?I Stret We Yu Folem Enikaen Fasin Blong Wosip?

STRONG san long medel dei i mekem se wan smol taon long Afrika i hot we i hot. Ol man oli save harem ol defren bit blong dram, singsing, mo noes blong ol man we oli stap klapem han blong olgeta from glad, ol noes ya i stap kamaot long wan vali kolosap. Be hemia i no wan taem blong olgeta man oli joen blong haremgud nomo. Hem i wosip blong ol man Afrika we i folem kastom blong olgeta. Be, ol saon ya oli stap traem blong winim ol strongfala voes we oli no joengud we oli stap kam long wan karismatika jyos we i stap kolosap. Long ples ya, ol man blong wosip we oli letem filing i lidim olgeta, oli stap mekem merikel long “ol sikman blong oli kamgud bakegen” mo oli stap toktok long ol narafala lanwis. Long nara en blong taon bakegen i gat wan narafala grup blong wosip. Wan bigfala voes blong wan man Muslim i singaot ol man we oli stap wosip wetem hem blong oli kam prea.

Yes, long plante bigbigfala taon mo smosmol taon long Afrika, man i save luk plante defren kaen fasin we ol skul oli stap folem blong mekem wosip. Long plante yia finis, ol man Afrika oli glad blong folem ol prapa kastom blong skul blong olgeta. Be afta, ol misinari blong Krisendom oli biaen long ol ami blong ol defren kantri long Yurop, oli kam long Afrika, mo oli yusum ol raf fasin blong traem fosem evriwan blong kam “Kristin”​—⁠mo tu, oli traem blong jenisim prapa nem blong ol man ya oli kam ol Kristin nem.

?Wanem risal i kamaot? Oli statem wan skul we i meksemap ol bilif blong kastom mo fasin blong ol man Afrika wetem ol bilif blong skul we i kam long defren kantri. Kasem tede, plante “Kristin” man blong wosip oli stap yusum ol ston blong givim laki mo ol majik folem kastom blong Afrika. Antap long samting ya, ol misinari blong Krisendom oli mekem fasin we i spolemgud nem blong trufala Kristin skul, mo taem oli aot, oli livim ol man wetem filing blong kros agensem olgeta. Olgeta nao, oli gat bighaf blong fol from sam man Afrika we tede oli no wantem lesin long Baebol.

Nating se i olsem, long plante ples long Afrika, ol man oli stap mekem yet plante defren kaen fasin blong “Kristin Skul.” Long ol yia we oli jes pas, ol grup blong karismatik jyos oli bin kam antap bigwan; namba blong ol jyos we oli stap mekem merikel i bin kam bigwan moa. Wan woman blong raetem nyuspepa i eksplenem ol samting we oli stap pulum ol man long ol jyos ya taem hem i talem se, ‘tingting blong ol man Afrika blong go long skul i stanap bigwan long ol samting we oli save kasem from. Long tingting blong ol man Afrika, ol skul oli mas nafgud blong givim ol samting blong laef we i mekem ol man oli haremgud. From samting ya, ol man Afrika we oli bilif se fasin blong wok wetem ol speret i gud long plante samting, oli ting se fasin blong ol skul we oli wok wetem speret [no fasin blong mekem merikel] i laenapgud wetem samting we oli nidim blong sapotem fasin blong laef blong olgeta.’ Be, sore tumas, i klia nomo se oli stanemap plante karismatik jyos blong mekem bisnes blong kasem mane nomo.

Tede, bitim 6,000 grup blong skul oli stap wok long Afrika. Maet yumi bin harem se olgeta skul mo grup ya oli stap soemaot rod blong kasem laef. Be impoten kwestin we i stap se, ?God i harem olsem wanem?

?God i Glad Long Enikaen Skul?

