?Hu Bambae i “Stap Sef”?

“Sipos man i singaot mi long nem blong mi, we mi mi Jeova, mi bambae mi sevem hem.”​—OL WOK 2:​21.

1. ?From wanem Pentekos long yia 33 K.T. i wan bigfala dei long histri blong wol?

PENTEKOS 33 K.T.a i wan impoten dei long histri blong wol. ?From wanem? From we long dei ya wan nyufala nesen i bon. Fastaem, nesen ya i no bigfala tumas​—i gat 120 disaepol blong Jisas nomo long hem, we oli bin kam wanples long wan rum antap long wan haos long Jerusalem. Bighaf blong ol nesen we oli bin stap long taem ya bifo, oli lus finis tede, be nesen we i bon long rum ya antap, hem i stap yet wetem yumi. Samting ya i impoten long yumi evriwan, from we hemia nao nesen we God i stanemap blong i wetnes blong hem long fored blong olgeta man.

2. ?Wanem ol merikel we oli kamaot blong makem taem ya we nyufala nesen i bon?

² Taem nyufala nesen ya i stanap, plante impoten samting oli kamtru we oli laenap wetem profet tok blong Joel. Buk blong Ol Wok 2:​2-4 i tokbaot sam long ol impoten samting ya, hem i se: ‘Nao wantaem nomo, i gat wan noes i kamaot long skae, we i olsem wan bigfala win i blu, nao noes ya i kavremap olgeta ples long haos ya we oli stap sidaon insaed long hem. Nao olgeta ya oli luk wan samting we i olsem faea i laet. Faea ya i seraot, nao laet blong hem i kam kasem evri man. Mo olgeta evriwan, tabu speret i kam fulap long olgeta, nao oli stat toktok long ol lanwis blong ol narafala man, olsem we speret ya i givim paoa long olgeta blong oli save toktok olsem.’ Long fasin ya, olgeta 120 man mo woman blong bilif ya oli kam wan nesen long saed blong speret. Oli ol faswan memba blong kampani ya we biaen aposol Pol i singaotem olgeta se “Isrel blong God.”​—Galesia 6:​16.

3. ?Wanem profet tok blong Joel i kamtru long Pentekos 33 K.T.?

³ Plante man oli hif i kam blong faenemaot from wanem “bigfala win i blu” olsem, mo aposol Pita i eksplenem long olgeta ya se wan profet tok blong Joel i stap kamtru. ?Weswan profet tok? Bambae yumi lesin long wanem we hem i talem: “God i talem se, ‘Long taem ya blong ol las dei blong wol, bambae mi mi givim speret blong mi long olgeta kaen man. Ol pikinini blong yufala, boe mo gel, bambae oli save talemaot ol tok we mi bambae mi talem long olgeta. Ol yang man blong yufala, bambae oli save luk ol samting olsem drim, we mi bambae mi soemaot long olgeta. Mo ol olfala blong yufala, bambae oli save drim long ol drim. Yes, long taem ya, bambae mi mi givim speret blong mi long ol boe blong wok blong mi, mo long ol gel blong wok blong mi tu. Bambae olgeta oli kasem ful paoa blong hem, nao bambae oli save talemaot ol tok we mi bambae mi talem long olgeta. Bambae mi mi mekem ol samting blong sapraes long skae. Mo bambae mi mekem ol saen blong paoa blong mi long wol ya tu. Bambae i gat blad mo faea mo bigfala smok. Fastaem, san bambae i kam tudak, mo mun bambae i kam red olsem blad. Nao biaen, Dei ya blong mi, we mi mi Jeova, hem bambae i save kam. Hemia wan bigfala dei ya, we i gud tumas. Ale, long taem ya nao, sipos man i singaot mi long nem blong mi, we mi mi Jeova, mi bambae mi sevem hem.’ ” (Ol Wok 2:​17-​21, NW) Yumi save faenem ol semfala tok ya we Pita i talem, long Joel 2:​28-​32. Mo taem ol tok ya oli kamtru, hemia i soem se nesen blong ol man Jyu i stap kam kolosap long taem we bambae hem i mas lus. “Bigfala dei ya [blong Jeova], we i gud tumas,” hem i kam kolosap. Hemia nao taem we God bambae i givimbak long Isrel ya we i lego bilif long Hem. Be, ?hu ya bambae i laef tru long taem ya, no hu i save ronwe mo stap sef? ?Mo samting ya i olsem pija blong wanem narafala samting?

