I Nidim Gudfala Fasin Blong Tij Blong Karem Frut Long Ol Visit
1 Ol visit bakegen oli wan impoten mo hapi haf blong wok blong prij blong yumi. ?From wanem yumi mas mekem sua se yumi gobak long olgeta we oli soem intres? From we wok ya blong mekem ol disaepol, i mekem ol man oli save long nem blong Jeova, mo i givim ona long nem ya. Mo tu, wok ya i halpem ol man we oli fraet long God, blong faenem rod blong laef. (2 Kor. 2:17 kasem 3:3) Taem yumi luksave se wok ya i joen wetem fasin blong mekem nem blong Jeova i tabu, mo sevem laef blong ol man, samting ya i mas pusum yumi blong reregud bifo we yumi gobak long olgeta.
2 Wan gudfala tija bambae i halpem studen blong kasem moa save, blong ademap save ya long hemia we i stap finis olsem wan faondesen. Wan tija blong ol pikinini long skul, i mekem save blong ol studen i gru evri dei. Sem mak nao, yumi mas gobak long ol man, mo givim sam moa save we oli save ademap long hemia we oli bin kasem fastaem. Samting ya bambae i mekem se oli joenem ol save we oli gat long wan poen, mo oli ademap sam moa long hemia we i stap finis.
3 Taem yu gobak long man we yu bin livim buklet ya “?God i Rili Kea Long Yumi?” wetem hem, maet yu faenem i gud blong talem se:
◼ “Lastaem, yumitu bin storeyan long ‘ol las dei’ we Baebol i tokbaot, mo olsem wanem oli joen wetem laef blong yumi. Maet yu askem kwestin ya se, ?Olsem wanem yumi save se yumi stap long ol las dei ya? (2 Tim. 3:1) Ol disaepol blong Jisas oli wantem tumas blong save ansa long kwestin ya. [Ridim Matyu 24:3.] Long ansa we Jisas i givim long olgeta, hem i tokbaot ol samting we yumi stap luk raonabaot long yumi tede. Sam long ol samting ya, hemia ol trabol mo raf fasin we oli bitim eni samting we yumi bin luk bifo.” Soem haf blong saen ya we i stap long pej 19, haf 3 mo 4. Sipos man ya i glad blong storeyan, soem sam narafala haf blong saen ya long pej 20, haf 5 kasem 8. Talem long hem se bambae yu kambak mo ansarem ol kwestin we oli stap long fored blong buklet ya.
4 Blong gobak long ol man we yumi bin livim buklet ya “Gavman Ya We Bambae i Mekem Paradaes” wetem olgeta, maet yu save talem se:
◼ “Mi bin wantem tumas blong luk yu bakegen, blong storeyan moa long Kingdom blong God, mo olsem wanem bambae i jenisim fasin blong laef long wol ya. Ating yumitu agri se God i wantem we yumi laef long wol ya long glad fasin mo pis, bitim we yumi kasem trabol olsem yumi stap kasem tede. ?Yu ting se bambae hem i mekem promes ya i kamtru?” Wet long ansa. Ridim Aesea 55:11, mo tokbaot ol poen long pej 28 mo 29 blong buklet ya. Talem long hem se nambawan rod blong faenem mining blong laef, i blong mekem wan Baebol stadi.
5 Blong gobak long man we i intres long buklet ya “!Yu Yu Save Harem Gud Blong Olwe Long Wol!” yu save soem buklet ya bakegen mo talem se:
◼ “Lastaem, yumitu bin tokbaot naesfala wol we pija long fored blong buklet ya i soem. Mi wantem storeyan long yu from wanem bilif long Jisas Kraes i impoten tumas long ol man we oli wantem laef long gudfala wol ya.” Openem buklet long pija namba 41, mo ridim Aesea 9:6. Soem pija namba 62, ridim Jon 3:16, mo makem se yumi nidim fasin obei. Eksplenem se ol Wetnes blong Jeova oli stap halpem ol man blong lanem olsem wanem blong soemaot bilif, from stadi blong Baebol mo fasin blong traehad blong folem ol advaes blong Baebol long laef blong olgeta.
6 Afta we yu visitim man ya evri taem, tingtingbak long ol toktok blong yu, blong traem luksave olsem wanem yu save kam moagud. Askem long yu wan se: ?Mi bin gat wan samting i stap rere long tingting blong mi blong talem? ?Mi bin pulum man ya blong lukluk Baebol oltaem? ?Mi bin ademap sam moa poen long olgeta we mi bin tokbaot lastaem? ?Storeyan blong mi i lidim man ya i go long wan Baebol stadi? Sipos yu save ansa ‘yes’ long ol kwestin ya, samting ya i soemaot se yu stap traehad blong kam wan gudfala tija blong ol Tok blong God.