oli singsing blong presem Jeova. Yumi save soemaot semkaen bilif long taem blong yumi. Sipos laef blong yumi i bisi long ol wok blong presem Jeova, bambae yumi mekem klos blong faet blong yumi long saed blong speret i kam strong moa, nao bambae ol trik blong Setan oli no save winim yumi. (Efesas 6:​11) Strongfala bilif bambae i daonem ol traem we oli save pulum yumi blong folem ol nogud pleplei, ronem ol sas samting, mo folem fasin blong no kea, ol fasin we oli kam antap bigwan long wol ya we i stap lus. Bilif ya we i strong bambae i givhan long yumi blong wok wetem fasin blong stap tru oltaem long ‘slef we i stret mo waes,’ taem yumi gohed blong tekem ol kakae long saed blong speret we yumi kasem “long stret taem blong hem.”​—Matyu 24:45.

7. ?Ol Wetnes blong Jeova oli mekem wanem taem ol man oli agensem olgeta long plante defren fasin?

⁷ Bilif blong yumi we i kamaot long Baebol bambae i mekem yumi stanap strong, taem ol man we oli no laekem yumi oli wok wanples blong agensem yumi. Ol man ya oli gat sem tingting nomo olsem ‘rabis slef’ ya we Matyu 24:48-​51 i tokbaot. Profet tok ya i kamtru fulwan, from ol man blong apostasia long plante kantri tede, we oli stap talemaot ol gyaman tok mo waes blong man. Sam long olgeta ya oli wok wetem ol man we oli gat haeples long gavman blong mekem ol rabis plan long fasin haed. Long taem we i stret blong tekem aksin agensem olgeta ya, ol Wetnes blong Jeova oli mekem olsem. Folem tok blong Filipae 1:​7, oli ‘yusum loa blong blokem ol enemi blong Kraes mo givim wetnes long saed blong gud nyus.’ Wan eksampel, long Septemba 26, 1996, long Strasbeg, naen jaj blong Kot blong Yurop long saed blong Raet blong Man, oli jajem wan bisnes we i kamaot long Gris. Wetem wan tingting nomo, olgeta ya oli agri se “ol Wetnes blong Jeova oli wan ‘skul we plante man oli save long hem finis,’ ” mo i stret nomo we oli fri blong tingting, tekem disisen, mo bilif olsem oli wantem, mo oli gat raet blong talemaot bilif blong olgeta. Long saed blong ol man blong apostasi, jajmen blong God i klia se: “Fasin blong man olsem i soemaot we olfala tok ya i tru we i talem se: ‘Dog i save gobak blong kakae traot blong hem bakegen.’ Mo i soemaot tok ya tu we i talem se ‘Sipos pig i swim gud, be biaen, bambae hem i save go slip bakegen long sofmad.’ ”​—2 Pita 2:​22.

8. Long taem blong Jeosafat, ?olsem wanem Jeova i mekem jajmen blong hem i kamaot agensem ol enemi blong ol man blong Hem?

⁸ Long taem blong Jeosafat, Jeova i mekem jajmen blong hem i kamaot agensem olgeta we oli wantem spolem ol man blong Hem. Yumi ridim se: “Jeova i putum sam man oli stap haed blong kasem ol man Amon, Moab mo olgeta long ol hil blong Seir we oli stap kam insaed long Juda, mo oli kilkilim olgeta. Mo ol man blong Amon mo Moab oli girap agensem ol man we oli stap long ol hil blong Seir, mo oli spolemgud mo finisim olgeta evriwan. Mo taem oli finis wetem ol man long Seir, oli givgivhan long olgeta bakegen blong kilkilim olgeta wanwan i ded.” (2 Kronikel 20:22, 23) Ol man Juda oli putum nem blong ples ya se Flatples blong Beraka, from we Beraka i minim “Blesing.” Long taem blong yumi tu, jajmen we Jeova bambae i mekem i kamaot long ol enemi blong hem bambae i karem bigfala blesing i kam long ol man blong hem.

9, 10. ?Hu olgeta we oli soemaot se oli stret nomo blong kasem ol strongfala jajmen blong Jeova?