Tu Profet Tok Oli Kamtru

4, 5. From ol samting we oli mas hapen yet, ?Pita i givim wanem advaes, mo from wanem advaes ya i no jes stretgud long taem blong Pita nomo?

⁴ Long ol yia we oli kam biaen long 33 K.T., Isrel blong God long saed blong speret i karem plante frut, be nesen blong ol prapa man Isrel, no gat. Long 66 K.T., Isrel i stap faet agensem Rom. Long 70 K.T., kolosap Isrel i lus olgeta, mo Jerusalem wetem haos prea blong hem oli bon evriwan long faea. Long Pentekos 33 K.T., Pita i givim advaes we i stretgud long saed blong trabol ya we i stap kam. Hem i yusum tok blong Joel bakegen, i se: “Sipos man i singaot mi long nem blong mi, we mi mi Jeova, mi bambae mi sevem hem.” Olgeta man Jyu wanwan oli mas mekem disisen blong singaot long nem blong Jeova. Hemia i minim se oli mas mekem wan narafala samting tu we Pita i tokbaot, i se: “Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes, blong bambae God i tekemaot ol sin blong yufala.” (Ol Wok 2:​38) Ol man we oli lesin long Pita oli mas agri long Jisas olsem Mesaea, nating we nesen blong Isrel i bin sakemaot hem.

⁵ Profet tok ya blong Joel i gat bigfala mining long ol man we oli gat tingting daon long faswan handred yia. Be, ol tok ya oli gat moa mining yet tede, from we ol samting we oli hapen biaen long ol yia 19 handred, oli soemaot se profet tok blong Joel i kamtru bakegen namba tu taem. Bambae yumi luk olsem wanem.

6. ?Olsem wanem save long saed blong Isrel blong God i kam moa klia taem yia 1914 i kam kolosap?

⁶ Afta we ol aposol oli ded, ol gyaman Kristin skul we oli olsem rabis gras oli haedem Isrel blong God. Be, long taem blong en, we i stat long 1914, nesen ya long saed blong speret i kam long klia ples bakegen. Samting ya i stret long parabol blong Jisas long saed blong wit mo rabis gras. (Matyu 13:24-​30, 36-​43) Taem 1914 i kam kolosap, ol tabu Kristin oli stat seraot long Krisendom we i lego trufala bilif. Wetem fasin no fraet, oli sakemaot olgeta gyaman bilif mo tijing blong hem, mo oli talemaot se “taem blong ol hiten man” kolosap i finis. (Luk 21:24) Be, faswan bigfala faet blong wol i stat long 1914, mo hem i karem sam nyufala problem i kam we olgeta oli no rere from. Long hadtaem ya, plante oli kam slak, mo sam oli lego. Long 1918, kolosap wok blong prij i stop fulwan.

7. (a) ?Wanem bigfala samting i hapen long 1919 we i kolosap sem mak long taem blong Pentekos 33 K.T.? (b) Stat long 1919, ?wanem samting i kamaot taem Jeova i kafsaedem tabu speret long ol man blong wok blong hem?

