Yumi Yusum Bakegen “Laef Foreva” Buk
1 ?Olsem wanem long yu? ?Yu filim wanem taem yu lanem trutok fastaem? I klia nomo se yu luk trutok olsem wan nambawan samting, wan saen blong gladhat blong Jeova long yumi. Yes, filing blong yumi i sem mak long tufala disaepol blong Jisas taem tufala i mitim hem long rod blong Emeas. Long Luk 24:32, tufala i stap talem long tufala se: “Man, taem hem i stap tok long yumitufala long rod, i stap talemaot ol tok ya blong Baebol, tok blong hem i nambawan, i mekem yumi harem i gud tumas.” Yes, yumi harem i gud tumas taem yumi kasem save long ol tok blong Baebol, mo yumi gat bigfala tangkyu from.
2 Be oli no talemaot trutok long yumi blong yumi nomo yumi kasem blesing. Aposol Pol i askem se: “?Sipos man i no go talemaot gud nyus blong God, bambae ol man oli save harem nyus ya olsem wanem?” (Rom 10:14) Kolosap 4 milyan man blong Jeova oli wantem mekem sem mak long Aesea, nao olgeta tu oli talem long God se: “!Mi stap ya! !Yu sanem mi mi go!” (Aes. 6:8) I stret taem blong talemaot trutok blong Kingdom long olgeta ples. Poen ya i mas klia nomo long tingting blong yumi: Yumi wanwan i gat responsabiliti blong mekem wok ya long teritori blong kongregesen blong yumi.
3 Long manis ya, bambae yumi gat jans blong seremaot bakegen trutok blong Kingdom wetem buk Yu Save Laef Foreva Long Paradaes Long Wol. Maet longtaem finis, yumi stap wet blong seremaot bakegen nyufala buk ya long olgeta haos wanwan. Ating yumi ridim finis buk ya fulwan mo maet yumi statem sam Baebol-stadi wetem ol man. Yumi luksave finis we buk ya i eksplen gud long Baebol. Yes, buk ya bambae i mekem gudfala wok bakegen long ol manis we i kam.
YUMI SEREMAOT BUK YA LONG OLGETA HAOS WANWAN
4 Yumi no mas foget se ol man oli laekem tumas buk ya. Taem ol man oli luk buk ya, oli sapraes long nem blong hem mo oli wantem kasem wan kopi blong hem. Sipos oli hafhaf blong tekem buk ya, yumi save soemaot nem blong ol japta no ol gudfala pija. Plante taem fasin olsem nomo i naf blong oli tekem wan buk.
5 I gud yumi traem tekem olgeta jans blong seremaot buk ya. Yumi save seremaot buk ya long ol man we bifo oli bin soemaot intres long Baebol mo oli gat sam buk blong yumi. Soemaot buk ya long olgeta. Mo tu, talemaot buk ya long olgeta we yu yu mitim evri dei taem yu mekem ol wok blong yu, long ol man blong stoa, no long ol man we oli stap kolosap long ples blong yu. Putum wan kopi blong buk ya long klia ples mo taem yu gat jans, yu save seremaot hem long ol man. Mo tu, yu no mas fogetem ol famle blong yu we oli no Wetnes.
WAN GUDFALA BUK BLONG STADI
6 Ol ripot we mifala i kasem oli soemaot se Laef Foreva buk i wan gudfala buk blong stadi long Baebol. Buk ya bambae i givhan bigwan long ol man we oli save kam joen long ol man blong Jeova long fyuja. Ol buk we Sosaete i wokem bifo oli halpem hem blong wokem nyufala buk ya we i gud moa yet. Plante long yumi oli bin yusum buk ya “Trutok Blong Soemaot Rod Blong Itenel Laef.” Long tufala buk ya, Trutok mo Laef Foreva, bighaf blong ol poen blong Baebol oli sem mak nomo, mo tufala i stanap long ol sem rod nomo blong tijim ol man.
7 Long Laef Foreva buk, mifala i traehad blong tokbaot ol defren tijing blong Baebol long wan fasin we i klia mo i stret gud. Mifala i spenem fulap taem blong mekem se ol pija tok mo ol smol store oli gat moa paoa. Long saed blong ol kwestin, mifala i lukaot olgeta we oli dip moa. Taem we mifala i raetem buk ya, fastaem mifala i wantem tajem hat blong olgeta we oli stadi long Baebol. Wan pablisa i raet long mifala, i se: “Buk ya i gudwan tumas mo hem i fulap long ol pija. Be samting we mi mi laekem moa, hemia paoa blong ol vas mo ol kwestin we oli yusum, mo fasin blong toktok stret long ol man: Kwiktaem nomo, studen i luksave se ol poen we hem i stap ridim oli save halpem hem blong frengud wetem Jeova. Oltaem buk ya i skelem ol samting we i gud wetem ol samting we i nogud, blong soemaot olsem wanem tufala i agensem tufala. Fasin ya i mekem i klia long ol studen we oli mas tekem sam disisin mo jenisim ol bilif, ol fasin, tingting mo skul blong olgeta.”
SAM MOA POEN I STAP LONG HEM
8 Buk ya i tokbaot ol trutok blong Baebol long wan wei we i gudwan moa, i bitim ol buk blong bifo, be antap bakegen hem i tokbaot sam poen we i no gat bifo. Ol advaes we oli stap long buk ya oli save sevem laef blong ol man we oli stadi. Sam yia bifo, plante studen oli no gohed strong long trutok from we laef blong olgeta i no klin. Taswe long buk Laef Foreva, mifala i mekem sam moa tok long bisnes ya, mo mifala i enkarajem olgeta we oli stadi blong oli blokem ol rabis fasin blong olgeta mo mekem i gud nomo.
9 I gud ol pablisa oli karem buk ya long wok blong prij mo long ol visit. !Bifo we yu go long wok blong prij, putum buk blong yu long basket, no fogetem! Taem yu soemaot buk ya no yu storebaot ol poen blong hem, yu mas gat positiv tingting. Long fasin ya, bambae yu save seremaot plante buk mo statem sam moa Baebol-stadi.
10 Taswe, yumi mas strong blong seremaot nyufala buk Laef Foreva long manis Disemba. Hem i wan nambawan rod blong talemaot trutok long ol las dei ya.