Yumi Mas Folem Eksampol Blong Profet Joel
1. ?Long wok blong prij, olsem wanem yumi save folem fasin blong Joel blong gat tingting daon?
1 ?Profet Joel hem i hu? Joel hem wan i talem se hem i “pikinini blong Petuel.” (Joel 1:1) Profet ya i gat tingting daon. Hem i pulum tingting blong man i go long mesej we hem i stap talemaot. Be hem i no pulum ol man, blong oli tinghae long hem olsem man blong talemaot gud nius. Long sem fasin, taem yumi stap prij, i nogud we yumi traem pulum ol man blong leftemap yumi. Defren olgeta, yumi mas pulum ol man blong oli leftemap Jehova mo tok blong hem Baebol. (1 Kor. 9:16; 2 Kor. 3:5) Antap long samting ya, ol tok we yumi stap talemaot oli givim paoa long yumi blong mekem yumi strong. ?Wanem fasin blong profet Joel we i save givhan long yumi, blong yumi gat strong tingting mo yumi gat hop?
2. ?Taem yumi tingbaot we en i klosap, bambae yumi mekem wanem?
2 ‘Dei Blong Jehova i Kam Klosap Finis.’ (Joel 1:15): Ol tok ya oli raetem longtaem finis, mo naoia yumi stap laef long taem ya, we i no longtaem dei blong Jehova bambae i kamtru. Tede yumi luk se wol i stap kam moa nogud, ol man oli no tingbaot narafala, mo ol man oli stap jikim yumi from bilif blong yumi. Olgeta samting ya oli pruvum klia se yumi stap long en blong rabis fasin blong wol ya. (2 Tim. 3:1-5; 2 Pita 3:3, 4) Taem yumi tingbaot se en i klosap, hemia i mas pulum yumi blong putum wok blong prij fasples long laef blong yumi.—2 Pita 3:11, 12.
3. ?From wanem i impoten blong prij moa naoia?
3 ‘Jehova Nomo i Sefples Blong Ol Man Ya Blong Hem.’ (Joel 3:16): Vas ya i tokbaot se heven mo wol tufala i seksek. Hemia i minim jajmen blong Jehova long taem blong bigfala trabol long fiuja. Yumi glad tumas blong save se long taem ya, Jehova bambae i sevem ol man blong hem we oli holemstrong long hem. (Rev. 7:9, 14) Sipos yumi joen moa long wok blong prij, bambae yumi luk se Jehova i stap givhan long yumi. Ale, samting ya bambae i mekem se bilif blong yumi i kam strong moa, mo bambae yumi naf blong stanap strong long taem blong bigfala trabol.
4. ?Taem yumi stap wet blong dei ya i kamtru, from wanem yumi mas glad, mo yumi mas gat strong tingting?
4 Ol man oli tingbaot mesej blong Joel olsem wan mesej blong trabol nomo. Be mesej ya i mekem ol man blong God oli glad from we oli save se Jehova bambae i sevem olgeta. (Joel 2:32) Olsem long Joel 2:23 i talem se: “Yufala i mas harem gud, mo yufala i mas glad from olgeta samting ya we mi mi mekem from yufala.” Taswe, naoia we yumi stap wet long dei ya blong Jehova i kamtru, yumi no mas fraet, mo yumi mas gat strong tingting blong talemaot gud nius.