Ol Wok Haed Long Nem Blong Masta

LONG Maj 1995, sam man oli sakem wan posen gas long stesen blong tren long Tokyo, Japan. Oli kilim 12 man i ded, mo oli mekem plante taosen man oli sik. Trabol ya i mekem wan wok haed i kam long klia ples. Wan skul we nem blong hem Aum Shinrikyo (Fulwan Trutok), i bin hivimap plante bom blong posen gas long fasin haed. Hem i yusum posen gas ya blong kasem samting we hem i wantem, we i wan tokhaed long grup blong olgeta nomo.

Wan manis biaen, long Oklahoma, Yunaeted Stet, wan bom i bosta mo i spolemgud wan bigfala haos blong gavman. Hem i kilim 167 man i ded. From ol pruf, i luk olsem se trabol ya i kamaot from samting we i hapen tu yia bifo. Long taem ya, 80 memba blong wan smosmol skul we oli kolem Davidian Branj, long Wako, Teksas, oli ded long wan faet wetem gavman. Mo tu, bom we i bosta long Oklahoma i soemaot klia wan samting we i haed, we bighaf blong ol man oli no save long hem. Hemia se, long Yunaeted Stet, i gat plante grup blong man we oli stap kasem trening olsem ol ami, mo maet sam long olgeta oli stap mekem plan long fasin haed blong girap agensem gavman.

Samtaem biaen, long en blong 1995, kolosap long Grenobel, Franis, ol man oli faenem dedbodi blong 16 man long bus. Faea i bin bonem olgeta. Olgeta ya oli memba blong Oda blong Haos Prea blong San. Smol grup ya blong skul i kamaot long nyus long Swiselan mo Kanada long Oktoba 1994, from we 53 memba blong hem oli ded, maet oli bin kilim olgeta nomo i ded, no sam narafala man oli kilim olgeta i ded. Nating se trabol ya i kamaot, grup ya i gohed blong mekem wok blong hem. Kam kasem tede, ol mak we hem i wantem kasem mo tingting we i pusum hem, oli stap haed.

Ol Denja Blong Skul We i Wok Haed

!From ol samting we oli kamaot ya, yumi no sapraes se plante man oli no moa trastem ol grup blong skul! I sua se, wan man i no wantem sapotem wan grup we i wok haed, nating se hem i wan grup blong skul no nogat, sipos grup ya i mekem ol nogud fasin mo i spolem tras we man ya i gat long hem, mo sipos grup ya i pulum hem blong folem sam plan we hem i no agri long olgeta. ?Yumi save mekem wanem blong no foldaon long trap we yumi folem ol grup haed ya we maet wok blong olgeta i nogud?

I klia se, wan man we i stap tingting blong joen long wan grup we i wok haed, i mas savegud ol mak we grup ya i stap traem blong kasem. Ol fren mo ol narafala man oli no mas pusum hem blong joen, mo ol disisen blong hem oli no mas stanap long filing nomo, be long ol trufala samting. Rimemba se, sipos i gat nogud frut i kamaot from ol disisen ya, ating man ya nao bambae i karem frut ya, i no ol narafala man.

Fasin blong folem ol rul blong Baebol i beswan rod blong stap longwe long ol grup we oli denja, mo we stampa mak blong olgeta i no stret. (Aesea 30:21) Hemia i minim se yumi mas no joen long politik, yumi mas soem lav long ol narafala man, mo long ol enemi blong yumi tu, yumi mas stap longwe long ol ‘rabis samting we tingting blong yumi i wantem,’ mo yumi mas soemaot ol frut blong speret blong God long laef blong yumi. Antap long hemia, ol trufala Kristin oli no mas joen long ol bisnes blong wol, olsem Jisas. From samting ya, oli no save joen long ol grup blong wol we oli wok haed.​—⁠Galesia 5:​19-23; Jon 17⁠:​14, 16; 18:36; Rom 12:17-21; Jemes 4:⁠4.

Ol Wetnes blong Jeova oli stadi oltaem long Baebol. Oli tinghevi long bilif blong olgeta, mo oli soemaot klia se oli traem folem ol rul blong hem long laef blong olgeta. Long olgeta ples blong wol, ol man oli savegud olgeta olsem wan grup blong skul we i ‘lukaot kwaet laef, mo i traehad blong kasem.’ (1 Pita 3:​11) Buk ya Jehovah’s Witnesses​—⁠Proclaimers of God’s Kingdom we olgeta nomo oli wokem, i talem tru, i se: “Ol Wetnes blong Jeova oli no wan grup we i wok long fasin haed nating. Ol buk blong olgeta oli eksplenem klia ol bilif blong olgeta we oli stanap long Baebol, mo eni man i save ridim ol buk ya. Antap long hemia, oli mekem spesel fasin traehad blong singaotem olgeta man oli kam joen long ol miting blong olgeta. Long ples ya, ol man oli save lukluk wetem prapa ae blong olgeta mo harem wetem prapa sora blong olgeta, ol samting we i stap kamaot.”

Trufala skul i no folem enikaen rod blong wok long fasin haed. Ol man we oli wosipim trufala God, oli kasem tijing blong no gyaman se oli hu, mo blong no haedem ol wok blong olgeta olsem ol Wetnes blong Jeova. Ol faswan disaepol blong Jisas oli kavremap olgeta ples long Jerusalem wetem tijing blong olgeta. Oli talemaot long klia ples ol bilif mo wok blong olgeta. Samting ya i tru tu long saed blong ol Wetnes blong Jeova tede. Be, sipos wan gavman i rul long fasin we i strong tumas, nao i mekem i no stret mo i blokem fasin fri blong wosip, ale, yumi save se ol Kristin oli mas gohed nomo wetem wok blong olgeta long fasin we oli lukaotgud mo oli no fraet. Oli ‘obei long God fastaem, oli no save obei long man nomo.’ Oli mas mekem olsem blong gohed wetem strong tingting blong wetnes long fored blong ol man.​—Ol Wok 5:​27-29; 8:⁠1; 12:​1-14; Matyu 10:16, 26, 27.

Sipos samtaem finis yu bin tingting se ol Wetnes blong Jeova oli wan krangke grup we i wok long fasin haed, ating hemia i kamaot from we yu no savegud olgeta. Ating samting ya i sem mak long plante man long faswan handred yia.

Ol Wok japta 28 i tokbaot wan miting we aposol Pol i mekem long Rom wetem “ol haeman blong ol man Isrel.” Oli talem long hem se: “Mifala i glad blong harem ol tingting blong yu. From we mifala i save we olbaot long evri ples, ol man oli stap tok nogud long kampani ya blong yu.” (Ol Wok 28⁠:​16-22) Blong ansa, Pol i “talemaot tok blong hem long olgeta. Hem i talemgud long olgeta we God i king, mo we oli mas ona long hem.” Mo “sam long olgeta oli harem tok blong hem.” (Ol Wok 28⁠:​23, 24) Tru ya, stret save ya we oli kasem long saed blong trufala Kristin skul i save givim blesing long olgeta blong olwe.

Ol Wetnes blong Jeova oli givim laef blong olgeta blong mekem wok blong Jeova long klia ples long fored blong ol man. Taswe, oli glad blong talemaot klia ol wok mo bilif blong olgeta, long ol man we oli wantem save trutok long saed ya. I gud we yu tu yu traem faenemaot moa. !Long rod ya, bambae yu gat stret save long saed blong skul blong olgeta!

[Tok blong pija long pej 6]

Ol Wetnes blong Jeova oli glad blong talemaot klia se oli hu, mo wanem wok blong olgeta