Oli Openem Wajtaoa Edukesen Senta Wan Lafet We i Go Long Jeova

LONG taem bifo, ol lafet blong gladtaem oli wan haf blong trufala wosip. Sam long ol lafet ya we ol man Isrel oli stap mekem bifo, oli gohed blong plante dei mo plante taosen man blong wosipim Jeova oli kam. Taem oli openem tempel blong Solomon, oli mekem wan lafet we i gohed kasem seven dei. Mo biaen, i gat lafet blong wan wik bakegen, hemia Lafet Blong Ol Wansaed Haos. Ol lafet ya oli givim jans long ol man Isrel blong tingbaot nambawan fasin we Jeova i bin soemaot long olgeta. Taem oli gohom “oli glad we oli glad tumas from ol samting ya we Hae God i mekem.”​—1 King 8:66.

Samting we i hapen long Wajtaoa Edukesen Senta long Pateson, New York, Yunaeted Stet, long manis Mei 17-22, 1999, i mekem ol man oli tingtingbak long ol lafet ya blong gladtaem we ol man Isrel oli mekem bifo. Hemia wan wik blong mekem ol spesel wok we oli joen wetem lafet blong openem ol niufala 28 haos blong Sosaeti. Ol haos ya oli blong mekem wok blong tijim Baebol i gohed long fulwol. Long spesel wik ya, olgeta 5,400 memba blong hedkwota long Brooklyn, Wallkill, mo Pateson oli visitim ol niufala haos ya long Pateson. Long olgeta man we oli visitim ples ya, i gat bitim 500 man we oli bin joen long wok blong bildim edukesen senta ya, wetem sam man we oli kam long ol 23 branj ofis blong Watch Tower Sosaeti, mo sam narafala man blong ol kongregesen klosap long ples ya​—ful namba blong olgeta i kasem 8,100 man.

Ol Samting We Oli Luk i Tijim Olgeta Long Plante Samting

Blong halpem ol man oli savegud wanem i stap long edukesen senta, i gat ol spesel ples blong soemaot ol pija wetem toktok, i gat sam video kaset blong tijim man, mo saen blong lidim man blong visitim ol ples. Long rum blong welkamem ol man, i gat wan naesfala tempel we oli wokem long smol saes blong soemaot tempel we i stap long Jerusalem, taem Jisas i stap long wol. Long sam narafala ples oli soemaot pija blong fastaem we Wajtaoa Baebol Skul Blong Gilead i stat, wetem ol bigfala asembli blong bifo, mo ol miting blong kongregesen. Mo tu, oli soemaot olsem wanem ol Witnes oli stap mekem ol Baebol stadi long ol haos wanwan​—olsem we plante milyan man oli stap mekem evri wik. Mo oli soemaot tu, wok we Ligal Dipatmen i stap mekem blong meksua se rod i open oltaem blong wok ya i gohed folem oda we Jisas i bin givim.​—Matiu 28:19, 20.

Long nekiswan bigfala haos, we i naf blong tekem 1,700 man, ol man we oli kam long lafet ya oli luk wan video kaset blong 33 menet, we taetel blong hem se, “I No Long Paoa​—!Be Tru Long Spirit Blong Mi!” Kaset ya i soemaot olsem wanem Wajtaoa Edukesen Senta i bin stat. Long kaset ya oli askem kwestin long sam man, mo ansa we oli givim i soem klia se Jeova nomo i stap lidim plan ya blong 15 yia finis, mo hem i blesem ol traehad blong mekem se plan ya i kasem mak blong hem. Plante taosen man oli bin givhan long wok blong bildim ol haos ya. Long wan taem long 1994, i gat 526 man blong wok oli stap. Insaed long namba ya, i gat 350 we oli wok fultaem, 113 we oli kam blong smoltaem nomo, mo 63 we oli stap gokam evri dei blong givhan. Plante moa man oli sapotem wok ya taem oli givim presen mane. Olgeta evriwan oli luksave se wok ya i no save gohed sipos Jeova i no sanem tabu spirit blong hem.​—Sekaraea 4:6.

Olgeta we oli visitim ples ya oli luksave se stamba tingting biaen long olgeta wok we oli gohed long edukesen senta, hem i blong leftemap tijing blong God. Taem man i kam insaed long faswan stori blong haos blong Gilead Skul, hem i save luk ol pija mo toktok we oli soemaot ol nambawan samting long saed blong spirit we oli stap long skul ya mo histri blong hem. Gilead Skul i bin trenem bitim 7,000 studen blong mekem wok blong misinari, i stat long faswan klas long 1943. Fastaem, skul ya i stap long Saot Lansing, New York. Long seken stori blong niufala haos ya, ol man oli save luk sam pija mo toktok long saed blong Skul Blong Ol Memba Blong Branj Komiti mo Skul Blong Ol Elda We Oli Goraon. Stat long Novemba 1995, branj skul ya i bin givim ol nambawan tijing long 360 memba blong Branj Komiti we oli kamaot long 106 kantri.

