Wan Famle o Fren i Ded

SIPOS wan famle o fren blong yu i ded, yu tu yu save harem nogud. Maet yu harem se yu stap yu wan, yu no gat hop, yu harem se i fol blong yu, yu kros, mo yu fraet. Maet yu ting se naoia laef blong yu i blong nating nomo.

I no rong blong harem nogud mo krae. Hemia i soemaot se yu lavem tumas famle o fren we i ded. ?Be bambae yu harem gud bakegen samtaem?

SAMTING WE I GIVHAN LONG SAMFALA

Maet yu harem se neva bambae yu kamgud bakegen. I gud yu tingbaot ol advaes ya we i save givhan:

I NO RONG BLONG KRAE

Evri man i gat defdefren fasin blong harem nogud. Be taem yu krae, filing blong harem nogud i save godaon. Vanesa we yumi tokbaot finis, i talem se: “Mi stap krae nomo blong traem lego filing ya blong harem nogud.” Sofia, we smol sista blong hem i ded, i talem se: “Taem mi tingbaot samting we i hapen, i olsem we dokta i stap klinim wan bigfala kil long bodi blong mi. Mi harem i soa we i soa, be i mas olsem blong kil ya i save kam gud bakegen.”

TOKBAOT WETEM NARAFALA

I stret nomo we samtaem yu wantem stap yu wan. Be taem yu harem nogud yu wan, i olsem we yu stap traem blong karem wan hevi samting. Jared we i gat 17 yia mo i lusum papa blong hem, i se: “Mi tokbaot wetem sam narafala. Ating mi toktok olbaot nomo, be mi harem gud blong talemaot filing blong mi.” Jan we yumi tokbaot finis, i talem se: “Taem mi tokbaot wetem narafala, hemia i leftemap tingting blong mi bigwan. Mi harem se oli kasemsave filing blong mi, mo mi no stap gotru long trabol ya mi wan nomo.”

LETEM NARAFALA I HALPEM YU

Wan dokta i talem se: “Taem wan fren o famle i ded, i gud yu letem ol narafala oli halpem yu. Hemia i save mekem i isi moa blong yu gohed go kasem we yu harem gud bakegen.” I sua se oli wantem halpem yu, be maet oli no save wanem blong mekem. Taswe, i gud yu storian wetem olgeta long samting ya.—Ol Proveb 17:17.

KAM KLOSAP LONG GOD

Tina i talem se: “Taem hasban blong mi i ded from kansa, mi harem nogud we hem i no moa stap blong mi talemaot ol wari blong mi long hem. !Ale mi tokbaot evri samting wetem God nomo! Evri moning mi askem long God blong i givhan long mi blong mi gotru long dei ya, mo oltaem hem i halpem mi.” Tasa we i gat 22 yia taem mama blong hem i ded, i se: “Evri dei mi ridim Baebol. Hemia i leftemap tingting mo i mekem se mi tingbaot ol gudfala samting.”

TINGBAOT TAEM WE BAMBAE HEM I LAEF BAKEGEN

Tina i gohed se: “Fastaem, hop blong laef bakegen i no leftemap tingting blong mi, from we mi harem se mi nidim hasban blong mi naoia, mo trifala boe blong mi oli nidim papa blong olgeta naoia. Be afta we fo yia i pas, mi harem gud tumas long hop ya. Mi holemtaet long hat blong mi mo i mekem se mi save gohed evri dei. !Mi tingbaot taem ya we bambae mi luk hem bakegen, mo hemia i givim bigfala pis mo glad long mi!”

I tru se yu no save harem gud kwiktaem, be tok blong Vanesa i save leftemap tingting blong yu. Hem i se: “Yu ting se bambae yu neva harem gud bakegen, be sloslo filing blong yu bambae i kam gud.”

I tru se bambae yu gohed blong misim famle o fren blong yu. Nating se i olsem, laef i no blong nating nomo. God i save givhan long yu blong yu glad long laef mo yu harem gud blong joen wetem ol gudfala fren blong yu. Mo tu, i no longtaem, God bambae i mekem fren o famle blong yu i laef bakegen. Hem i wantem tumas se yutufala i holem yutufala bakegen. !Long taem ya, soa we i stap long hat blong yu bambae i lus blong olwe!