⁷ Be, samting ya i no gohed blong longtaem tumas. Stat long 1919, Jeova i kafsaedem tabu speret long ol man blong hem long wan fasin we i mekem yumi tingbaot Pentekos long yia 33 K.T. Be, i tru se long 1919, olgeta we oli kasem tabu speret oli no stat toktok long ol defren lanwis, mo i no gat wan samting olsem win we i kasem olgeta. From tok blong Pol long 1 Korin 13:​8, yumi kasem save se taem blong mekem ol merikel olsem i finis longtaem finis. Nating se i olsem, i klia se tabu speret blong God i wok long 1919. Long yia ya, long wan asembli long Seda Poen, Ohaio, Yunaeted Stet, ol Kristin we oli strong long bilif oli kasem paoa bakegen mo oli stat bakegen blong talemaot gud nyus blong Kingdom. Long 1922, oli mekem asembli bakegen long Seda Poen, mo long ples ya oli harem ol tok we i pusum olgeta blong wok. Tok ya hemia se, “talemaot, talemaot, talemaot, King mo kingdom ya.” Olsem long faswan handred yia, ol man blong wol oli mas luksave ol samting we oli soem se God i sanem tabu speret blong hem i kam. Olgeta Kristin we oli givim laef blong olgeta i go long God​—ol man ol woman, ol olfala mo ol yangfala​—oli stat ‘talemaot ol tok blong God,’ hemia i min se, oli stap tokbaot “ol bigbigfala wok ya we God i mekem.” (Ol Wok 2:​11) Olsem Pita, olgeta ya tu oli singaot ol man we oli gat tingting daon se: “Yufala i mas lego long ol rabis man we oli stap olbaot long yufala, yufala i mas sevem yufala.” (Ol Wok 2:​40) ?Olsem wanem ol man we oli harem tok ya oli save mekem olsem? Oli mas folem tok blong Joel we i stap long Joel 2:​32: “Olgeta man we oli singaot long nem blong Jeova bambae oli stap sef.”

8. ?Stat long 1919 i kam, olsem wanem Isrel blong God i stap gohed gud?

⁸ Stat long taem ya bifo kam kasem naoia, wok blong Isrel blong God i muf i go fored. Naoia, i luk olsem se, God i putum mak blong hem long bighaf blong ol tabu man finis. Mo stat long ol yia 1930 kam kasem naoia, wan bigfala kampani blong man we oli gat tingting daon oli hivap, we oli gat hop blong laef long wol ya. (Revelesen 7:​3, 9) Olgeta ya evriwan oli luksave se naoia i taem blong hareap, from we namba tu haf blong Joel 2:​28, 29 i soemaot se yumi stap kolosap long wan dei blong Jeova we bambae i mekem man i fraet moa i bitim ol narafala taem bifo. Hemia taem we Jeova bambae i spolem olgeta gyaman skul blong wol, olgeta politik, mo olgeta bisnes. !Yumi gat bigfala risen blong ‘singaot long nem blong Jeova,’ we yumi bilif fulwan se bambae hem i sevem yumi!

?Olsem Wanem Yumi Singaot Long Nem Blong Jeova?

9. ?Wanem sam samting we yumi mas mekem blong singaot long nem blong Jeova?

⁹ ?Wanem i joen wetem fasin ya blong singaot long nem blong Jeova? Sam poen we oli joen wetem Joel 2:​28, 29 oli halpem yumi blong ansarem kwestin ya. Eksampel, Jeova i no stap lesin long evri man we oli stap singaot long hem. Tru long wan narafala profet, hemia Aesea, Jeova i talem long Isrel se: “Taem yufala i leftemap han blong yufala i go antap mo yufala i prea long mi, mi mi haedem ae blong mi blong no lukluk yufala. Nating se yufala i stap mekem plante prea, be mi mi no save lesin.” ?From wanem Jeova i no wantem lesin long prapa nesen blong hem? Hem wan i talem se: “Blad i fulap long han blong yufala.” (Aesea 1:​15) Jeova bambae i no lesin long eniman we i gat fol from we i kilim narafala man i ded no from we i stap sin oltaem. Hemia nao from wanem Pita i talem long ol man Jyu long taem blong Pentekos se oli mas tanem tingting blong olgeta from sin blong olgeta. Long ol vas raonabaot long Joel 2:​28, 29, yumi luk se Joel tu i tokbaot fasin blong tanem tingting from ol sin. Wan eksampel, long Joel 2:​12, 13, yumi ridim se: “Hemia tok blong Jeova: ‘Mo naoia tu, kambak long mi wetem fulhat blong yufala. Yufala i mas lego kakae mo yufala i mas krae mo singaot bigwan. Yufala i no terem klos blong yufala, be yufala i mas terem hat blong yufala. Mo yufala i mas kambak long Jeova, God blong yu, from we hem i gud mo hem i gat sore, hem i no save kros kwik mo hem i fulap long lav mo kaen fasin.’ ” Stat long 1919, ol tabu Kristin oli mekem wanem we vas ya i talem. Oli tanem tingting blong olgeta from ol mastik we oli mekem, mo tingting blong olgeta i kam strong blong oli neva lego no kam slak long wok blong God bakegen. Samting ya i openem rod blong speret blong God i kamdaon long olgeta. Evri man i mas folem semkaen fasin sipos oli wantem se Jeova i harem olgeta taem oli singaot long nem blong hem.