⁹ Maet yumi askem se, ?Hu tede bambae oli kasem strongfala jajmen blong Jeova? Blong kasem ansa blong kwestin ya, yumi mas lukluk bakegen long profet tok blong Joel. Joel 3:3 i tokbaot ol enemi blong ol man blong God we “bambae oli givim pikinini boe blong salem bodi blong hem olsem wan man blong slip olbaot, mo bambae oli salem pikinini gel blong kasem waen.” Yes, oli ting nating long ol man blong God, oli ting se ol pikinini blong olgeta oli naf nomo blong mekem pikinini blong rod mo oli sem mak nomo long praes blong wan botel waen. Bambae oli mas kasem panis from samting ya.

¹⁰ Olgeta we oli mekem olsem woman blong rod long saed blong speret, oli mas kasem jajmen tu. (Revelesen 17:​3-6) Mo olgeta we oli gat fol moa, hemia ol man we oli stap pulum ol politik paoa blong mekem trabol long ol Wetnes blong Jeova mo blokem wok blong olgeta. Hemia wanem we sam lida blong skul long Is Yurop oli bin mekem wetem sam narafala stronghed man, i no longtaem i pas. Jeova i soemaot se hem i gat strong tingting blong girap agensem ol man ya we oli mekem ol rabis wok olsem.​—Joel 3:​4-8.

“!Leftemap Faet!”

11. ?Olsem wanem Jeova i singaot ol enemi blong hem blong faet?

¹¹ Nekis samting, Jeova i singaot ol man blong hem blong talemaot wan tok blong pulum ol nesen ya blong faet, i se: “!Leftemap faet! !Wekemap ol strong man! !Letem olgeta oli kam kolosap! !Letem olgeta oli kam, olgeta man blong faet!” (Joel 3:9) Tok ya i talemaot wan faet we i narakaen​—hem i wan faet we i stret olgeta. Ol Wetnes we oli stap tru long Jeova oli dipen fulwan long ol tul blong faet long saed blong speret taem oli ansa long ol gyaman waes tok blong ol man, yes, oli yusum trutok blong blokem mo daonem ol gyaman tok ya. (2 Korin 10:4; Efesas 6:​17) I no longtaem, God bambae i leftemap “faet blong bigfala dei blong God ya we i gat Olgeta Paoa.” (Revelesen 16:14) Long faet ya, ol man we oli stap agensem hae rul blong God bambae oli lus. Ol man blong hem long wol ya bambae oli no joen long faet ya. Long saed blong bodi mo long saed blong speret tu, olgeta ya oli ‘tanem naef blong faet blong olgeta i kam tul blong wokem garen’ finis. (Aesea 2:4) Be, Jeova i sakem wan tok long ol nesen we oli agensem hem blong oli mekem wan samting we i defren long samting we ol man blong hem oli mekem, i se: “Tekem hama mo kilim ol aean blong brekem graon long garen oli kam naef blong faet, mo ol sisis blong katem han blong tri oli kam ol spia.” (Joel 3:​10) Hem i singaot olgeta blong oli yusum evri mesin blong faet we oli gat mo olgeta tul blong faet we oli wokem long waes blong olgeta. !Be, oli no save win, from we faet ya i blong Jeova, mo hem nomo bambae i win!

12, 13. (a) Nating se Kol Wo i finis, ?olsem wanem plante nesen oli soemaot yet se oli wantem faet? (b) ?Ol nesen oli no rere blong fesem wanem samting?

¹² Jes afta long yia 1990, ol nesen oli talemaot se Kol Wob i finis. From samting ya, ?mak we Yunaeted Nesen i putum blong traem kasem pis mo seftaem hem i kamtru finis? !No gat! Ol faet we oli stap gohed yet long Burundi, Demokratik Ripablik blong Kongo, Irak, Laeberia, Ruwanda, Somalia, mo kantri we fastaem nem blong hem Yugoslavia, ?oli soemaot wanem long yumi? Olsem tok blong Jeremaea 6:​14 i talem, oli stap singaot se: “ ‘!I gat pis! !I gat pis!’ be i no gat pis nating.”

¹³ Nating se long samfala ples ol bigfala faet oli finis, be ol wanwan kantri we oli memba blong Yunaeted Nesen oli stap traehad yet blong winim narafala long wok blong mekem ol nyufala tul blong faet we oli moagud. Sam long ol nesen ya oli gat plante bigfala hif blong nyuklia bom oli stap yet. Sam narafala oli wokem ol spesel tul blong faet we oli sakem posen mo ol rabis jem blong kilim fulap man i ded wantaem. Taem ol nesen ya oli stap kam kasem mak we i olsem ples ya Amageden long Baebol, Jeova i stap sakem tok ya long olgeta se: “Man we i no gat paoa, i gud hem i talem se: ‘Mi mi wan strong man.’ Yufala olgeta nesen raonabaot, yufala i givhan mo yufala i kam, yufala i kam wanples.” Nao Joel i katem tok ya wetem ol prapa tok blong hem i se: “O Jeova, karem ol strong man blong yu oli kamdaon long ples ya.”​—Joel 3:​10, 11.

