Wajtaoa—Kakae Blong Speret Long Stret Taem
1 Kolosap 114 yia nao, we Wajtaoa i givim woning long ol man we oli stap ridim blong oli stap wekap long saed blong speret. Fren blong hem magasin ya Wekap! i mekem ol man oli trastem moa ol promes blong man we i wokem olgeta samting long saed long wan wol we i gat pis mo seftaem we bambae i kam tru long taem blong yumi. Tufala magasin ya oli olsem tu gudfala tul we oli saenem rod blong yumi tru long wan wol we dak. (Aes. 60:2) Trutok long tok blong God i neva jenis, be save blong yumi long hem i kam moa klia taem Jeova i yusum tufala tul ya mo ol narafala tul blong givim “kakae long ‘saed blong speret.’ ”—Mat. 24:45; Prov. 4:18.
2 Yusumgud Ol Magasin: Yumi save soemaot fasin tangkyu blong yumi long klia save ya blong speret we yumi kasem sipos yumi glad blong leftemap tingting blong ol man blong oli ridim Wajtaoa mo Wekap! Bambae yumi askem sabskripsen taem yumi visitim ol man long ol haos wanwan long wok blong prij no taem yumi holem jans blong prij. Plante man oli stap kasem wan kopi blong ol magasin oltaem mo oli glad blong ridim olgeta. Ol man ya bambae oli glad long jans ya blong kasem wan sabskripsen. Yumi save askem blong mekem sabskripsen taem yu mekem wan visit sipos man blong haos i no savegud magasin blong yumi mo hem i no mekem disisen blong akseptem wan sabskripsen fastaem we yu askem long hem.
3 Yumi save soemaot wan no tu poen long magasin mo halpem man blong haos blong luk save from wanem i impoten blong kasem ol magasin blong yumi oltaem. Yumi save raet i go long ol fren mo ol memba blong famle blong yumi we oli stap long narafala aelan no long velej. Maet i gud blong putum wan magasin insaed long envelop mo eksplenem long famle mo fren se oli save kasem magasin ya tru long postofis sipos oli mekem sabskripsen long hem. Yumi rili wantem blong mekem Wajtaoa magasin i goaot long olgeta aelan.
4 Yumi save soem wanwan kopi blong magasin long ol fren blong wok mo ol fren long skul. Yumi save seremaot magasin long ol bisnes man we yumi save mo long wok blong prij folem rod.
5 Taem kongregesen i kasem ol nyufala magasin, kwik taem kongregesen i mas mekem i rere blong ol pablisa oli save karem. Taem yu kasem wan nyufala magasin, ridim blong savegud wanem i stap insaed long olgeta. ?Wanem poen ol man blong teritori blong yufala oli intres long hem? ?Pis mo seftaem long wol? ?Trabol blong mane? ?Gudfala Gavman? ?Ol samting we oli stap raonabaot long yumi? Wajtaoa, i pulum ol man blong luk long Kingdom blong God olsem wan ansa ya nomo blong finisim ol trabol blong man blong olwe. (Dan. 2:44; Mat. 6:10) Hemia wan presen we i gat bigfala praes long hem, we “Bigfala man blong tijim yumi” i givim long yumi.—Aes. 30:20.
6 Epril mo Mei, hemia wan oli givim gudfala jans blong yumi givim moa taem long wok blong prij. From we Mei i gat faef wiken evriwan, plante bambae oli save mekem haftaem paenia. Evriwan long yumi i mas putum wan mak naoia blong mekem moa long wok blong prij long tufala manis ya mo glad blong leftemap tingting blong evriwan we yumi faenem olgeta blong oli ridim Wajtaoa mo Wekap!