Ripot Long Wok Blong Kingdom
“Evri Dei, Long Ples Blong Maket”
APOSOL Pol i tekem evri jans blong talemaot mesej blong Kingdom. Blong faenem ol man we oli stret blong kasem trutok, hem i toktok ‘wetem ol man Isrel, long haos prea . . . mo evri dei, long ples blong maket, hem i stap toktok wetem ol man olbaot.’—Ol Wok 17:17.
Stat long faswan handred yia, ol trufala man blong wosip long Jeova oli soem fasin blong wok strong olsem ya. (Matyu 28:19, 20) Long sem fasin, ol Wetnes blong Jeova tede oli wok strong, mo oli yusum plante defren fasin blong givhan long ol man we hat blong olgeta i stret, blong oli faenem stret save blong trutok. (1 Timote 2:3, 4) Store ya we i kam long Ostrelya i soemaot samting ya.
Faef dei evri wik, wan long tufala ya, Sid no Harold i kam long wan ples blong tekem tren long Sidne. Hem i stanemap wan smol tebel blong soemaot sam buk we oli tokbaot Baebol. Long faef yia we oli pas finis, tufala i talemaot gud nyus blong Kingdom blong God long fasin ya. Sid, we i gat 95 yia, i talem se: “Taem mi kasem 87 yia, mi no moa naf blong draevem trak. Mi harem nogud long samting ya from we mi laekem wok blong givim wetnes long olgeta man. Wan dei, mi stap kolosap long Eko Poen, wan ples we plante turis oli kam long hem, long Katumba. Mi luk wan man we i gat gudhan blong droem ol pija, mo i stap salem sam pija blong ol naesfala ples. Mi luklukgud ol pija ya, mo mi tingting se: ‘!Ol pija long ol buk we mi gat long basket blong mi oli moa naes, mo oli no sas tumas olsem olgeta ya!’ Taswe, mi tekem disisen blong mekem wan smol tebel blong soem ol buk, mo putum tebel ya long wan ples we plante turis oli kam long hem. Olsem nao, mi save soemaot long ol man we oli pas, ol buk blong ol Wetnes blong Jeova, we oli gat plante naesfala pija.
“Fo yia i pas finis, mi seftem tebel ya i go long Sidne, mo Harold i joen wetem mi. Mitufala i serem wok blong lukaot long tebel ya blong soemaot ol buk, mo mitufala i makemaot taem blong wok wetem prapa kongregesen blong mitufala tu.” Harold, we i gat 83 yia nao, i talem se: “Stat long Mande, go kasem Fraede, plante man oli no stap long haos blong olgeta. Taswe, fasin blong mitufala blong seremaot mesej blong Kingdom i mekem se mitufala i stap long ples we ol man oli stap. I tru se, mitufala i kasem moa frut. Long kantri ya we ol man oli no stap karem plante buk blong ol Wetnes, plante oli sapraes blong luk bigfala namba blong buk we mitufala i seremaot.”
Sid i talem se: “Long ol yia we oli pas, mitufala i muf i go long fo no faef defren ples. Smoltaem nomo afta we mitufala i kam long wan nyufala ples, ol man oli save mitufala. Samfala oli kam blong askem sam buk. Sam oli wantem kasem ansa long sam kwestin. Mo sam narafala oli wantem storeyan nomo blong sam menet.” Sid i laf, i talem se: “Olsem ya, i no mi we i gobak blong visitim ol man, be ol man oli kam luk mi bakegen.”
Harold i ademap se: “Plante man oli rili intres long Baebol. Long wan manis, fo man oli stat blong stadi Baebol wetem ol Wetnes, afta we mitufala i givim sam buk long olgeta, mo from we mitufala i yusum Baebol blong ansa long sam kwestin we oli askem. Ol frut olsem ya oli leftemap tingting blong mitufala bigwan.”
Olsem Sid mo Harold, mo olsem aposol Pol tu, ol Wetnes blong Jeova long evri ples oli yusum olgeta fasin we oli save, blong seremaot impoten mesej blong olgeta. Olsem ya, oli gohed blong talemaot “gud nyus long olgeta ples long wol.”—Matyu 24:14.