Ol man we oli kam visitim ol niufala haos ya, oli luksave se long plante eria oli no lukluk ol pija nomo. Oli save go insaed long ol wanwan dipatmen ya, visitim ol ofis mo ol narafala ples blong wok, mo luklukgud ol wok we i stap gohed. Wan impoten haf blong visit ya hemia haos blong Saon/Video Sevis. !Long ples ya oli yusum sam nambawan tul blong leftemap tijing blong Baebol! Olgeta we oli visitim ples ya, oli save luk sam pija mo video we oli soemaot olsem wanem oli rikodem voes blong man i go long kaset, mo olsem wanem oli wokem ol video kaset. Oli luk bigfala wok blong faenem mo rerem ol samting blong ol drama, olsem klos mo ol ting we oli stap long platfom. Oli luk olsem wanem blong rerem platfom long wan rod we i no sas be i stret mo naes. Oli luk olsem wanem blong yusum myusek long drama long wan rod we i save mekem man i harem olsem we hem i rili stap insaed long drama we hem i luk. Stat long 1990 kam kasem naoia, Sosaeti i bin wokem ten video kaset long 41 defren lanwis. Ol kaset ya oli soem ol defren stori blong Baebol. Mo tu, oli wokem sam narafala video kaset long Saen Lanwis blong Amerika, blong givhan long olgeta we sora blong olgeta i fas.

Plante man we oli mekem visit oli go long ples blong wokem foto mo ples blong mekem ol pija. Oli luk ples blong Infomesen Sevis, we i givim trening mo save long saed blong kompyuta. Oli luk Sevis Dipatmen, hemia ofis blong lukaot long wok long 11,242 kongregesen mo 572 elda we oli goraon. Mo tu, i gat Raeting Dipatmen, we evri yia i kasem samwe long 14,000 leta blong ol man we oli askem kwestin long saed blong ol defdefren toktok. Olgeta we oli mekem visit oli glad tumas blong luk bigfala stadi we ol brata oli stap mekem blong ansarem ol kwestin ya, mo oli luk se olgeta we oli ansarem ol kwestin oli rili kea long ol man we oli stap traehad blong winim ol bigfala problem.

Plante man oli kam visitim ofis blong Translesen Sevis. Olgeta we oli visitim ples ya oli sapraes blong harem se, long ol faef yia we oli pas, Sosaeti i wokem ol buk mo magasin long 102 moa lanwis bakegen, antap long lanwis we oli stap finis. Long fulwol, samwe long 80 pesen blong olgeta Witnes blong Jeova oli stap ridim ol buk blong Sosaeti long ol narafala lanwis we i no Engglis. Blong lukaot long nid blong olgeta, i gat bitim 1,700 volontia we oli wok long saed blong translesen long 100 kantri. I gat ol ples blong soem Wajtaoa long ol lanwis blong Amerika, Yurop, Esia, mo Afrika. Ol man oli save luk New World Translation blong Baebol long ol 31 lanwis we oli prentem finis. Oli faenem se naoia yumi save kasem ol buk blong Watch Tower long 332 lanwis, mo buklet ya ?Wanem Samting We God i Wantem Yumi Blong Mekem? i kamaot long 219 lanwis.

Ol man we oli visitim Ligal Dipatmen oli luk ol defren haf blong wok we samtaem i nidim blong yusum loa blong mekem. Oli luk wan video kaset we i soem wan trufala kot kes. Long kot kes ya, wan loea we i wan Witnes i toktok long saed blong blad transfyusen. Mo tu, olgeta we oli visitim ples ya, oli lanem wanem wok i stap gohed naoia blong meksua se rod i open oltaem blong talemaot gud nius. (Filipae 1:7) Oli lesin long toktok blong wan disisen we bigfala Distrik Kot i mekem long manis Maj blong yia ya. Disisen ya i talem se bambae oli jenisim wan loa blong Oradell, Niu Jesi, Yunaeted Stet. Loa ya i bin talem se ol Witnes oli mas kasem wan laesens mo oli mas holem wan aedentiti kad blong prij long ol haos wanwan.

Be, ol man we oli kam visitim ples ya oli no luk hemia nomo. Long Ples we ol brata oli mekem ol plan Blong Bildim Haos, olgeta we oli mekem visit oli luk sam smosmol plan blong haos we ol brata oli stap bildim. Mo tu, oli visitim Ples we ol mesin oli stap Klinim Ol Doti Wota, ples Blong Lektrik, ol Mesin Blong Putum Meresin Long Wota Blong Dring, mo plante narafala dipatmen bakegen, we oli stap mekem wok blong klinim ples. !Ol man oli gat jans blong lanem plante samting!

