Givhan Long Ol Narafala Blong Save Trutok
1 Jisas i kam long wol ya blong talemaot trutok. Blong mekem trutok i kasem ol man, hem i bin trenem ol disaepol blong hem blong oli save tijim ol narafala. Hem i sua se bambae oli karem frut long wok ya blong tijim ol man, taswe hem i singaotem olgeta ol ‘man blong tijim ol man long pablik.’ (Mat. 13:52) Hem i talem se, olgeta wanwan oli olsem man we i gat hed we i gat plante sas samting we hem i save yusum. Tede, ol disaepol blong Jisas oli yusum ol buk blong mekem wok blong talemaot Kingdom i gohed kwik moa. Eksampel, plante kongregesen oli gat ol defren buklet we oli save yusum blong givhan long ol narafala blong folem Jisas. ?Olsem wanem blong yusum ol sas tul ya?
2 Blong statem wan storeyan we bambae i pulum yu blong soem buklet ya “What Is the Purpose of Life?—How Can You Find It?”, yumi save askem kwestin ya:
◼ “?Samtaem yu yu stap askem from wanem plante man oli traehad blong save wanem ya risen blong laef? [Letem man i ansa.] Plante man oli ting se risen blong laef hemia nao man i laef, gat pikinini, stap glad, mo afta ded. Be, Baebol i givim wan risen long yumi we i gud moa.” Ridim Jenesis 1:26. Afta we yumi toktokgud wetem man long ol poen long pej 20 kasem 21 blong buklet, yumi save askem se: “?Wetaem stampa tingting ya blong God bambae i kamtru?” Dipen long ansa blong man we i stap lesin long yu, yu save tokbaot sam tingting we oli stap long japta 7 blong buklet, no mekem plan blong tokbaot poen ya long nekis visit.
3 Hemia wan rod blong yusum buklet ya “?God i Rili Kea Long Yumi?”:
◼ “Plante man oli bin askem kwestin we i stap long fored blong buklet ya. [Ridim tufala kwestin we oli stap daon long fored blong buklet mo letem man ya i ansa.] From we wan God blong lav i no save agri long gud samting mo nogud samting tugeta, ?wanem tingting blong yu long promes we Hem i mekem we i stap long Aesea 65:21-24?” Yumi save gohed blong storeyan long ol poen long haf 10 long saed blong ol samting we Kingdom blong God bambae i mekem i kamtru.
4 Sipos yumi seremaot buklet ya “Speret blong ol Dedman—?Oli Save Halpem Yu No Spolem Yu? ?Oli Rili Stap?”, yumi save talem se:
◼ “Plante man oli ting se ol dedman oli go long ples blong ol speret man. Long tingting blong yu, ?yu ting se i tru? ?Ol dedman oli rili stap laef samples? [Letem man i talem tingting blong hem.] Baebol i givim ansa long ol kwestin ya. Makem wanem hem i talem long Jenesis 3:19.” Afta yumi save talem sam poen long pej 4 mo 5 blong buklet.
5 Wan yangfala pablisa i save askem, taem hem i soemaot buklet ya “!Yu Yu Save Haremgud Blong Olwe Long Wol!” se:
◼ “?Yu yu laekem blong laef long wan paradaes wol olsem hemia? [Soem fored mo pej 32 blong buklet, mo letem man i ansa.] Mi mo famle blong mi mifala i hop blong stap long taem ya, folem wanem Baebol i talem long Jon 17:3.” Afta we yumi ridim vas ya, yumi save askem hem blong karem buklet ya mo ridim.
6 Sipos yumi yusum sam narafala buklet long wok blong prij long manis ya, yumi save mekem fastok mo fasin blong storeyan blong yumi i laenap long ol tingting ya we yumi jes tokbaot. Yumi no mas fogetem blong stap smoltaem nomo mo gat positif tingting, mo yusum sam tok we i leftemap tingting blong wekemap intres blong man we i lesin long yumi.
7 Jeova i soemaot trutok long yumi finis. Yumi mas holem olgeta jans we yumi gat blong talemaot trutok ya, tru long ol buk mo storeyan blong yumi long ol man we yumi mitim olgeta. Long rod ya, yumi stap pruvum se yumi man blong tijim ol man long pablik, we i stap givhan long ol man blong kasem laef we i no save finis. — Mat. 28:19, 20.