?Yu Save Kasem Trufala Proteksen?

WAN taem man ya blong raetem ripot, Ralph Waldo Emerson i talem se: “Ol man we oli no gat strong tingting oli stap bilif long laki. . . . Ol man we oli gat strong tingting oli stap bilif se i gat risen blong samting i hapen.” Yes, wan man we i bilif long paoa blong majik we oli werem mo ol samting we oli save givim laki, i givim laef blong hem long ol paoa ya we yumi no save luk. Hem i sakemaot fasin blong skelem samting mo fasin blong tingtinggud mo i wosip long ol krangke kastom we hem i fraet long olgeta.

Be, Baebol i save mekem man i fri long ol fraet olsem. Hem i soemaot se ol majik we oli werem mo ol samting we i save givim laki oli no gat paoa. ?Olsem wanem hem i mekem? Yes, The New Encyclopædia Britannica, i talem se, “oli ting se paoa blong ol samting we ol man oli stap werem i kam long fasin joen blong olgeta wetem [ol narafala samting] ol paoa we oli stap.” Maet ol paoa ya oli ‘speret blong ol ded man’ no ‘paoa we i kamaot from laki nomo.’ Be Baebol i soemaot klia se ol “dedman oli no save wan samting nating.” (Eklesiastis 9:5) Taswe, ol dedman oli no gat speret we i save givhan no spolem olgeta we oli laef; no i no gat paoa we yumi no save luk olsem samting we i kamaot from laki nomo we i save wok blong yu.

Long taem blong Baebol, God i agensem olgeta we oli lego hem, olgeta we oli stap fogetem tabu hil blong hem, ‘olgeta ya we oli stanemap wan tebel blong god blong Laki mo oli stap fulumap waen we i meks finis long god ya we oli ting se i save makemaot taem blong laef mo ded blong olgeta.’ Be oli no kasem proteksen, ol man ya we oli sapotem god blong laki oli mas lus. Jeova God i talem se, “Bambae Mi kilim yufala long naef blong faet”.​—Aesea 65:​11, 12.

From fasin ya blong mekem majik, nesen blong Babilon bifo tu i bilif se paoa we yumi no save luk i save protektem olgeta. Be Babilon i harem nogud long bigfala trabol. Profet Aesea i tok jikim olgeta se, “Gohed long fasin blong mekem majik toktok blong yufala mo long kleva blong yufala.” “Maet yu save kasem help long olgeta. . . !Be no gat! nating se yufala i gat plante trik be yufala i no gat paoa.” (Aesea 47:​12, 13, The New English Bible) Biaen, nesen ya i no moa stap. Bilif blong olgeta long wosip ya i nating nomo. I sem mak, wan majik bidbid, no wan ston, i no save mekem wan samting blong givhan no protektem yu.

Wan Kaen Fasin Blong Wosip Long Aedol

Be, maet samfala oli luk se fasin ya blong karem glas we i saengud, leg blong rabet, no wan medal blong skul i no save mekem trabol long olgeta. ?Be yu ting se ol samting ya i no olsem ol jen we man i stap putum we oli no save mekem trabol long hem? Baebol i no talem olsem. Eni samting we i blong gyaman wosip i save spolem man.

Fasin blong werem ol majik bidbid i wan kaen fasin blong wosip long aedol​—i klia nomo se hemia wan samting we Tok blong God i agensem. (Eksodas 20:​4, 5) Tru, maet wan man i no save harem se hem i stap wosip stret long wan majik bidbid no wan ston blong protektem hem. ?Be yu no ting se sipos man i gat ol samting olsem, i soem se hem i stap givim ona, tingting blong wosip long ol paoa ya we yumi no save luk? ?Mo yu ting se plante taem oli stap mekem wosip (olsem fasin blong kis) long ol ston? Antap moa, long Baebol, long 1 Jon 5:​21, advaes i go long ol Kristin se: “Yufala i mas lukaot gud blong yufala i no go krangke long ol narafala god we oli blong gyaman nomo.” Vas ya i stap tokbaot ol samting olsem ston mo majik bidbid tu.

