Traem Faenem Olgeta We Oli Wantem Yumi Blong Tijim Olgeta
1 “I no gat man we i save kam long mi, sipos Papa blong mi we i sanem mi, hem i no pulum hem i kam.” (Jon 6:44) Jeova, we i stap luklukgud hat blong ol man, bambae hem i blesem olgeta we oli wantem wan man blong tijim olgeta, mo we oli folem wanem we oli lanem long laef blong olgeta. (Jer. 17:10; Jon 6:45) Yumi gat nambawan jans blong wok wetem God blong faenem ol man we tingting blong olgeta i stap daon, we oli wantem tumas wan nyufala wol.—Sam 37:11; 1 Kor. 3:9.
2 Jisas i tokbaot ol disaepol blong hem olsem ol man blong pulum fis, we oli “pulum man.” (Mat. 4:19) Nating se samtaem wok ya i strong, yumi glad bigwan taem yumi kasem frut from. Yumi no stap wok blong kasem sam samting blong yumi nomo, be yumi stap sevem ol man we oli olsem ‘fis,’ blong oli no lus. Wan man we i gat gudhan blong pulum fis, i mas save wanem bet we ol fis oli laekem. Long sem fasin, yumi mas talemaot mesej blong Kingdom long wan fasin we ol man oli laekem blong lesin long hem, mo we i save wekemap intres blong olgeta. Samting ya i tru moa taem yumi mekem ol visit bakegen. ?Yumi save talem wanem?
3 Sipos man blong haos i bin soem se hem i wari long ol trabol we i stap kamaot long wol, maet yu wantem traem hemia:
◼ “Mi luk se yu wari long ol trabol we yumi fesem long laef blong yumi, mo taem yumi stap lukaot long famle blong yumi. Baebol i tokbaot wan nambawan promes we bambae God i mekem i kamtru, i no longtaem.” Ridim Proveb 2:21, 22, mo eksplenem promes blong Jeova long saed blong wan wol we bambae i gat pis long hem oltaem.
4 Sipos man i bin soem intres long wan nambawan fyuja, maet yu save talem se:
◼ “Lastaem, yumi storeyan long nambawan fyuja we Baebol i promes long hem. [Talem wan no tu samting we yufala i tokbaot finis] Yumi rili wantem blong luk ol samting ya oli kamtru long taem ya we yumi laef long hem, ?i tru? Maet yu sapraes blong save se, folem ol profet tok blong Baebol, ol blesing ya oli kolosap tumas. Bambae mi ridim long yu wan smol haf long buk ya we yu karem lastaem.” Ale openem Laef Foreva buk long pej 14, haf 15.
5 Ating yu wantem yusum rod ya we i kolosap sem mak, blong statem wan storeyan long saed blong ol skul:
◼ “?Yu ting se i gat wan rod blong faenemaot sipos skul blong yumi i tru wan? [Wet long ansa.] Tingting blong plante man i fasfas, from we i gat plante tumas skul.” Openem Reasoning buk, long pej 328 mo 329 (316, 317), we i tokbaot kwestin ya, “?Olsem wanem wan man i save wanem skul i tru?” Talem sam sotfala tok long kwestin namba 5, “?Ol man blong hem oli rili laeklaekem olgeta?” Yusum japta 22 blong Laef Foreva buk, blong eksplenem rod blong lanem moa samting tru long wan Baebol stadi.
6 Taem yumi mekem ol visit bakegen, afta we spesel wok blong givimaot Kingdom Nyus i stat, plis mekem sua se yu livim wan Kingdom Nyus wetem ol man we oli no gat wan yet. Bambae Kingdom Wok Blong Yumi blong manis Mei i tokbaot wanem we yumi save talem, taem yumi mekem ol visit bakegen long ol man we oli akseptem Kingdom Nyus.
7 From we Tok blong God i ‘gat paoa,’ yumi mas traem blong yusum Baebol long ol storeyan blong yumi. (Hib. 4:12) Mekem sua se yu leftemap tingting blong man blong haos blong ridim Baebol hem wan. (Skelem wetem Ol Wok 17:11.) Sipos yumi traehad long ol wok blong yumi, bambae Jeova i blesem wok ya.