Yumi Mekem Gudfala Stadi Long Famle
1 Wan long ol bigfala wok we ol papa mama oli mas mekem long famle blong olgeta se oli mas tijim ol pikinini blong ol long trutok. Jeova nao i givim wok olsem long ol papa mama. (Dut. 6:6, 7) Ol pikinini oli nidim we yumi lidim olgeta mo yumi givim advaes long olgeta blong oli mekem i stret long wan wol we i nogud. Oli mas lan blong laekem Jeova mo trutok, mo oli mas gat strong tingting blong fasgud long tufala samting ya. Long Wajtaoa blong Ogis 1, 1988, pej 11, (Engglis mo Franis) yumi save ridim ol tok ya: “Nating we yu yu wari long sam samting no yu gat sam wok blong mekem, yu mas spenem taem wetem ol pikinini blong yu. Yu mas tinghae long samting ya. Sipos yu mekem olsem, bambae yu gat rod blong mekem ol rul long saed blong speret oli godaon long hat blong ol pikinini, mo bambae yu putum olgeta long gudfala rod blong laef.”
2 Blong folem ol advaes we i stap long Tok blong God, ol famle oli mas tekem taem blong mekem stadi oltaem. Ol papa oli mas lukaot gud long ol famle blong olgeta long saed blong speret. Sipos ol papa mama oli no tekem taem blong mekem olsem, bambae ol pikinini oli save kasem bigfala trabol long fyuja.
?MEKEM STADI LONG WANEM BUK MO OLSEM WANEM BLONG STADI?
3 ?Bambae yumi mekem stadi long wanem buk? Hed blong famle i stap long gud ples blong save wanem samting famle blong hem i nidim. Hem i save askem long ol famle blong hem wanwan wanem samting i gud blong mekem, ale biaen sipos hem i mas tekem wan disisin, hem i save tingbaot ol poen ya. Sipos oli stadi long ol samting we oli nidim, bambae stadi i halpem olgeta mo i leftemap tingting blong olgeta. Plante famle oli tekem disisin blong mekemrere Wajtaoa stadi wanples. Be samtaem, maet i gat nid blong tokbaot ol trabol we ol yangfala oli save kasem long skul. Yumi save faenem long ol buk blong Sosaete sam gudfala haf long saed blong ol fren blong olgeta, ol pleplei afsaed long skul, spot, mo ol rabis fasin long seks. Yumi save tokbaot ol poen ya long wan wei we olgeta oli intres long hem mo yumi mas soemaot long olgeta se olgeta oli naf blong winim ol rabis fasin ya. I impoten tumas we hed long famle i lukluk oltaem long ol samting we famle blong hem i nidim. Mo tu, hem i save faenemaot gudfala wei blong tajem hat blong olgeta.—Lukluk Wajtaoa blong Septemba 1, 1971, (Engglis no Franis) pej 518 mo 519.
4 ?Olsem wanem blong mekem stadi long famle? Taem i gat stadi, olgeta we i joen long stadi ya bambae oli stap isi nomo, be oli mas soemaot respek long taem ya. Yu no mas lidim stadi long famle wetem kwestin mo ansa nomo, mo wetem ol tok we oli flas bitim mak. Yu save askem sam narafala kwestin bakegen mo yu save yusum ol pija tok blong mekem ol man oli tingtinggud. Yu save mekem evriwan i joen long ol tok we i kamaot. Yusum ol samting we man i save lukluk, olsem ol map no ol pija, blong makem gud long tingting blong olgeta ol poen we yufala i stadi long hem. Yu save askem long ol pikinini blong oli lukaot sam poen long ol Indeks no long buk Insight. Yu save halpem ol smolwan we oli naf blong givim ansa blong oli joen long toktok blong yufala. Yu save askem sam isi kwestin we olgeta oli save ansarem long sam tok nomo. Taem we yufala i mekem stadi long famle, i no taem blong stretem ol pikinini. Be defren olgeta, yu save talem long olgeta se olgeta oli mekem i gud. Yu save soemaot long olgeta se yu yu glad tumas long ol hadwok we oli mekem mo yu mas rere oltaem blong tokbaot ol gudfala poen long saed blong speret wetem olgeta.
5 ?Olsem wanem blong save sipos yu yu rili kasem hat blong olgeta? Pulum olgeta blong oli givim ansa long ol prapa tok blong ol. Long kaen gud fasin, yusum sam kwestin we i save halpem yu blong luksave wanem samting i stap long hat blong olgeta. Maet yu save askem kwestin olsem: “?Ol fren blong yufala long skul oli tingbaot bisnes ya olsem wanem? ?Yufala i wari finis long samting ya?” Be yu no mas kros long ol ansa we ol pikinini oli save givim long ol kwestin ya. Sipos yu yu kros, bambae oli no moa filim se oli fri blong talemaot tingting blong olgeta. Givim taem long olgeta blong oli toktok. Sipos oli luksave se yu yu intres long olgeta mo long ol trabol blong ol, bambae i isi moa blong yu tijim olgeta.—Lukluk Wajtaoa blong Novemba 1, 1986, (Engglis no Franis) pej 23 kasem 25.
6 Yu no mas foget long samting ya: Faswan mak blong stadi long famle i blong putum ol tingting blong Jeova long hat blong pikinini. Yumi mekem stadi wetem olgeta, be i no from we yumi wantem nomo we oli faenem ansa long ol kwestin we oli save talemaot long ol miting blong kongregesen. (Efes. 3:17-19) Samting ya i min se yu mas mekem olgeta samting we oli lanem i godaon long hat blong olgeta. Yu mas talemaot long olgeta from wanem oli mas glad blong mekem ol samting we God i wantem mo from wanem i no gat wan narafala rod we i gudwan moa long laef blong olgeta.
7 Blong mekem se wan famle i stanap strong long saed blong speret, i mas gat wan stadi oltaem long famle. Stadi ya i givhan long ol pikinini blong oli naf gud mo oli stanap strong agens long ol trabol we oli save kasem long laef blong ol. Ol papa mama, yufala nao i naf gud blong givhan long ol pikinini blong yufala. Yufala i mas mekem wok ya we God i givim long yufala. Sipos yufala i traehad blong mekem wan gudfala stadi long famle evri wik, bambae Jeova i blesem yufala stret.