Kasem Ol Gudfala Samting From Tiokratik Skul Long 1996—Haf 2
1 Smoltaem afta we Tiokratik Skul i stat long 1943, wan branj ofis blong Sosaeti i mekem ripot ya: “Long sot taem nomo, nambawan skul ya i givhan long plante brata we oli bin ting se neva oli save toktok long fored blong ol man, blong oli save toktokgud long platfom mo kamgud moa long wok blong prij.” Skul ya i gohed yet blong givim nambawan trening ya, we yumi evriwan i nidim.
2 Baebol Riding: I no olgeta we oli givim ol tok nomo we oli kasem blesing from skul ya. Yumi evriwan i gat wan samting blong mekem—hemia Baebol riding blong evri wik. Program blong skul i talem ol japta blong Baebol we yumi mas ridim evri wik. I gat plante vas long Baebol we oli soem klia se i impoten blong ridim Baebol evri dei. (Jos. 1:8; Sam 1:2; Wok 17:11) Blong stap strong long saed blong speret, yumi mas ridim Baebol. Hem i givim kakae long tingting mo hat. Sipos yumi ridim Baebol blong faef menet evri dei, bambae yumi save folem program blong skul ya. Long wan yia, bambae yumi ridim 150 japta blong Tok blong God. Sipos yumi holem wan Baebol i stap rere oltaem, yumi save ridim wan smol haf blong hem evri dei.
3 Tok N. 1: Blong pulum ol brata mo sista blong wok strong wetem fasin fasgud long God, brata we i givim Tok N. 1 i mas yusum ol gudfala rod blong tij, eksplenem mining blong ol samting, mo halpem ol brata blong gat tangkyu long Jeova, Tok blong Hem mo ogenaesesen blong hem. Ol elda mo ol man blong givhan oli save mekem samting ya sipos oli reregud, sipos oli mekem tok blong olgeta i stanap long wan stampa tok nomo, sipos oli toktok wetem strong bilif, mo oli mekem tok ya i laef. (Hib. 4:12) I impoten we brata ya i no bitim taem long tok blong hem. Buk ya “All Scripture” i gat fulap vas blong Baebol mo i tokbaot plante defren nambawan save we oli save givhan long yumi long saed blong speret. Buk ya Proclaimers i tokbaot histri blong ogenaesesen blong Jeova long wol ya long taem blong yumi. Hem i tokbaot plante samting we oli kamaot long laef blong ol man we oli gat bilif, oli wok strong, oli onagud long God, mo oli gat lav. I gat plante samting we yumi mas lanem long saed blong tiokratik histri mo ol blesing we Jeova i givim long ol man blong hem long taem blong yumi.
4 Ol Bigfala Poen Long Baebol Riding: Ol brata we oli mekem tok ya, oli mas jusum sam vas. Nao blong givhan long kongregesen, oli mas soemaot olsem wanem oli save folem ol vas ya long laef blong olgeta. Hemia i min se oli mas ridim ol japta we program i talem, tingting dip long olgeta, mo stadi dip long sam vas blong faenem ol poen we oli mekem mining blong ol vas ya i klia. Long lashaf blong Watch Tower Publications Index, i gat “Indeks Blong Ol Vas.” Samting ya i save givhan blong faenem sam poen long saed blong ol vas. Ol brata we oli mekem tok ya oli mas yusum fasin luksave, mo oli no mas ademap sam save we i no joen wetem Baebol riding. Oli no mas mekemrere tumas poen, bitim wanem we oli save tokbaot long sikis menet.
5 Yumi evriwan i save kasem blesing from Tiokratik Skul. Hem i save givhan long yumi blong kamgud moa long fasin blong yumi blong toktok mo tij. Sipos yumi joen fulwan long skul ya, bambae ‘olgeta man oli save luk we yumi stap gohed moa.’—1 Tim. 4:15.