Talemaot Gud Nyus Wetem Wajtaoa
1 Wajtaoa i spesel from we hem i talemaot gud nyus. Hem i defren olgeta long ol magasin blong wol we oli stap tokbaot ol nyus we oli nogud mo oli no leftemap tingting blong ol man. ?Olsem wanem yumi save soemaot long ol man se Wajtaoa i defren, i tokbaot wan mesej we i save mekem man i haremgud?
2 Yumi save pulum tingting blong ol man i go long pej 2 we i tokbaot “Wok Blong Wajtaoa.” Talemaot se magasin ya i wantem leftemap Jeova olsem Hae Rula blong wol mo heven, i tokbaot ol samting we oli stap kamaot long wol olsem ol profet tok blong Baebol oli bin tokbaot, hem i givim wan mesej we i save mekem ol man we oli harem nogud oli save haremgud bakegen, mo i pulum man blong bilif strong long ol samting we God i mekemrere finis blong sevem yumi.
3 ?Yumi tokbaot Wajtaoa long fasin we i pulum tingting blong ol man? Samting we yumi talem i no mas pulum tingting blong man blong smoltaem nomo. Yumi mas tokbaot wan samting, we i save pulum man blong bilif long God mo blong hem i wantem lanem moa.
4 Yumi Mas Mekemrere Fastaem: Yumi mas ridimgud ol magasin, skelem ol defren tok we i stap insaed wetem tingting blong ol man long teritori blong yumi. Yumi mas ridim ol vas we i stap insaed blong yumi kasem moa save. Samting ya i save mekem yumi gat fasin tangkyu long trutok mo i pusum yumi blong talemaot long ol narafala man. Sipos trutok i no stap long hat blong yumi, bambae yumi no traehad blong talemaot long ol narafala man.
5 Intres we wan man i soemaot, i soem wanem samting yumi save givim long hem. Sipos wan man i no intres, yumi save toktok nomo long hem. Sipos wan man i intres smol, i gud blong soem ol nyufala magasin no wan buklet. Sipos wan man i soem se hem i rili gat fasin tangkyu mo hem i wantem lanem moa, i stret blong askem sabskripsen long hem. I gud blong mekem wan nyufala sabskripsen blong wan man long sikis manis. Biaen yu save gohed blong mekem sabskripsen blong hem bakegen sipos hem i intres yet.
6 Taem yu ridim ol haf insaed long ol Wajtaoa we yu jes kasem, traem tingbaot ol man we yu bin storeyan wetem olgeta long ol save olsem. Mo traem tekem magasin ya i go long ol man ya mo storeyan moa wetem olgeta.
7 Yumi no save se bambae yumi mas talemaot gud nyus go kasem wetaem mo go kasem weples yet. Be yumi save, se Wajtaoa bambae i mekem bigfala wok blong finisim wok ya. Yumi save mekem olsem ol aposol we oli stap traehad, “oli stap tij, mo oli stap talemaot ol tok blong [Jeova, NW].”—Wok 15:35.