Jeova i Lukaotgud Long Olgeta We Oli Blong Hem

14. ?Hu ya ol strongfala man blong Jeova?

¹⁴ ?Hu ya ol strong man blong Jeova? Samwe long 280 taem long Baebol, trufala God i karem nem ya se “Jeova blong ol ami.” (2 King 3:​14) Ol ami ya, hemia kampani blong ol enjel long heven we oli stanap rere blong mekem wanem we Jeova i wantem olgeta blong mekem. Taem ol man Siria oli traem holemtaet Elaesa, Jeova i openem ae blong slef blong Elaesa, blong hem i save luk from wanem ol man ya oli no save win: “!Luk! raonabaot long Elaesa, olgeta hil olbaot oli fulap wetem ol hos mo ol kat blong faet we faea i laet long olgeta.” (2 King 6:​17) Jisas i talem se hem i save askem Papa blong hem blong “sanem ol enjel, we oli moa long twelef ami.” (Matyu 26:53) Revelesen i tokbaot taem we Jisas bambae i mekem jajmen i kamaot long Amageden, i se: “Ol kampani blong ol soldia blong heven oli biaen long hem, oli stap sidaon long ol waet hos, mo klos blong olgeta, we oli werem, oli wokem long gudfala kaliko we i waet mo i klin gud. Man ya i gat wan naef blong faet we i sap gud i stap long maot blong hem, we bambae hem i yusum blong kilim ol man blong evri kantri. Hem bambae i bos long ol man ya mo saen blong paoa blong hem, wokingstik we oli wokem long aean. Bambae hem i mekem i strong long olgeta, olsem we man i purumpurumbut long frut ya blong rop blong mekem wora blong hem i kamaot blong mekem waen. Fasin ya i olsem we God ya we i gat olgeta paoa, hem i kros tumas, nao kros blong hem i kasem olgeta.” (Revelesen 19:14, 15) Revelesen i kolem ples ya blong purumbut long frut blong mekem waen, se hem i “bigfala ples we kros blong God i kasem man.”​—Revelesen 14:17-​20.

15. ?Olsem wanem Joel i tokbaot faet blong Jeova agensem ol nesen?

¹⁵ Be, ?olsem wanem Jeova i ansarem tok blong Joel we i askem ol prapa strong man blong God blong kamdaon? God i yusum wan pijatok blong ansa, i se: “Ol nesen oli mas girap mo kam long flatples blong Jeosafat, from we bambae mi mi sidaon long ples ya blong jajem olgeta nesen raonabaot. Tekem huknaef blong yu, from we ol kakae long garen oli rere finis. Yu kamdaon, from we ples blong purumbut long frut blong rop ya we oli mekem waen long hem, i fulap finis. Ples ya i fulap we wora blong frut ya i stap ronaot. Mo ol nogud fasin blong olgeta i kam bigwan tumas. Fulap fulap man oli hivap long flatples blong disisen, from we dei blong Jeova i kolosap, long flat ples ya blong disisen. San mo mun tufala bambae i kam tudak. Mo ol sta bambae oli no moa saen. Jeova bambae i singaot olsem laeon, mo noes ya bambae i kamaot long Saeon. Voes blong hem bambae i kamaot long Jerusalem. Nao heven mo wol bambae oli seksek.”​—Joel 3:12-​16.

16. ?Hu ya ol man we Jeova bambae i mekem jajmen blong hem i kamaot long olgeta?

