Wan Nambawan Rod Blong Prij Long Pablik Ples
1. Ol kongregesen we oli gat ol eria we plante man oli stap pas long hem oltaem, ?oli save mekem wanem?
1 Ol kongregesen we oli gat ol eria we i gat plante man oli stap pas long hem oltaem, oli save mekem plan blong prij long pablik ples. Oli save yusum wan tebol no wan troli blong soemaot ol buk, mo magasin. Sipos oli yusum wan troli, oltaem i mas gat wan pablisa we i stanap no i sidaon klosap long troli ya. Oltaem i mas gat tu pablisa we tufala i stap lukaot long ol buk we oli stap long tebol. Olgeta we oli mekem wok ya, oli mas kaen gud long ol man, oli fren gud long ol man mo oli welkamem gud ol man. Sipos wan man i soemaot se hem i intres long ol buk, i gud we wan long tufala pablisa i statem storian wetem hem. Hem i save talem se: “?Yu yu tingbaot wanem we Baebol i talem long saed blong samting ya?” Narafala pablisa i save gohed blong lukaot long ol buk, taem hem i stap lesin long narafala we i tekem janis blong prij.
2. Yu tokbaot wan stori we i soemaot se fasin blong prij long ol pablik ples, wetem ol buk we yumi putum long tebol, i save karem gudfala frut.
2 Rod ya blong prij long ol pablik ples, i mekem se naoia i gat plante man we oli stadi Baebol. Wan studen long wan hae skul, i jusum blong raetem wan risej long saed blong ol Witnes blong Jehova. Be hem i no save faenem wan Haos Kingdom. Ale long nekis wik, hem i luk wan tebol we i stap long eria blong skul, we i gat ol buk blong yumi oli stap long hem. Biaen, hem i stat blong stadi Baebol, mo naoia hem i wan pablisa we i baptaes finis. Mo hem tu i joen blong prij long ol pablik ples.
3. ?Samfala oli harem olsem wanem taem oli prij long ol pablik ples?
3 Wan sista we i glad tumas blong prij long ol pablik ples, i talem se: “Samfala oli stop long ples we mifala i putum ol magasin, mo oli karem ol niufala magasin. Sam narafala, oli neva save ol Witnes blong Jehova. Mi luk se fasin blong prij olsem, i save mekem se trutok i kasem plante moa man.” Wan narafala sista i talem se: “Hemia wan nambawan rod blong prij, from we ol man oli kam long yu, nating se oli no intres tumas be oli wantem kam lukluk.”
4. ?From wanem i gud we yumi putum ol buk long sem taem, mo long sem ples evri wik?
4 I moa gud blong putum tebol wetem ol buk, long sem taem, mo long sem ples evri wik. Olsem nao, bambae ol man oli lan blong luk yumi, mo sloslo bambae oli no fraet blong kam tekem ol buk mo askem kwestin. ?Kongregesen blong yu, i mekem plan finis blong prij long ol pablik ples? Sipos yes, maet yu tu yu glad blong joen long nambawan rod ya, blong ‘talemaot Kingdom blong God long ol man.’—Luk 9:60.