?Yu Yu Tingbaot?

?Yu yu glad blong ridim ol nyufala namba blong Wajtaoa? Traem luk sipos yu save ansa long ol kwestin ya:

▫ ?Wanem help we i wok we yumi save givim long olgeta we oli sik mo ol olfala we oli stap long kongregesen tede?

Long taem bifo long Kristin kongregesen, i gat lis blong ol wido we oli nidim sam samting blong sapotem laef blong olgeta. (1 Timote 5:​9, 10) Sem mak tede, maet ol elda oli save mekem lis blong ol man we oli sik mo ol olfala we oli nidim man blong givhan long olgeta. I no blong ol elda nomo blong lukluk long bisnes olsem. Yumi evriwan i mas lukluk long ol nid olsem. (1 Timote 5:​4-8)​—8/15, pej 28-9.

▫ ?Yumi save bilivim store blong Jona long Baebol se wan fis i solemdaon hem?

Yes, wan spem welfis no wan sak, i save solemdaon wan man. Antap moa, Jisas i pruvum se store blong Jona i tru. (Matyu 12:​39, 40)​—8/15, pej 32.

▫ ?Man i save kasem wanem trabol sipos hem i bilif long ol ston blong givim laki mo majik?

Fasin blong yusum ol samting ya i no rili lukaotgud long ol man mo givim tingting se oli save kontrolem laef blong olgeta nomo, be i daonem fasin blong man blong yusum waes blong olgeta blong winim ol trabol mo i leftemap tingting blong olgeta blong lukluk i go long laki olsem wan samting we i save mekem man i haremgud olgeta. Trastem paoa blong majik i save mekem se man we i yusum i gat wan gyaman filing blong sef. Impoten moa, man we i trastem paoa blong majik no ston blong givim laki, i stap letem ol devel we man i save luk oli kontrolem laef blong hem.​—9/1, pej 4.

▫ ?Wanem ol fofala fasin we oli save givhan blong mekem wan mared i stap longtaem?

Fasin blong laekem blong lesin, save talem sore, i kam i naf blong soemaot strong sapot long filing, mo wantem soemaot lav. (1 Korin 13:​4-8; Efesas 5:33; Jemes 1:19)​—9/1, pej 20.

▫ ?Wanem wan rod we Jeova i yusum blong givhan long olgeta we oli kasem trabol blong oli save stanap strong longtaem?

Jeova i mekem samting ya tru long ol eksampel long fasin blong stanap strong longtaem, we oli stap long tok blong Hem Baebol. (Rom 15:4) Taem yumi tingtinggud long ol eksampel ya, samting ya i leftemap tingting blong yumi blong stanap strong longtaem, be i no hemia nomo, yumi lanem plante samting long saed blong olsem wanem yumi save stanap strong longtaem.​—9/15, pej 11-12.

▫ ?Wanem ya fasin fasgud long God?

Fasin fasgud long God i minim fasin blong ona no wosip long Jeova we i pusum yumi blong mekem samting we Hem i glad long hem, nating se yumi fesem ol strong traem, from we yumi laekem God long hat blong yumi.​—9/15, pej 15.

▫ ?Yumi mas tingbaot fasin sore blong God olsem wanem?

Neva yumi mas ting nating long bigfala fasin sore blong God. Yumi mas mekem sem mak long Pol mo soem fasin tangkyu blong yumi taem yumi faet strong agensem sin we i stap long yumi. (1 Korin 9:27) Long rod ya, nating se yumi fesem trabol, bambae yumi soemaot se yumi rili wantem mekem samting we i stret.​—10/1, pej 23.

▫ ?From wanem i stret nomo we Pol i talem longfala tingting fastaem olsem wan rod blong soemaot lav?

I gat wan tok we i talem se, i no save gat fasin blong joengud olsem Kristin sipos ol man oli no gat longfala tingting, hemia se, sipos oli no stap gat longfala tingting blong givgivhan long ol narafala. I olsemia from we yumi evriwan yumi no stretgud olgeta mo ol slak fasin blong yumi oli traem tingting blong narafala. Taswe, sipos i gat lav long medel blong ol brata bambae samting ya i mekem longfala tingting i stap.​—10/15, pej 21.

▫ ?Ol Faswan Kristin Oli Yusum Nem Blong God?

Pruf i talem se yes. Jisas i bin tijim ol man blong hem blong prea long God se: “Papa blong mifala we yu stap long heven, nem blong yu i tabu. Mifala i wantem we olgeta man oli ona long yu.” (Matyu 6:9) Mo long en blong minista wok blong hem, hem i prea se: “Mi mi stap talemaot nem blong yu, blong mekem ol man ya we yu yu tekemaot olgeta long han blong wol blong givim long mi, oli save yu.” (Jon 17:6) Antap moa, ol faswan kopi blong Septuagint oli gat nem blong God we oli raetem long ol fo leta long Hibru lanwis.​—11/1, pej 30.

▫ ?Wanem ol eksampel long Baebol we oli soemaot se rod we yumi folem blong winim ol mastik blong yumi i save gat paoa long laef blong yumi tu?

King Sol i no wantem lesin long advaes, mo ol mastik blong hem oli kam plante, mekem se hem i ded from God i no glad long hem. (1 Samuel 15:​17-29) Long defren fasin, nating se King Deved i gat ol mastik mo ol sin, hem i tanem tingting blong hem mo hem i stap holem strong long Jeova. Ol eksampel ya long Baebol oli soem se fasin blong talemaot ol mastik blong yumi i givhan long yumi blong holemtaet wan gudfala fasin fren wetem Jeova mo blong gat jans blong kasem laef we i no save finis. (Ol Sam 32:​1-5)​—11/15, pej 29-30.

▫ ?Olsem wanem Jeova i givhan long ol man blong hem taem oli kasem trabol from ol disasta no ol narafala trabol olsem?

Jeova i givhan long olgeta, i no wetem wan merikel blong stopem ol paoa raonabaot long yumi no sam nara bigfala wok, be wetem wan narafala paoa we plante man oli no kasem save long hem​—lav. Yes, i tru Jeova i laekem ol man blong hem, mo hem i trenem olgeta blong gat wan strong lav long wanwan long olgeta blong hem i save mekem sam samting long olgeta we i luk olsem ol merikel. (1 Jon 4:​10-12, 21)​—12/1, pej 10.