10. (a) ?Trufala fasin blong tanem tingting from sin i minim wanem? (b) ?Jeova i mekem wanem long man we i soem trufala fasin blong tanem tingting blong hem from sin?

¹⁰ Rimemba, se trufala fasin blong tanem tingting from ol sin i no jes minim se yumi talem, “Mi mi sore tumas.” Ol man Isrel oli terem klos blong olgeta blong soemaot strong filing blong sore we oli gat. Be Jeova i talem se: “Yufala i no terem klos blong yufala, be yufala i mas terem hat blong yufala.” Trufala fasin blong tanem tingting from ol sin, i kamaot long hat, hem i kamaot dip insaed long yumi. Hemia i minim se yumi mas tanem baksaed long ol rong blong yumi, olsem tok we yumi ridim long Aesea 55⁠:7 i talem se: “Man nogud i mas lego rod we hem i stap folem, mo rabis man i mas lego ol nogud tingting blong hem. I gud hem i kambak long Jeova.” Samting ya i minim se yumi no laekem sin nating, long sem fasin olsem Jisas. (Hibrus 1:9) Biaen, yumi trastem Jeova se bambae i fogivim yumi tru long ransom sakrifaes blong Jisas, from we Jeova “hem i gud mo hem i gat sore, hem i no save kros kwik mo hem i fulap long lav mo kaen fasin.” Bambae hem i agri long wosip blong yumi, we i olsem sakrifaes blong sid mo dring we yumi givim i go long hem. Bambae hem i lesin taem yumi singaot long nem blong hem.​—Joel 2:​14.

11. ?Trufala wosip i mas stap long wanem ples long laef blong yumi?

¹¹ Long Bigfala Toktok blong Jisas antap long Hil, hem i talem wan narafala samting we yumi mas tingbaot, i se: ‘Yufala i mas lukaot kingdom mo stret fasin blong hem fastaem.’ (Matyu 6:​33) Yumi no mas ting se wosip blong yumi i wan samting we yumi no nid blong tinghevi long hem, olsem se yumi mekem smol nomo we i naf blong blokem tingting blong yumi i no stikim yumi. I stret we wok blong God i stap long faswan ples long laef blong yumi. Taswe, tru long Joel, Jeova i gohed blong talem se: “Blu pupu long Saeon . . . Pulum ol man oli kam wanples. Mekem kongregesenb i kam klin. Tekem ol olfala oli kam. Karem ol pikinini mo ol bebi we oli stap titi yet, oli kam wanples. Ol man we oli jes mared oli mas kamaot long rum blong olgeta, mo woman we i jes mared i mas kamaot long rum blong hem.” (Joel 2:​15, 16) Ating ol man mo woman we oli jes mared oli wantem spenem fulap taem tugeta, tufala nomo we oli no tingting long wan narafala samting. Be, olgeta ya tu, oli mas putum wok blong Jeova fastaem. I no gat wan samting we i mas kam bifo long fasin blong yumi blong kam wanples blong wosipim God, mo blong singaot long nem blong hem.

12. ?Wanem i soemaot se namba blong yumi i save kam antap bigwan yet taem yumi luk ripot blong Memoriol blong las yia?

¹² Wetem tingting ya, i gud yumi traem tingbaot sam namba we oli kamaot long Ripot blong ol Wetnes blong Jeova long Sevis Yia 1997. Las yia i gat 5,599,931 man blong talemaot Kingdom​—!hemia i rili wan bigfala kampani blong man blong presem God ya! Namba blong ol man we oli kam long Memoriol i kasem 14,322,226​—hemia eit mo haf milyan antap long namba blong ol man blong prij. Namba ya i soemaot se long ol yia we oli kam, namba i save kam antap bigwan yet. Plante long ol eit mo haf milyan man ya oli stap stadi Baebol finis wetem ol Wetnes blong Jeova, oli man we oli intres long trutok no oli pikinini blong ol man mo woman we oli baptaes finis. Memoriol ya, hemia faswan miting we plante blong ol man ya oli kam long hem long ful laef blong olgeta. From we oli kam long miting ya, ol Wetnes blong Jeova oli gat jans blong save olgeta mo blong soem se oli wantem halpem olgeta blong gohed moa. I gat ol narafala man tu we oli kam long Memoriol evri yia mo maet oli kam long sam narafala miting tu, be oli no gohed moa. Yes, olgeta ya oli welkam bigwan blong kam long ol miting. Be yumi pulum olgeta ya blong tingting dip long ol profet tok blong Joel tu, mo blong tingbaot sam moa samting we oli mas mekem blong oli save sua se bambae Jeova i harem olgeta taem oli singaot long nem blong hem.