Tru ya, Man we i Wokem Olgeta Samting long heven mo wol i no save livim yumi we i no soem rod long yumi long saed ya. (Emos 3:7; Ol Wok 17:​26, 27) Mo i gat plante pruf se Baebol nao i soemaot rod blong God long ol man. Yes, Baebol i no wan buk blong ol waetman nomo, olsem samfala man oli talem. Blong talem stret, yumi no save givim ona long eni man​—⁠blakman no waetman​—⁠from ol gudfala samting long buk ya. Seken Timote 3⁠:16 i talem se: “Olgeta tok ya blong Baebol oli kamaot long God fastaem.” Ol trutok blong Baebol, ol tijing blong hem we oli save wokgud long laef blong ol man, longfala taem we hem i stap finis, fasin we hem i stap yet, nating se ol man oli mekem ol rabis samting blong traem spolem, ol profet tok blong hem we oli stretgud, mo namba blong hem we i plante moa bitim namba blong ol narafala buk raonabaot long wol​—⁠hemia ol pruf we oli soemaot klia se God i stampa blong Baebol.

?Buk ya i tijim yumi long wanem? Wan samting, hem i talem long yumi se i gat wan ‘tru God’ nomo. (Jon 17:⁠3) Sipos i olsem, ?olsem wanem i save gat trutok long olgeta skul? ?I no tru se ol skul oli stap gat ol defdefren tingting long bisnes ya se God i olsem wanem mo Hem i hu? Jemes, man blong raetem Baebol i tokbaot wan “skul we i klin mo i tru.” (Jemes 1:​27, Today’s English Version) Sipos i gat nid blong makemaot trufala skul, i min se i mas gat gyaman skul tu. Samting ya i no laenap wetem tingting ya se olgeta skul oli ol defren rod nomo blong kam kolosap long God.

Ol Rul Long Saed Blong Wosip Long Man We i Wokem Olgeta Samting

?Wanem stret rod blong mekem wosip long God? Baebol i tijim yumi se trufala wosip i stanap long stret save. Wan taem, bigfala profet, Jisas Kraes, i talem long wan woman Sameria se: “Yufala i stap mekem wosip long God, we yufala i no save hem.” (Jon 4:22) ?Maet yu yu stap mekem olsem tu? ?Wan man i bin tijim yu se God ya we i gat Olgeta Paoa i gat prapa nem blong hem, hemia Jeova? (Ol Sam 83:18) ?Yu yu save stampa tingting blong hem long saed blong fyuja blong ol man mo wol? (Matyu 6:​9, 10; Efesas 1:​9, 10; 3:11) ?Skul blong yu i tijim yu long wan trufala hop long saed blong wan fyuja we i moa gud? Mo sipos yu ting se yu yu wan Kristin, ?yu yu save yusum Baebol blong eksplenem ol bilif blong yu, no oli ol bilif we yu jes kasem long papa mama blong yu nomo, yu no tekem taem blong jekemap olgeta?

Sipos yu faenem se yu no gat stret save, yu save kasem stret save ya taem yu stadi long Tok blong God, Baebol. Jeova God i wantem se ol man we oli rili wosip long hem, oli mas savegud ol samting we Tabu Buk ya i tijim. Antap long samting ya, hem i wantem se oli folem ol tijing ya long laef blong olgeta. Yumi mas gat sem tingting olsem man blong raetem Ol Sam we i talem se: “Hae God, tok blong yu hem i laet we i stap lidim mi, hem i laet long rod blong mi.” (Ol Sam 119:105) ?Skul blong yu i bin halpem yu blong kasem save long Baebol go kasem wanem mak?

Wan narafala impoten haf blong trufala wosip, hemia bilif long Jisas Kraes se hem i wan bigfala profet, be tu, hem i stret Pikinini blong God, wan nomo we hem i gat. Baebol i talemaot klia se Jisas i “Bigfala Man we God i yusum blong givim laef.” (Ol Wok 3:​15, NW; 4:12) Plante man oli talem se oli bilif long Jisas, ?be wanem i soemaot se oli gat trufala bilif? Man we i gat trufala bilif long Kraes i mas obei long ol tijing blong hem. God hem wan i talem samting ya taem hem i talem se: “Hemia Pikinini blong mi ya, we mi laekem hem tumas. Yufala i mas lesingud long hem.” (Mak 9:⁠7) Taswe, ol trufala man blong mekem wosip oli traehad oltaem blong folemgud ol trak blong leg blong Jisas. (1 Pita 2:​21) Wan rod we oli save folem blong mekem olsem, hemia taem oli joen long wok blong prij long pablik, wok we Jisas i bin statem. (Matyu 4:17; 10:​5-7) ?Skul blong yu i leftemap tingting blong yu blong joen long wok ya?

