Mekemrere Mo Haremgud Long Ol Miting Blong Kongregesen
1 Long waes fasin, yumi stap joen olsem wan kampani blong ol brata long ol miting blong yumi evri wik. (1 Tim. 4:15, 16) ?Olsem wanem yumi save haremgud mo kasem plante blesing from ol miting ya?
2 Yumi mas putum wan stret taem evri wik blong mekemrere ol miting. Ating samfala oli save spenem moa taem blong mekemrere ol miting bitim ol narafala. Be, nating se yumi bisi olsem wanem, yumi waes sipos yumi spenem taem blong rere long ol miting. Taem ful famle i mekemrere tugeta, samting ya i karem moa blesing.—Efes. 5:15, 16.
3 Long Tiokratik Skul: Traehad blong folem program blong Baebol riding evri wik. (Jos. 1:8) Ridim ol haf blong miting, mo karem ol buk long miting we yu nidim blong folem ol tok. Tingbaot ol rod blong yusum save ya long wok blong prij.
4 Long Miting Blong Kingdom Wok: Ridim program we i stap long Kingdom Wok Blong Yumi. Ridim ol haf we bambae oli mekem tok long olgeta. Sipos i gat sam haf blong Wajtaoa no blong wan narafala buk we bambae oli yusum long miting, faenem haf ya mo ridim. Sipos i gat ol pleplei blong wok blong prij, ridim olgeta fastaem blong bambae yu rere blong yusum olgeta long wok blong prij.
5 Long Wajtaoa Stadi: Fastaem, ridim ol haf mo makem ansa blong ol kwestin. Ridim ol vas blong Baebol we oli stap. Samting ya bambae i givhan long yu blong kasem save moa long stadi ya. Tingtingdip long ol poen blong luksave olsem wanem oli joen wetem ol save we yu gat finis. Long rod ya, save blong yu bambae i kam bigwan moa. Mekem plan blong givim ansa long miting. Mekemrere sotfala ansa long wan no tu haf. Hemia wan impoten rod blong ‘talemaot we yumi putum tingting blong yumi i stap strong long God.’—Hib. 10:23.
6 Long Buk Stadi: Faswan samting, lukluk kwiktaem long ol haf long stadi. Ridim nem blong ol japta mo ol smol stampa tok. Nao ridim olgeta haf blong hem, mo makemgud ol bigfala poen. Ridim ol vas blong Baebol we oli sapotem ol poen ya. Traem ansa long ol kwestin long prapa tok blong yu. Afta we yu mekemrere stadi, tingtingbak long hem. Traem tingbaot ol bigfala poen mo fasin blong eksplenem olgeta.—2 Tim. 2:15.
7 Haremgud long ol Miting: Blong haremgud fulwan long ol miting, i impoten blong kam long stret taem, nao yumi save joen long faswan prea blong askem tabu speret blong Jeova. Ol singsing blong Kingdom tu we oli mekem man i haremgud, oli save givhan long yu. Sipos yu no gat smol pikinini no wan narafala risen blong sidaon long ol jea biaen long Haos Kingdom, i gud blong sidaon long fored. Olsem nao, bambae yu luk se i no gat plante samting blong pulum ae blong yu, mo bambae yu kasem moa long program ya. Ol papa mama we maet oli mas karem ol smol pikinini blong olgeta oli go afsaed taem miting i stap gohed, oli save sidaon kolosap long doa no biaen, blong oli no blokem ol narafala blong lesingud.
8 Folem ol vas we oli ridim long Baebol. Samting ya bambae i givhan long yu blong rimemba ol tok we yu harem. Sipos yu toktok wetem famle mo ol fren blong yu long ol samting we yu lanem, bambae ol save ya i stap klia moa long tingting blong yu. Taem yu folem ol advaes ya, bambae yu luk se ol miting oli gat moa mining mo yu haremgud long olgeta. Mo bambae oli “mekem yumi strong blong laekem ol man, mo blong mekem ol gudfala fasin.”—Hib. 10:24, 25.