Ol Ples Long Promes Lan
God i Givim Ol Samting We Ol Man Isrel Oli Nidim Long Sinae
!TRAEM tingbaot plante milyan man, woman, mo ol pikinini oli stap wokbaot i go long “bigfala drae ples mo ples blong fraet, i gat ol posen snek mo ol skopion mo graon i drae we i no gat wora long hem”!
Ol tok ya blong God long Dutronome 8:15 i tokbaot bigfala trep we i stap long fored blong ol man Isrel taem oli aot long Ijip mo oli stap wokbaot long drae ples blong Sinae. Wan trabol se: ?Hu bambae i givim kakae mo wora we i naf long olgeta?
Ol man Isrel oli stap wok slef long ples kolosap long maot blong reva Nael, be oli no sot long ol samting ya. Ol pija long stonwol blong ol beregraon bifo oli soemaot ol grep, ol melen, mo ol narafala kakae, mo tu ol fis mo ol faol, ol kakae ya oli givim plante samting we bodi i nidim. Taswe ol man Isrel oli stap krae long drae ples se: “?Hu bambae i givim mit long mifala? !Mifala i stap tingbaot ol fis we mifala i stap kakae fri nomo taem mifala i stap long Ijip, ol kukamba mo ol wora melen mo ol ligim mo ol onion mo lae!”—Namba 11:4, 5; 20:5.
Afta we ol man Isrel oli krosem Red Si, kwiktaem nomo oli luksave se ples ya Sinae i olsem wanem. Oli no wokbaot folem gudfala rod ya we ol bisnesman oli stap folem hemia long not be oli godaon long smol poen ya long Red Si. Afta we oli wokbaot samwe long 80 kilomita long drae ples ya, oli faenem i had blong kasem wora. Oli no save dring wora we oli faenem, from we hem i konkon mo oli save kasem sik from. Oli stap krae se, “?Bambae yumi dring wanem nao?” God i lesin mo i mekem wora ya i kam swit.—Eksodas 15:22-25.
Luk longfala laen blong ol kamel antap. Yu luksave kwestin nao se olsem wanem ol man Isrel oli save wokbaot long drae ples ya blong go long Hil ya Sinae. ?Olsem wanem oli save gohed blong faenem naf wora—mo kakae—blong olgeta mo blong ol sipsip mo buluk we oli mas lukaotem gud blong oli stap laef?—Eksodas 12:38.
Oli wokbaot i go moa long saot mo i no longtaem oli faenem fres wora mo kakae long ples ya Elim. (Eksodas 15:27) Be, hem i no ples we bambae oli stap long hem. Oli stap wokbaot i go long “tabu hil ya blong God,” Hil ya Sinae. (Eksodas 3:1; 18:5; 19:2; 24:12-18) Hem i stap 120 kilomita long olgeta—longfala ples ya i had mo graon i drae.
Taem bigfala grup ya blong ol man i stap go from Hil ya Sinae, oli kam kolosap long—maet oli stop smol—long wan ples ya Faran we i gat kakae long hem. Smolhaf blong ples ya yu save luk foto blong hem long pej bifo.a Hem i stap long flat ples long medel blong ol hil blong drae ples, kolosap long saed blong Red Si (pasis blong Sues). !Long ples ya oli faenem plante kakae!
Drae ples blong Sinae i stret nomo long tok ya “bigfala drae ples mo ples blong fraet,” be long ples ya Faran, ol man Isrel oli save harem gud long ol sado blong ol pamtri mo ol narafala tri. Oli faenem plante swit frut long ples ya mo oli karem sam kakae wetem olgeta taem oli go.
Ol samting oli gru long Faran from we wora aninit long graon i kam antap long ples ya. !Tingbaot, bambae yu harem olsem wanem sipos yu stap long wan drae ples mo wantaem nomo yu faenem fres wora blong dring! Samting ya i soemaot se nating se Sinae i wan drae ples be i gat sam ples we yu save kasem wora long hem. Samtaem oli mas digim wel we i dip blong faenem wora. Mo i hadwok blong pulum gudfala wora ya long ol baket no ol botel speseli sipos yu mas givim wora long ol sipsip mo ol buluk. Kam kasem tede ol man we oli stap wokbaot long drae ples blong Sinae oli go long ol wel ya blong kasem wora blong olgeta mo blong ol kamel blong olgeta.—Lukluk Jenesis 24:11-20; 26:18-22.
Yes, nating se samtaem oli toktok smol from ol samting we oli nidim, ol man Isrel oli gat wora mo kakae. Samtaem God i mekem merikel blong givim ol samting ya long olgeta. (Eksodas 16:11-18, 31; 17:2-6) Samtaem i klia se hem i stap lidim olgeta i go long “wan ples blong spel” we oli save faenem wora mo kakae. (Namba 10:33-36) Mo oltaem hem i stap toktok long olgeta long saed blong plante samting we bambae oli kasem long Promes Lan sipos oli stap obei long Hem.—Dutronome 11:10-15.
[Futnot]
a Foto ya i stap long bigfala saes long 1992 Calendar of Jehovah’s Witnesses.
[Foto Credit line blong pija long pej 24]
Pictorial Archive (Near Eastern History) Est.
[Foto Credit line blong pija long pej 24]
Pictorial Archive (Near Eastern History) Est.
[Foto Credit line blong pija long pej 25]
Pictorial Archive (Near Eastern History) Est.
[Foto Credit line blong pija long pej 25]
Pictorial Archive (Near Eastern History) Est.