Lav tu i wan fasin we yumi nidim blong mekem trufala wosip. Baebol i talem se Jeova God i stampa blong lav, mo Jisas i talem long ol man blong hem se bambae olgeta man oli luksave se oli man blong hem from we oli stap laeklaekem olgeta. (Jon 13:​34, 35; 1 Jon 4:⁠8) Taem yumi tingbaot we plante milyan man tede oli talem se oli Kristin, ?samting ya i mas mekem olgeta man long wol oli laeklaekem olgeta bigwan, no? Be, samting we i stap kamaot se, wol blong yumi i kam wan ples we i no gat lav nating. Ol faet oli tekemaot laef blong plante milyan man long ol handred yia nomo we oli jes pas. Fasin blong brekem loa mo ol raf fasin oli stap gohed blong kam bigwan moa. Ale, askem yu wan se, ‘?Sipos evri man oli blong skul blong mi, wol i save kam wan ples we fasin blong laekem ol man i kam fulap moa long hem?’

Laswan samting, Baebol i soem se ol trufala man blong wosip, oli no mas joen nating long wol we i no save God. Taem God i jusumaot nesen blong Isrel bifo, olsem ol man blong holem klin wosip, hem i givim woning long olgeta se oli no mas frengud wetem ol nesen raonabaot long olgeta we oli gat ol rabis fasin. (Dutronome 7:​1-6) Long Jon 17:​16, Jisas Kraes i talem sem samting long saed blong ol man blong hem se: “Olsem we mi mi no man blong wol ya, olgeta ya tu oli no man blong wol ya.” Ol trufala man blong wosip long God oli no stap joen long politik, rabis fasin blong seks, fasin griri long bisnes, no eni waes blong wol we i no givim ona long God. (Jon 18:36; 1 Jon 2:​15-17) Oli obei long oda we i stap long Rom 12:​2, se: “Yufala i mas no letem fasin blong yufala i kam olsem fasin blong ol man long wol.” ?Skul blong yu i stap leftemap tingting blong yu blong mekem olsem?

Yu Save Kasem Help

Yes, fasin blong yu blong wosip i rili impoten long tingting blong God. Tingting blong hem se, i gat wan trufala skul nomo. (Efesas 4:​4-6) Long sotfala storeyan blong yumi, yumi jes tokbaot sam long ol stampa poen long ol tijing blong Baebol. I gud yu traehad blong lanem moa.

Nomata wanem skul yu bin stap long hem long ful laef blong yu, ol Wetnes blong Jeova oli save halpem yu long saed long Baebol. Ol man raonabaot long wol oli savegud olgeta from bigfala wok we oli stap mekem blong tijim ol man long saed blong Baebol. Oli harem se oli mas givhan long ol man long evri kala mo wanem skul we oli stap long hem, blong ol man ya oli kasem wan save long Baebol we i dip moa. (Proveb 2:​1-6) Oli prentem ol buk long saed blong Baebol we oli bin mekem dip stadi long olgeta fastaem.b Mo tu, ol Wetnes blong Jeova oli save kam long haos blong yu blong tijim yu long samting we yu wantem kasem save long hem long Baebol, we yu no pem wan samting. Plante milyan man long wol oli stap kasem gudfala frut from program ya blong tijim ol man long saed blong Baebol. I gud yu traem mekem olsem. Tru ya, yu mas mekem olsem, from we fasin blong yu blong mekem wosip i rili impoten.

[Ol futnot]

[Tok blong pija long pej 5]

Ol misinari blong Krisendom oli mekem samting we i spolemgud nem blong trufala Kristin skul

[Tok blong pija long pej 5]

Plante karismatik jyos oli blong mekem mane nomo

[Tok blong pija long pej 6]

Bilif long Jisas i wan impoten haf blong trufala wosip

[Tok blong pija long pej 7]

Ol Wetnes blong Jeova oli halpem plante milyan man blong kasem stret save taem oli mekem fri Baebol stadi long haos blong olgeta