Trap Blong Wosip Long Ol Rabis Paoa

Fasin blong wosip long ol rabis paoa i holemtaet plante man from fasin blong yusum ol majik bidbid. Tru, maet sam oli karem wan glas we i saen gud no wan haf blong majik from kastom blong olgeta be i no from bilif. Be i olsem nomo we yu pleplei wetem wan woman blong rod we i save mekem se yu kasem AIDS, fasin blong pleplei wetem wosip long ol rabis paoa i save pulum yu blong kasem ol nogud frut. I stret nomo we God i blokem ol man Isrel blong no mekem majik, fasin blong talemaot samting we i haed, mo blong talemaot ol samting long fyuja. Baebol i givim woning se, “Evriwan we oli stap mekem samting ya, hem i wan samting we i nogud long ae blong Jeova”​—Dutronome 18:​10-14.

?From wanem God i blokem samting ya? From we Devel Setan mo ol dimon blong hem nao oli stampa blong ol fasin ya be i no ol speret blong ol dedman no paoa we i kamaot from laki.a Mo fasin blong yusum ol ston blong givim laki i joen stret wetem fasin blong wosip long dimon. Vine’s Expository Dictionary of Old and New Testament Words i talem se: “Fasin blong mekem nakaemas, fasin blong yusum ol kastom meresin, we i isi no i no isi, plante taem oli stap yusum sam spesel toktok wetem mo oli yusum ol majik bidbid, ston, no samting olsem blong toktok long ol rabis paoa.”

Man we i stap karem ol samting blong givim laki i stap pleplei wetem ol rabis speret. I isi blong rabis god blong wol ya​—Devel Setan i holemtaet hem long nogud paoa blong hem mo kontrolem hem. (2 Korin 4:4) Taswe, i stret nomo we Baebol i askem yumi blong stap longwe long ol kaen wok blong ol rabis speret.​—Galesia 5:​19-21.

Kam Fri Long Paoa Blong Gyaman Bilif

The World Book Encyclopedia i talem se: “Ating bambae ol gyaman bilif oli kam haf long laef blong ol man sipos ol man oli gohed blong stap fraet long olgeta wanwan mo oli no sua long fyuja.” Be ol Wetnes blong Jeova oli stap givhan long plante man blong oli kam fri long ol gyaman bilif we oli save spolem olgeta. Wan woman blong Saot Afrika i talem se: “Ol rabis speret oli mekem trabol long mi, mo haos blong mi i fulap wetem muti blong blokem mi long ol rabis speret ya.” Ol Wetnes blong Jeova oli givhan long woman ya blong luk ol denja we oli save kamaot from fasin blong pleplei wetem ol samting ya. ?Woman ya i talem wanem? Hem i talem se, “Mi stat blong sakemaot olgeta samting we mi gat we oli joen wetem ol dimon. Helt blong mi i kam moa gud. Mi givim laef blong mi blong mekem wok blong Jeova mo mi tekem baptaes.” Naoia woman ya i fri long gyaman bilif mo i no moa joen long wok blong rabis speret.

Mo tu, tingbaot wan kleva blong Naejeria we i stap mekem ol sik man oli kam gud bakegen wetem waes we hem i gat mo wok blong ol rabis speret. Plante taem hem i yusum ol tok panis blong ronemaot ol Wetnes blong Jeova taem oli kam long haos blong hem. !Wan taem hem i mekem rere wan spesel posen, i talem sam toktok long posen, mo i blu long samting ya i go long fes blong wan Wetnes! Hem i talem se, “!Bambae yu yu ded afta long namba seven dei!” !Seven dei biaen wetnes ya i kambak bakegen, mo kwiktaem nomo Kleva ya i kamaot, hem i ting se hem i luk wan devel! Naoia hem i save se majik blong hem i no gat paoa, hem i agri blong stadi long Baebol mo biaen hem i kam wan Wetnes blong Jeova.

Yu tu yu save fri long fasin blong fraet mo long ol gyaman bilif. I tru, maet samting ya i no isi. Ating yu bin gruap long wan ples we i fulap long fasin blong yusum ston we i save givim laki. Ol Kristin long Efesas bifo oli fesem wan traem olsem. Oli stap long wan kantri we rabis speret i gat paoa long laef blong ol man. ?Oli mekem wanem taem oli lanem trutok long Tok blong God? Baebol i talem se: “Mo plante man we bifo oli stap mekem ol bisnes blong posen mo kleva oli tekem ol buk blong olgeta, nao oli bonem long fes blong ol man. Nao taem ol man oli kaontem praes blong ol buk ya, praes ya i kasem antap long tu handred fefte taosen dola.”​—Ol Wok 19:19.

