Ol Problem Blong Ol Step Famle

?OLSEM WANEM OL STEP FAMLE OLI SAVE HAPI?

Long plante ples long wol, fulap man oli laef long wan step famle. Ol step famle ya, oli stap fesem ol problem we oli no kamaot long ol narafala famle. Samting we i strong moa blong mekem long wan step famle, hemia blong lukaot long ol pikinini. Nating se i olsem, tufala haf we oli kam biaen bambae oli soem se i gat rod blong lukaotgud long ol pikinini we oli gruap long wan step famle.

LONGTAEM FINIS I KAM, PLANTE MAN OLI GAT TINGTING YA SE OL STEP PAPA MO OL STEP MAMA OLI NOGUD. Taem yumi pikinini yet, plante long yumi i harem stori long saed blong Cinderella, we i harem nogud from we step mama blong hem i mekem i strong tumas long hem. Long Yurop tu, ol pikinini oli savegud kastom stori blong Snow White and the Seven Dwarfs. !Stori ya i talem se step mama blong Snow White i wan rabis woman blong mekem posen!

Be, ?ol stori ya oli givim stret tingting long saed blong ol step famle?a ?I tru se olgeta step papa mo step mama oli gat raf fasin? No gat, samting ya i no tru. Bighaf blong ol papa mo mama, oli wantem nomo se ol step pikinini blong olgeta, oli haremgud. Be, ol papa mama ya oli mas fesem sam bigfala problem we oli kamaot long step famle.

Problem We i Kamaot From Fasin Blong Lukaot Long Ol Pikinini

Taem faswan mared blong wan man mo woman i brokdaon, plante taem hem i from we tufala i no bigman yet long tingting blong tufala. Be, taem wanwan long tufala i mared bakegen, fasin blong lukaot long ol pikinini i save spolem fasin fren blong tufala. Sam ripot oli soem se long evri 10 step famle, 4 oli mekem divos faef yia nomo afta we oli mared bakegen.

Man mo woman we tufala i jes mared, maet tufala i no luksave se mared blong tufala i mekem ol pikinini oli harem nogud long filing blong olgeta, oli no moa save hu blong trastem, mo oli jalus no kros from we wan narafala man no woman i kam long famle blong olgeta. Maet step pikinini ya i ting se stret papa no stret mama blong hem i laekem moa man ya no woman ya i winim hem. Antap long samting ya, wan papa no mama we hasban no waef blong hem i lego hem, maet hem i no kasem save from wanem pikinini blong hem i gohed yet blong laekem papa no mama ya we i lego olgeta finis. Wan boe i traem eksplenem gudfala fasin fren we hem i gat wetem papa blong hem, taem hem i se: “!Mama, mi mi save se Papa i bin mekem i nogud long yu, be hem i bin mekem i gud tumas long mi!” Tok ya we i kamaot long hat blong pikinini, hem i save mekem wan mama i kros tumas long papa blong pikinini ya.

Wan step papa i talem se: “Mi no rere blong winim olgeta problem we oli save kamaot taem mi traem tijim ol step pikinini blong mi. Mi gat tingting ya nomo se, naoia we mi maredem mama blong olgeta, mi nao mi papa blong olgeta. !Mi ting se bambae i isi nomo olsem, be mi rong olgeta! Mi no kasem save long lav we ol pikinini oli gat long stret papa blong olgeta. From samting ya, mi mekem plante mastik.”

Ol problem oli save kam antap moa taem i nidim blong stretem pikinini. Ol pikinini oli nidim we papa mama i stretem olgeta wetem lav, be plante taem, oli rebel agensem fasin stretem blong papa no mama blong olgeta. !Taswe, ating i hadwok moa long wan pikinini blong akseptem fasin stretem blong step papa no step mama blong hem! Plante taem, ol pikinini oli talem long step papa blong olgeta se, “!Yu yu no papa blong mi!” !Ol tok olsem oli save daonem tingting blong ol papa no mama we oli stap traehad blong mekem i gud long ol step pikinini blong olgeta!

?I gat rod blong lukaotgud pikinini long wan step famle? ?Ol step papa mo step mama oli save gat wan hapi step famle? Ansa blong tufala kwestin ya se, yes, sipos evriwan long step famle oli folem advaes we i kamaot long Tok blong God, Baebol.

[Futnot]

[Tok Blong Pija Long Pej 3]

“!Yu yu no papa blong mi!”