Gud Nyus Blong Ol Man We Oli Gat Tingting Daon
1 Yumi stap laef long wan taem we jajmen i kolosap nomo. (Esik. 9:5, 6) I impoten tumas we ol man we oli gat tingting daon long evri ples, oli mas kasem ol save we i givhan long olgeta blong rere long samting we i stap kam. From lav mo fasin kaen blong Jeova, hem i givim wok long ol man blong hem blong ‘talemaot gud nyus long ol man we tingting blong olgeta i stap daon.’ (Aes. 61:1, 2) Ol buk blong yumi, oli halpem yumi blong talemaot gud nyus ya long ol ples kolosap mo farawe.
2 Ol buk ya Trutok mo Laef Foreva oli givim strong kakae long saed blong speret, we i givim paoa long yumi mo i pusum yumi. Oli mekem ol man we oli gat tingting daon oli haremgud from gud nyus ya, se i no longtaem, Kingdom blong God bambae i mekem wol ya i kam wan paradaes. Fasin blong givimaot ol buk ya long evri ples, i wan nambawan rod blong karem gud nyus i go long ol man we oli gat tingting daon. ?Wanem sam poen we yumi save tokbaot?
3 Maet yu save wekemap intres blong man long “Laef Foreva” buk wetem fastok ya:
◼ “Plante man oli wantem save se ol bubu blong olgeta oli olsem wanem. Be ol bubu ya oli ded finis, taswe plante man oli ting se neva bambae yumi kasem ansa long kwestin ya. ?Yu ting se maet wan dei yumi gat jans blong save ol bubu blong yumi?” Wet blong man i ansa. Ridim Jon 5:28, 29. Nao yusum pej 162 blong eksplenem promes blong God blong givim wan nyufala laef long ol bubu blong yumi, long wan paradaes wol. Yu save yusum Wajtaoa blong Mei 15 tu.
4 Blong givimaot “Trutok” buk, yu save askem kwestin ya:
◼ “?Wanem gudfala frut we yu ting se yumi save kasem from fasin blong ridim Baebol oltaem? [Wet blong man i ansa.] Long Rom 15:4, Baebol i halpem yumi blong faenem ansa long kwestin ya. [Ridim Rom 15:4.] Bighaf blong ol man long ples blong yumi oli gat wan Baebol, be smol nomo oli gat taem blong ridim oltaem. Mifala i bilif se Baebol nomo i save givim trufala hop blong fyuja. Mo bambae yumi kasem gudfala frut sipos yumi ridim oltaem.” Nao yu save eksplenem se yumi nidim help blong kasem save long Baebol. Mo yu save askem man blong karem buk. Yu save yusum ol toktok blong haf 6 long pej 13.
5 Blong givimaot “Laef Foreva” buk, yu save askem kwestin ya:
◼ “?Yu ting se i nidim wanem blong mekem se famle laef i rili givim glad long yumi?” Wet blong man i ansa. Ale, openem buk long japta 29 mo ridim haf 2. Nao yu save ridim ol smol stampa tok long japta ya. Askem man blong haos blong karem buk ya.
6 Sipos yu stap seremaot ol buk ya bifo Mei 14, yu no mas foget blong karem sam Kingdom Nyus Namba 34 wetem yu, mo givim long ol man we oli no kasem wan yet. Taem yumi stap seremaot ol buk ya, yumi mas rimemba se ol man blong haos oli save givim smol presen mane blong givhan long wok blong yumi, sipos oli wantem. Oltaem yumi mas rere blong seremaot ol buk blong yumi. Yumi mas tingbaot se maet ol narafala memba blong famle mo ol fren we oli visit, oli save ridim ol buk ya tu. (1 Tim. 6:18) Gud nyus ya we yumi karem i go long ol man we oli gat tingting daon, i save sevem laef blong olgeta.—1 Tim. 4:16.