Kasem Proteksen Blong God

?Sipos yu livim olgeta samting we oli save protektem yu, bambae i no gat samting i lukaotem yu? No gat. “God, hem i sefples blong yumi, hem i paoa blong yumi. Oltaem hem i rere blong givhan long yumi long taem blong trabol.” (Ol sam 46:1) God i save lukaotem yumi long taem ya we hem bambae i spolem ol rabis fasin blong wol ya. “Hae God i save sevem ol man we oli bilif long hem, oli aot long ol samting blong traem olgeta. Be ol man we oli no stret, hem i save holem olgeta oli stap long kalabus, gogo bambae bigfala Dei blong jajem ol man i kamtru.”​—2 Pita 2:9; ridim Ol Sam 37:40.

Naoia, ‘ol taem mo ol samting we yumi no save long hem, oli hapen long evriwan.’ (Eklesiastis 9:11) God i no promes se bambae ol man blong hem oli no “stap kasem trabol” long laef no se bambae hem i blokem olgeta blong oli no kasem trabol. Be, hem i promes blong lukaotem yumi blong stap strong long saed blong speret mo fasin fren blong yumi wetem hem. (Ol sam 91:​1-9) ?Long wanem rod? Wan rod se, hem i givim ol loa mo ol rul we oli save mekem yumi haremgud mo oli save protektem yumi long rabis paoa blong Setan. (Aesea 48:17) Taem yumi kasem save long ol rod blong Jeova, ‘fasin blong tingtinggud bambae i lukaot long yumi. Fasin luksave bambae i sevem yumi’​—long ol samting we oli no save givim frut long yumi no ol wok we oli save mekem yumi harem nogud.​—Proveb 2:11.

Narafala rod se God i givim “paoa ya we i bigfala tumas” blong protektem yumi long taem blong trabol. (2 Korin 4:7) Mo taem wan Kristin i kasem bigfala trabol, “pis we God i putum hem i bigfala moa, i bitim save blong yumi olgeta” blong lukaotem hat mo tingting blong hem. (Filipae 4:7) Yes, ol Kristin oli putum klos blong “faet agens long ol haeman, mo ol lida blong ol Devel.”​—Efesas 6:​11-13.

?Olsem wanem yu save kasem proteksen olsem? Faswan samting i blong kasem save long Jeova mo Pikinini blong hem, Jisas Kraes. (Jon 17:3) Ol Wetnes blong Jeova oli save givhan long yu blong folem rod ya. Taem yu stap frengud moa wetem Jeova, bambae yu luksave kaengud fasin blong hem blong protektem man. God i talem tok ya we yumi save ridim long Ol sam 91:14 se: “Hae God i talem se ‘Mi bambae mi sevem olgeta we oli stap laekem mi tumas, mi bambae mi lukaot long olgeta we oli save se mi mi Hae God.’ ”

Yes, sipos yu stap holemstrong long God, bambae God i blesem yu wetem laef ya we i no save finis long nyufala wol we i stap kam. Jeova i mekem strong promes long olgeta we bambae oli stap long taem ya se: “Bambae i no gat wan samting i mekem oli seksek. From Jeova blong ol ami i talem olsem.” (Maeka 4:4) Bambae i no moa gat sik mo ded. (Revelesen 21:4) Mo tu, yu save stap sefgud naioa​—sipos yu fren gud wetem Jeova. Yu save talem olsem man blong raetem Ol Sam se: “Hae God ya we i mekem skae mo graon, hem nomo i stap givhan long mi.”​—Ol Sam 121:2.

[Futnot]

[Tok Blong Pija Long Pej 6]

Ol Kristin blong Efesas oli sakemaot evri samting we i joen long fasin ya blong wosip long ol rabis paoa

[Tok Blong Pija Long Pej 7]

Bambae i no moa gat fraet ananit long Kingdom blong God