Seremaot Ol Beswan Magasin Blong Wol
1 Stampa risen blong Wajtaoa olsem i talem long pej 2 blong hem, i blong “leftemap nem blong God Jeova, we i Hae King blong heven mo wol.” Wekap! i blong “givhan long evriwan long famle. . . . Nyuspepa ya i pulum ol man blong trastem promes blong God blong wokem wan nyufala wol we pis mo seftaem nomo bambae i stap long hem.” Ol tok ya oli kamaot stret long ol magasin. Fasin traehad blong kasem ol mak ya i mekem ol magasin ya oli kam stampa samting blong mekem plante milyan man we oli stap ridim olgeta oli haremgud.
2 Bambae yumi seremaot ol magasin ya long wok blong prij long Epril mo Mei. Blong karem frut, i nidim blong yumi savegud wanem i stap insaed long olgeta. Ridim ol wanwan namba blong magasin, makem ol poen we yu save yusum taem bambae yu seremaot olgeta. Tingbaot wanem we ol man oli wari long hem. ?Wanem samting long saed blong laef, famle, no filing we bighaf blong ol man raonabaot long yu oli stap tingting plante long hem? Traem tingbaot wan samting we yu save talem we bambae i tajem hat blong olgeta mo pusum olgeta blong wantem save moa.
3 Tokbaot poen long magasin blong Epril 1: Bighaf blong ol man oli wantem wan wol we i gud moa, wan wol we i no gat ol problem we naoia plante taem oli spolem fasin glad blong olgeta.
Afta we yumi talem nem blong yumi, yumi save talem se:
◼ “Mi wantem blong soem wan gudfala tok long yu we i stap long atikol ya, ‘Wan Wol We i Moa Gud—?I Wan Drim Nomo?’ Hem i talem se: ‘I tru se wol ya, wol blong yumi, i no wan ples we i stret gud olgeta. . . . Lis blong ol trabol blong tede i no gat en blong hem.’ Samting ya i mekem se ol man oli faenem i had blong tingtinggud long fyuja, ?i tru? Be sipos yu glad, bambae mi soem long yu wanem we Ol Sam 37:11 i talem long saed blong fyuja.” Afta we yu ridim, askem tingting blong man blong haos long promes ya. Sipos hem i glad blong joen long storeyan, soem atikol ya “Wan Wol We i Moa Gud—!I Kolosap!” long pej 4, mo talem se: “I gat plante vas blong Baebol we oli raetem i stap ya, wetem hemia we yumi jes ridim long Ol Sam 37:11. Mi bilif se bambae yu glad blong ridim ol atikol ya mo jekem ol vas long Baebol blong yu. Mi glad blong livim olgeta wetem yu long wan smol praes nomo.”
4 Tokbaot poen long magasin blong Epril 15: Atikol long pej 4 i askem se: “?Weples Yu Save Faenem Advaes Blong Lidim Yu We Yu Save Trastem?”
Afta we yu talem nem blong yu, yu save talem se:
◼ “I gat plante problem long wol tede, olsem [talem wan samting we i jes kamaot long komuniti no long nyus we ol man oli wari from]. Samting ya i mekem yumi tingbaot sipos i gat wan man we i save faenem wan rod blong stretem ol problem ya samtaem. Yumi glad se 2 Timote 3:16, 17 i mekem promes long yumi se advaes blong Baebol i wan rod blong kasem wan hapi fasin blong laef we i sefgud.” Afta we yu ridim ol vas ya, soem olsem wanem Wajtaoa i stap givhan long yumi blong kasem save from wanem Baebol i wan samting we yumi save trastem blong lidim yumi.
5 Sipos yu laekem moa blong seremaot Wekap!, maet yu save yusum Wekap! blong Mei 8 (Engglis mo Franis) long atikol ya, “Real Hope for the Children?” (?Wan Trufala Hop Blong Ol Pikinini?) Ating bambae yu faenem se ol nid blong pikinini oli tajem hat blong ol papa mama mo bambae oli wantem save wanem oli save mekem blong halpem olgeta.
6 Sipos yumi glad tumas long ol magasin blong yumi, we oli beswan long wol, bambae yumi wantem tumas blong seremaot olgeta long ol narafala, blong bambae olgeta tu oli save kasem bilif long hop blong Kingdom mo joen blong presem Jeova olsem Hae Masta blong heven mo wol.—Sam 83:18.