13. Sipos yumi stap singaot long nem blong Jeova finis, ?wanem wok we yumi mas mekem long ol narafala?

¹³ Aposol Pol i soemaot wan narafala samting we yumi mas mekem blong singaot long nem blong God. Long leta we hem i raetem i go long ol man Rom, hem i yusum profet tok blong Joel, i se: “Olgeta we oli singaot long Jeova, oli talem nem blong hem, hem bambae i sevem olgeta.” Nao hem i mekem man i tingting, taem i talem se: “?Sipos man i no go talemaot nyus blong God, bambae ol man oli save harem nyus ya olsem wanem? ?Mo sipos ol man oli no harem nyus ya, bambae oli save bilif long hem olsem wanem? ?Mo sipos oli no bilif long hem, bambae oli save singaot long God olsem wanem?” (Rom 10:13, 14, NW) Yes, plante man we oli no bin save Jeova kam kasem naoia, oli mas singaot long nem blong hem. Ol man we oli save Jeova finis, oli gat wok ya blong prij, be antap long hemia oli mas traehad blong mekem moa blong halpem ol man ya blong singaot long nem blong Jeova.

Wan Paradaes Long Saed Blong Speret

14, 15. ?Wanem ol blesing we oli olsem paradaes, we ol man blong Jeova oli kasem from we oli stap singaot long nem blong hem long fasin we hem i glad long hem?

¹⁴ Hemia nao tingting we ol tabu brata mo ol narafala sipsip oli gat, mo from samting ya Jeova i stap blesem olgeta. “Jeova bambae i wok strong from graon blong hem mo bambae hem i soem sore long ol man blong hem.” (Joel 2:​18) Long 1919, Jeova i wok strong mo i soem sore long ol man blong hem, taem hem i givim paoa long olgeta bakegen, mo i pulum olgeta blong joen long wok blong hem long saed blong speret. Hemia i rili wan paradaes long saed blong speret, mo Joel i storebaot paradaes ya taem hem i talem se: “Yu no mas fraet, O graon. Yu mas glad mo haremgud, from we Jeova bambae i mekem wan bigfala samting i kamaot long samting ya we Hem i stap mekem. Yufala i no mas fraet, yufala ol wael anamol blong bus, from we ol gras blong draeples bambae oli gringud. Ol tri bambae oli givim frut blong olgeta. Figtri mo rop blong wokem waen long frut blong hem bambae oli givimaot paoa blong tufala. Mo, yufala ol pikinini blong Saeon, yufala i mas glad mo haremgud long Jeova, God blong yufala. From we bambae hem i sua blong givim ren kolosap long koltaem, stret olsem yufala i nidim. Mo bambae hem i mekem bigfala ren i foldaon long yufala, ren kolosap long koltaem mo ren kolosap long hot taem, olsem fastaem. Mo ol ples blong kilim wit oli mas fulapgud wetem ol sid blong wit we i klin, mo ol dram oli mas fulap wetem nyufala waen mo oel gogo i kafsaed.”​—Joel 2:21-​24.

¹⁵ !Long tingting blong yumi, samting ya i naes tumas! Trifala stampa kakae we ol man Isrel oli nidim blong laef, bambae oli fulapgud​—sid blong wit, oel blong oliftri, mo waen​—wetem plante tumas sipsip. Long taem blong yumi, i tru tumas we profet tok ya i stap kamtru long saed blong speret. Jeova i stap givim olgeta kakae long saed blong speret we yumi nidim. Yumi evriwan i haremgud tumas long plante samting we God i givim ?i tru no? Yes, olsem Malakae i talem, God blong yumi i ‘openem doa blong heven blong ol blesing oli kamdaon long yumi gogo yumi no moa nidim.’​—Malakae 3:​10.