¹⁶ Yumi suagud we nem ya Jeosafat i minim se “Jeova i Jaj.” Ale, long sem fasin, yumi suagud se God, Jeova, bambae i mekem hae rul blong hem i win fulwan taem hem i mekem jajmen blong hem i kamtru. Profet tok ya i tokbaot ol man we bambae oli kasem strongfala jajmen, se oli ‘fulap fulap man long flatples blong disisen.’ Eni man we i folem ol gyaman skul mo i laef i stap yet long taem ya, bambae i joen long bigfala hif man ya. Long olgeta ya, i gat sam man we namba tu Sam i tokbaot olgeta, se ol kantri, ol man blong olgeta laen, ol king, ol lida. Olgeta ya oli laekem moa ol kruked fasin blong wol ya i bitim we oli ‘mekem wok blong Jeova wetem fasin fraet.’ Oli no wantem ‘kisim pikinini boe’ blong God. (Ol Sam 2:​1, 2, 11, 12) Oli no luksave Jisas olsem King we Jeova i putumap blong rul wetem hem. Mo tu, long ol man ya we oli plante tumas mo we oli mas lus, i gat olgeta man we King ya bambae i jajem olgeta se oli “nani.” (Matyu 25:33, 41) Long taem we i stret blong Jeova i singaot bigwan mo i kamaot long Jerusalem long heven, ale, King blong ol king we Jeova i jusumaot bambae i girap blong mekem jajmen blong God i kamtru. !Heven mo wol bambae oli seksek! Be, yumi save sua se: “Jeova bambae i olsem wan sefples long ol man blong hem, wan strong haos we ol pikinini blong Isrel oli save haed long hem.”​—Joel 3:​16.

17, 18. ?Hu olgeta we oli laef tru long bigfala trabol, mo bambae oli haremgud long wanem samting?

¹⁷ Revelesen 7:​9-​17 i tokbaot olgeta we bambae oli laef tru long bigfala trabol ya, olsem wan ‘bigfala kampani.’ Ol man ya oli soemaot bilif long paoa we blad blong Jisas i gat blong pemaot olgeta. Olgeta ya oli save stap sef long dei blong Jeova, taem fulap man ya long profet tok blong Joel oli kasem strongfala jajmen. Joel i talem long ol man we oli laef i stap afta long jajmen ya se: “Bambae yufala i save we mi mi Jeova, mi God blong yufala we i stap long Saeon, tabu hil blong mi,” hemia ples blong Jeova long heven.​—Joel 3:17a.

¹⁸ Biaen, profet tok ya i talem se ples we Kingdom blong God i stap long hem long heven, bambae i “kam wan tabu ples, mo ol strenja, bambae oli no moa save pastru long hem.” (Joel 3:​17b) Long heven mo long wol ya we Kingdom blong heven bambae i rul long hem, bambae i no moa gat ol strenja, from we olgeta man bambae oli joen tugeta long wosip we i klingud.

19. ?Olsem wanem Joel i tokbaot glad long paradaes ya we ol man blong God tede oli stap haremgud long hem?

¹⁹ Tede tu, i gat pis i stap long medel blong ol man blong Jeova long wol ya. Wetem fasin joengud, oli stap talemaot ol jajmen blong God long bitim 230 kantri mo long bitim 300 lanwis. Joel i yusum ol naesfala profet tok blong soem olsem wanem we olgeta ya oli rij tumas, i se: “Mo long dei ya bambae i mas olsem we, swit waen i ron i kamdaon long ol bigbigfala hil, mo fulap melek bambae i ron i kamdaon long olgeta smosmol hil, mo wora bambae i ron strong long olgeta reva blong Juda.” (Joel 3:​18) Yes, Jeova bambae i gohed blong kafsaedem plante gudfala blesing long ol man we oli stap presem hem long wol ya. Bambae oli rij olwe mo ol sas trutok bambae oli kam bigwan moa oltaem, olsem wan reva we i ron strong. Long taem ya, hae rul blong Jeova bambae i win fulwan long flatples blong disisen, mo bambae i gat fulap glad from we bambae hem i stap gogo i no save finis, wetem ol man blong hem we hem i pemaot olgeta.​—Revelesen 21:​3, 4.

[Ol futnot]

?Yu Yu Save Rimemba?

◻ ?Olsem wanem Jeova i sevem ol man blong hem long taem blong Jeosafat?

◻ ?Jeova i talem se hu ya i stret blong lus olgeta long “flatples blong disisen”?

◻ ?Hu ya ol strong man blong God, mo wanem impoten samting we bambae oli mekem long laswan faet ya?

◻ ?Ol man blong wosipim God oli haremgud long wanem samting?

[Tok Blong Pija Long Pej 21]

Juda i kasem tok ya se: ‘Yufala i no mas fraet from we faet ya i no blong yufala be hem i blong God’

[Tok Blong Pija Long Pej 23]

Jeova i singaot ol enemi blong hem blong oli ‘tanem ol tul blong wokem garen oli kam ol naef blong faet’

[Tok Blong Pija Long Pej 24]

Baebol i talem se wan bigfala kampani blong man bambae i laef tru long bigfala trabol