Ẅajtaoa mo Wekap!—Tufala Magasin Blong Trutok
1 Wajtaoa blong Janewari 1, 1994, pej 22, i mekem yumi tingbaot bakegen se ol magasin blong yumi oli stap kamaot “long stret taem blong hem we ol man oli rili nidim mo i kasem stret ol samting long laef blong olgeta.” Yumi tangkyu tumas from nambawan samting we i stap insaed mo yumi wantem seremaot plante. Long manis Epril mo Mei, bambae yumi seremaot tufala magasin ya, wetem eni buklet tu be i no School buklet.
2 Wok blong prij long ol haos wanwan i givim nambawan jans long yumi blong seremaot ol magasin ya. Mo tu fasin blong tekem ol gudfala jans blong prij mo mekem ol visit bakegen i save mekem se yumi stap seremaot ol magasin oltaem. Mekem wok blong prij long rod mo long ol ofis mo ol stoa long teritori blong yumi oli ol gudfala rod tu blong seremaot moa magasin.
3 Ol Poen Blong Tokbaot: Wajtaoa blong Epril 1, i tokbaot poen ya “Wan Wol We i Moa Gud—?I Wan Drim Nomo?” mo “Wan Wol We i Moa Gud—!I Kolosap!” Samting ya i laenap stret long stampa risen blong magasin hemia blong talemaot Kingdom blong God. Long en blong seken atikol i soem olsem wanem bambae wan itenel paradaes i save kam wan tru samting aninit long rul blong Jisas Kraes.—Luk 23:43.
4 Long magasin blong Epril 15, i tokbaot kwestin ya se: “?Weples Yu Save Faenem Advaes Blong Lidim Yu We Yu Save Trastem?” Ol magasin blong Mei bambae oli tokbaot poen ya moa long atikol ya, “?Skul i Stap Givim Ol Samting We Yu Yu Nidim?” mo “?From Wanem i Gud Blong Ridim Baebol?” Ating bambae i isi nomo blong yumi statem storeyan wetem ol man we oli ting se laef blong olgeta i no gat mining no risen blong hem.
5 Seremaot Moa Magasin: Wajtaoa blong Janewari 1, i talem fo samting we oli save halpem yumi blong seremaot moa magasin. Hem i leftemap tingting blong yumi (1) blong rere oltaem blong seremaot magasin. Taem yumi wanwan i ridim olgeta, yumi mas tingbaot wanem ol atikol nao we maet ol man long teritori blong yumi oli intres moa long olgeta. Mo tu, sipos yumi karem sam magasin wetem yumi oltaem, maet bambae yumi save seremaot olgeta long ol fren blong wok, ol man we oli laef kolosap long yumi, ol tija, ol skul fren, no ol man we oli stap go blong pem ol samting long stoa.
6 Magasin ya i mekem yumi tingbaot (2) blong no talem tumas samting. Jusum wan gud poen, mo traem talem long smol toktok nomo. Sipos yu save pulum man blong haos blong karem magasin, magasin bambae i save “toktok” long man we yu faenem no long ol narafala man we oli stap long haos ya.
7 Wan narafala samting we yumi nidim hem i (3) blong rere blong jenisim toktok blong yumi. I gud blong tingbaot ol defren atikol blong tokbaot—wan blong ol yangfala, wan blong ol man, mo wan narafala samting blong ol woman.
8 Laswan samting yumi nidim (4) blong putum wan mak blong kasem long saed blong namba blong ol magasin we yumi seremaot. Kongregesen i no save putum wan mak long ol namba blong magasin blong seremaot, be yumi wanwan i save putum wan mak blong yumi wan blong kasem. Samting ya bambae i mekem yumi traehad moa wetem glad blong seremaot magasin. Sipos yumi putum wan oda blong wan stret namba blong magasin, samting ya i save pusum yumi blong traehad moa.
9 Yumi wantem se ol narafala oli save long Kingdom blong God. Yusum fulwan nambawan help we ol magasin oli stap givim long yumi blong seremaot mesej blong Kingdom.—Mat. 10:7.