En Blong Wan Fasin Blong Laef Long Wol Ya

16. (a) ?Taem Jeova i kafsaedem tabu speret blong hem, samting ya i soem wanem long saed blong taem blong yumi? (b) ?Wanem i stap long fyuja?

¹⁶ Afta we Joel i talemaot se ol man blong God bambae oli stap long samting olsem wan paradaes, hem i givim profet tok ya long saed blong tabu speret we Jeova bambae i kafsaedem long ol man blong hem. Aposol Pita i tokbaot profet tok ya long taem blong Pentekos, mo hem i talem se bambae tok ya i kamtru long ‘ol las dei blong wol.’ (Ol Wok 2:​17) Long taem blong Pentekos we God i kafsaedem speret blong hem, hemia i soem se fasin blong laef blong ol man Jyu i kasem ol las dei blong hem. Taem God i kafsaedem speret blong hem i go long Isrel blong God long ol yia biaen long 19 handred, samting ya i soem se yumi stap laef long ol las dei blong fasin blong laef blong wol ya. From samting ya, ?wanem bambae i kamaot long fyuja? Profet tok blong Joel i gohed blong talem se: “Bambae mi mi givim ol saen long skae mo long wol ya, bambae i gat blad mo faea mo bigfala smok. San bambae i kam tudak, mo mun bambae i kam olsem blad, bifo we bigfala dei blong Jeova i kam, we i mekem ol man oli fraet.”​—Joel 2:30, 31.

17, 18. (a) ?Wanem bigfala dei blong Jeova we i mekem man i fraet, i kasem Jerusalem? (b) From we yumi suagud se wan narafala dei blong Jeova we i mekem man i fraet bambae i kam yet long fyuja, ?samting ya i pulum yumi blong mekem wanem?

¹⁷ Long 66 K.T., ol profet tok ya oli stat kamtru long Judia bifo we bigfala dei blong Jeova we i mekem man i fraet i kasem fulmak blong hem long 70 K.T. !Long taem ya, olgeta we oli no joen wetem ol man we oli leftemap nem blong Jeova, oli fraet bitim mak! Tede tu, sam samting we bambae oli mekem man i fraet bitim mak oli stap fored long yumi, hemia taem han blong Jeova bambae i spolem fulwan ol rabis fasin blong wol ya. Nating se i olsem, i gat rod blong ronwe. Profet tok ya i gohed blong talem se: “Olgeta we oli singaot long nem blong Jeova bambae oli stap sef. From we long Hil ya Saeon mo long Jerusalem, bambae i gat ol man we oli stap sef, olsem Jeova i talem finis, mo long medel blong olgeta we oli stap laef, we Jeova i stap singaot olgeta.” (Joel 2:​32) Ol Wetnes blong Jeova oli rili glad blong save nem blong Jeova, mo oli bilif fulwan se bambae hem i sevem olgeta taem oli singaot i go long hem.

¹⁸ Be, ?wanem bambae i hapen taem bigfala dei blong Jeova we i gud tumas, i kasem wol ya, wetem bigfala kros blong Hem? Bambae yumi tokbaot samting ya long nekiswan stadi.

[Ol futnot]

?Yu Yu Save Rimemba?

◻ ?Wanem faswan taem we Jeova i kafsaedem speret blong hem long ol man blong hem?

◻ ?Wanem sam samting we yumi mas mekem blong singaot long nem blong Jeova?

◻ ?Wetaem bigfala dei blong Jeova we i mekem man i fraet i kamtru long ol prapa man Isrel?

◻ ?Olsem wanem Jeova i stap blesem olgeta we oli singaot long nem blong hem tede?

[Tok Blong Pija Long Pej 15]

Wan nyufala nesen i bon long Pentekos 33 K.T.

[Tok Blong Pija Long Pej 17]

Long stat blong ol yia 19 handred, Jeova i kafsaedem tabu speret bakegen long ol man blong hem, blong mekem tok blong Joel 2:​28, 29 i kamtru

[Tok Blong Pija Long Pej 18]

Yumi mas halpem ol man blong singaot long nem blong Jeova