Program Blong Dedikesen i Leftemap Tijing Blong God

Program blong dedikesen i stap long Wenesde, Mei 19, long 4 klok aftenun. Ful namba long man we oli glad blong kam tugeta long taem ya i kasem 6,929. Long olgeta ya i gat ol man we oli wok long hedkwota mo olgeta we Sosaeti i singaot olgeta i kam, wetem 372 man we oli hivap long branj ofis blong Kanada, olgeta tu oli joen long dedikesen ya tru long televisin.

Ol man oli glad tumas blong harem naesfala tok we Milton G. Henschel, presiden blong Watch Tower Sosaeti, i mekem blong welkamem olgeta. Biaen, Theodore Jaracz, wan memba blong Hed Kampani mo man blong lukaot long program ya, i letem ples long William Malenfant. Brata ya i givim tok ya “Sam Impoten Haf Blong Bilding Program.” Hem i storeyan wetem tri brata we oli bin mekem bigfala wok long saed blong plan mo bildim Wajtaoa Edukesen Senta ya. Tru long storeyan ya, oli talem se long ol yia we wok ya i gohed, bitim 8,700 man oli bin yusum prapa mane mo taem blong olgeta blong spenem smol taem long wok ya. !Hemia wan nambawan pruf se tijing blong God i naf blong mekem man i joengud mo i pulum man blong oli wantem givim presen wetem gladhat!

Biaen i gat wan tok we i gat fo haf long hem. Stamba blong tok ya hemia “Tijing Blong God Long Fulwol,” mo fo memba blong Hed Kampani oli givim tok ya. John E. Barr i makem poen ya se tijing blong God i stanap long Tok blong God, Baebol, we i leftemap tingting blong ol Kristin blong ‘karem frut long ol gudgudfala wok we oli stap mekem, mo kam we oli save God moa.’ (Kolosi 1:10, NW) Daniel Sydlik i tokbaot olsem wanem tijing blong God we i kamaot long hed blong Kristin kongregesen, Jisas Kraes, i kasem evri memba blong ogenaesesen long fulwol. (1 Korin 12:12-27) Tu laswan haf long tok ya, oli kamaot long Gerrit Lösch mo Carey Barber. Tufala i soemaot olsem wanem tijing blong God i save mekem ol man oli naf blong kasem eni man long eni ples blong tijim olgeta blong oli save wokbaot long rod blong God.​—Aesea 2:1-4; 2 Korin 3:5.

Blong halpem ol man blong savegud wok blong ol defren skul we oli stap long edukesen senta ya, ol brata oli askem kwestin mo storeyan wetem ol tija mo olgeta we oli bin joen long ol skul ya. Olgeta ya oli soemaot wok we ol skul oli mekem blong tijing blong God i gohed long fulwol. Oli eksplenem se long Gilead Skul ol man oli stadigud long evri buk blong Baebol, oli stadi long histri blong ol Witnes blong Jeova long taem blong yumi, mo oli kasem trening blong mekem wok blong misinari. Skul blong branj ofis i wan nambawan kos blong stadi we i kavremap ol defdefren kaen wok we ol memba blong Branj Komiti oli mas mekem. Skul Blong Ol Elda We Oli Goraon i no jes blong halpem ol brata we bambae oli mekem wok ya, be tu, i blong mekem olgeta oli naf blong givim help long saed blong spirit we i save givhan long ol kongregesen.

Blong finisim nambawan program ya, Lloyd Barry, we hem i wan memba blong Hed Kampani, i mekem dedikesen tok ya “Bildim Haos Wetem Bigfala Man Ya We i Wokem Yumi.” Hem i makem we Man Ya we i Wokem olgeta samting, Jeova, i glad tumas long ol samting we hem i wokem, mo i wantem we yumi tu, yumi glad tumas wetem hem. (Aesea 65:18) From we “God i wokem olgeta samting we i stap,” yumi mas presem Jeova God from olgeta nambawan wok ya we oli bin gohed. (Hibrus 3:4) Afta we Lloyd Barry i talemaot ol tingting ya, hem i mekem wan prea we i kamaot long hat blong hem, blong openem Wajtaoa Edukesen Senta, i go long Jeova, Bigfala Man Ya we i Wokem yumi.a

Yumi sua se olgeta we oli stap long program long ful wik ya, oli no save fogetem ol samting we oli bin hapen long lafet ya. Maet yu save mekem plan blong visitim Wajtaoa Edukesen Senta ya. I sua se sipos yu visitim ples ya, bambae hem i leftemap tingting blong yu blong traehad blong lanem moa long saed blong Man Ya we i Wokem olgeta samting mo we i gat bigfala lav long yumi. Mo tu, maet samting ya i givhan long yu blong wantem traehad moa blong mekem laef blong yu i folem ol stretfala rul blong Jeova.

[Futnot]

[Tok Blong Pija Long Pej 10]

Plante man oli hivap wanples long bigfala haos ya, mo long ples blong kakae.

[Tok Blong Pija Long Pej 10]

Ol man we oli visitim ol ples ya oli rili glad from olgeta samting we oli luk