Seremaot Buk Ya Save Blong Lidim Yu Long Laef We i No Save Finis
1 Nyufala buk ya, Save Blong Lidim Yu Long Laef We i No Save Finis, i blong givhan long ol man blong kasem save long trutok kwiktaem. Long Maj, bambae yumi gat wan narafala jans blong seremaot buk ya long ples blong yumi. ?Yumi save talem wanem blong pulum ol man blong intres long hem?
2 Hemia wan rod blong storeyan we maet i gud long wan man we hem i no moa gat bigfala bilif long God:
◼ “Plante man oli bilif long God taem oli stap gruap, be naoia oli faenem se bilif blong olgeta i no strong olsem bifo. ?From wanem i olsem? ?Wanem tingting blong yu? [Wet long ansa.] Bilif blong yumi long God i kam strong moa taem yumi tingting long ol samting blong sapraes long skae mo wol. [Ridim Ol Sam 19:1.] Man ya we ol loa blong hem oli lidim ol sta long skae, hem i givim gudfala advaes blong lidim yumi tu. [Ridim Ol Sam 19:7-9.] Ol vas ya oli soemaotgud se i impoten tumas blong kasem plante save long saed blong God mo ol stampa tingting blong hem long fyuja. [Soem pija long pej 4 mo 5, mo ridim tok we i stap aninit long pija ya.] Sipos yu wantem haremgud long spesel save ya insaed long buk ya, mi mi glad blong livim wetem yu.”
3 Sipos yu toktok wetem wan man we i no bilif strong long God be i soem smol intres, maet yu openem buk long pija long pej 4 mo 5, mo talem se:
◼ “Lastaem mi storeyan wetem yu, yumitu bin lukluk naesfala pija ya we i soem wan gudfala ples. Tok we i stap aninit long hem i askem se, ‘?Yu mas mekem wanem blong haremgud long ol samting ya?’ ?Wanem ansa blong yu long kwestin ya? [Wet long ansa.] Baebol i soemaot klia wan impoten samting we yumi mas mekem. [Ridim Jon 17:3.] Yumi nidim save blong kasem bilif long God. Wan nambawan rod blong kasem save ya we yumi nidim, hemia blong folem wan program blong stadi long Baebol.” Openem buk i go long japta 1 mo soem sam gudfala poen long haf 1 kasem 5. Eksplenem olsem wanem blong mekem wan Baebol stadi, mo talem se bambae yu kambak blong storeyan moa.
4 Traem tingbaot wan nogud nyus we i jes kamaot, mo talem olsem:
◼ “Ating yu harem nyus ya long saed blong [talem nyus ya]. ?Yu bin tingbaot sipos God i rili stap wari long ol kruked fasin mo trabol we oli mekem yumi mo ol man raonabaot long yumi oli safa? [Wet long ansa.] Baebol i talem klia se God i laekem yumi, mo se bambae hem i givhan long yumi long taem blong trabol.” Ridim sam haf blong Ol Sam 72:12-17. Openem buk i go long pej 70, mo talem se buk ya, Save Blong Lidim Yu Long Laef We i No Save Finis, i givim ansa long kwestin ya we plante milyan man oli askem, ?From wanem God i letem ol man oli safa? “Bambae yu faenem se ansa we Baebol i givim long kwestin ya i mekem yu yu haremgud. Mi mi glad blong livim buk ya wetem yu blong yu ridim yu wan.”
5 Sipos yu gobak blong storeyan moa long kwestin ya, from wanem God i letem ol man oli safa, maet yu talem se:
◼ “Lastaem mi luk yu, yumitu bin tokbaot [talem nyus we yu bin tokbaot]. Kwestin i bin kamaot se, from wanem God i letem ol man long wol oli safa. ?Yu ting se wanem nao stret ansa blong kwestin ya? [Wet long ansa.] Taem yumi save se God i no stampa blong ol trabol we i mekem ol man oli harem nogud, samting ya i leftemap tingting blong yumi.” Openem Save buk i go long pej 71 mo 72, mo tokbaot sam tingting blong Baebol we oli stap long haf 3 kasem 5. Talem se bambae yu kambak bakegen blong eksplenem from wanem yumi save sua se taem blong God blong letem ol man oli safa, bambae i finis i no longtaem.
6 Sipos yu mitim wan papa no mama, maet yu tokbaot famle:
◼ “Bighaf blong ol papa mo mama oli agri se i gat plante problem i kamaot taem oli traem mekem famle i glad oltaem. ?Yu ting se wanem samting nao i hadwok moa? [Wet long ansa.] Bighaf blong yumi i mekem bes blong yumi, be oltaem yumi glad sipos narafala i save givhan long yumi blong kasem moa frut. Baebol i givim nambawan advaes. [Ridim sam haf blong Kolosi 3:12, 18-21.] Baebol i talem plante moa samting long saed ya, olsem japta 15 blong buk ya i soem, nem blong hem, ‘Wokem Wan Famle We i Givim Ona Long God.’ Hem i talem ol advaes blong Baebol blong soem olsem wanem blong mekem fasin fren insaed long mared i kam strong, mo olsem wanem blong winim ol problem we ol pikinini blong yumi oli kasem. Mi sua se bambae yu glad blong ridim.”
7 Sipos yu gobak blong visitim wan papa no mama we hem i wari long ol problem long famle, maet yu talem se:
◼ “Mi save se yu, olsem wan papa no mama, yu wantem wan gudfala laef blong ol pikinini blong yu. I no gat rod blong blokem olgeta long evri nogud samting. Taswe, yumi mas lanem olgeta olsem wanem blong stanap strong tru long ol problem blong laef. ?Wanem rod blong mekem samting ya? [Wet long ansa.] Wan samting we i impoten tumas we papa mo mama i save mekem, hemia tijimgud ol pikinini blong olgeta.” Openem Save buk i go long pej 145 mo 146, mo tokbaot ol advaes blong Baebol we i save wokgud. Makemgud se advaes ya i impoten tumas mo se bambae yumi kasem blesing taem yumi folem. Talem se bambae yu kambak bakegen blong soem olsem wanem blong yusum buk ya blong kasem save moa long rod blong mekem famle i glad.
8 Sipos yu laekem moa wan storeyan we i sot, maet yu traem hemia:
◼ “?Yu bin tingbaot from wanem yumi kam olfala mo yumi ded? Japta 6 blong buk ya i eksplenem from wanem man i ded mo olsem wanem God bambae i finisim ded. Baebol i talem se God i promes blong givim laef we i no save finis long olgeta we oli laekem hem tumas. [Ridim Jon 17:3.] Sipos yu yu glad blong ridim moa save long saed ya, bambae yu faenem se buk ya i nambawan.”
9 Sipos yu gobak long wan man we bifo yu bin toktok blong smoltaem nomo wetem hem, yu save talem se:
◼ “God i no mekem plan se bambae yumi kam olfala mo yumi ded. Hem i wantem se yumi stap laef blong olwe long paradaes.” Soem pija long pej 188 mo 189. Ridim haf 11 long pej 184. Putum wan stret taem blong kambak bakegen.
10 !Sipos yumi reregud fastaem, maet yumi save yusum buk ya blong ‘talemaot ol tok blong Baebol’ long ol narafala, long wan fasin we bambae i karem bigfala glad i kam long olgeta!—Luk 24:32.