Tijim Ol Narafala Long Samting We God i Wantem
1 Yumi save faenem plante man yet we oli no save plante samting long saed blong speret, from we “oli no harem ol tok blong Jeova” yet. (Emos 8:11) Sam long olgeta, oli bilif se God i stap, be oli no save stampa tingting blong hem mo ol samting we hem i wantem olgeta blong mekem. Taswe, i gat nid blong yumi tijim olgeta long saed blong trutok blong Kingdom, we i save sevem laef blong olgeta. Yumi save faenem olgeta we oli glad blong kasem save long ol samting we Jeova i wantem olgeta blong mekem, sipos yumi reregud, mo sipos yumi gat ol samting we yumi nidim blong prij long evri jans.
2 Long Epril mo Mei, bambae yumi seremaot ol Wajtaoa mo Wekap! we oli stretgud long taem blong yumi. Mo tu, hemia fastaem we yumi seremaot buklet ya, ?Wanem Samting We God i Wantem Yumi Blong Mekem? Ol naesfala pija long hem mo ol gudfala kwestin we oli pulum tingting blong ol man, oli mekem se buklet ya i gud long olgeta kaen man. Ol advaes we i kam biaen, oli blong halpem yumi blong yusum nambawan buklet ya long fasin we i save givhan moa long ol man.
3 Traem Faenem Olgeta Man: Long ol ples we yumi no moa mitim plante man long haos blong olgeta, i gud blong traem faenem mo toktok wetem ol man long ol defren ples. Pepa we i stap long medel blong Kingdom Wok Blong Yumi long Septemba 1996, i pulum yumi blong talemaot gud nyus long evri ples—long rod, long sevis bas mo taksi, long ol ples blong spel, ol ples blong putum trak i stap, ol stoa mo ofis. Mo tu, hem i pulum yumi blong lukaot ol jans blong prij. Eksampel, wan sista we hem i paenia, i bin go long wan ples we oli kipim ol anamol blong lukaot long olgeta, ale hem i karem plante Wekap! blong Ogis 8, 1996, (Engglis), i go wetem hem. Wekap! ya i tokbaot, “Ol Anamol We Oli Save Lus Olgeta—?From Wanem Yumi Wari?” !Long wan haoa, hem i seremaot 40 Wekap! wetem ol man we oli laekem ol anamol, mo oli tangkyu tumas long hem from! ?Kam kasem naoia, yu yu kasem wanem frut taem yu talemaot gud nyus long olgeta ples? Ol Wajtaoa mo Wekap! wetem buklet ya Samting We God i Wantem oli nambawan blong yusum long olgeta fasin blong prij, from we oli tokbaot ol samting we oli stret long laef blong ol man mo we oli pulum tingting blong ol man.
4 Statem Ol Storeyan: Las pej blong Kingdom Wok Blong Yumi long Oktoba 1996, i talem plante poen olsem wanem blong mekemrere prapa toktok blong yu blong seremaot ol Wajtaoa mo Wekap! Semfala advaes bambae i wokgud taem yu stap mekemrere rod blong seremaot buklet ya Samting We God i Wantem. Yumi save talem samting we i sot nomo, no yumi save mekem i longfala lelebet we yumi joenem wan vas blong Baebol tu. I impoten tumas blong jusumgud ol fastok blong yumi, from we samting ya i save mekem se man blong haos bambae i gohed blong lesin. Samfala oli faenem se fastok ya i gud: “Mi bin ridim wan store we i leftemap tingting blong mi, mo mi wantem serem wetem yu.” Sipos no, yu save askem wan gudfala kwestin blong traem pulum man blong haos blong talemaot tingting blong hem.
5 Sipos i stret long ples blong yu, maet yu traem askem ol kwestin olsem olgeta we oli kam biaen, taem yu stap prij long manis ya:
◼ “Tede, yumi luk plante doti olbaot, ol tok we ol man oli raetem olbaot blong spolem ol wol mo haos, ol faea we oli spolem bus, mo ol doti we man i stap sakem i go long win mo wora. ?Yu ting se i nidim wanem samting blong mekem wol i klin bakegen mo blong mekem i kam wan ples we i moagud blong stap long hem?” Wet long ansa, nao eksplenem se yu yu gat sam save we i talem klia long yumi, olsem wanem mo wetaem fulwol ya bambae i kam olsem wan naesfala garen. Soem wan smol tok, vas, no wan naesfala pija long wan nyufala magasin, no long stadi 6 long buklet ya Samting We God i Wantem, nao askem long man blong haos blong karem buk ya mo ridim. Bifo we yu finisim storeyan blong yu, traem mekem plan blong gohed wetem storeyan ya long wan narafala taem.
◼ “?Yu ting se God i wantem we yumi mas traehad oltaem blong winim plante bigfala trabol long laef, olsem olgeta we yumi fesem tede?” Afta we man blong haos i ansa, yu save talem se: “Ating yu save finis prea we Jisas i tijim long ol man blong hem, we i askem se Kingdom blong God bambae i kam. ?Yu bin tingbaot samtaem se Kingdom ya blong God i olsem wanem?” Openem buklet ya Samting We God i Wantem i go long stadi 6, mo ridim ol kwestin we oli stap long fas haf blong stadi ya. Nao, taem yu stap ridim haf 1, soem ansa long faswan kwestin. Eksplenem se buklet ya i givim klia ansa long ol narafala kwestin tu. Askem man blong haos blong karem buklet ya, mo mekem plan blong mitim hem bakegen blong serem moa save long saed blong Kingdom wetem hem.
◼ “Plante man we oli tingtinggud, naoia oli stat luksave se ol skul blong wol oli stampa blong ol problem blong man, i no se oli stap stretem ol problem ya. ?Wanem tingting blong yu?” Afta we yu lesin long tingting blong man blong haos, soem wan poen long wan nyufala magasin, we i save pulum intres blong hem long saed blong olsem wanem ol gyaman skul oli no naf blong givhan long ol man, no long saed blong en blong ol skul ya we i kolosap nomo. Askem long hem sipos hem i glad blong ridim. Talem nem blong yu mo askem nem blong hem, nao askem long hem sipos yu save luk hem bakegen blong eksplenem moa, olsem wanem trufala skul i stap givhan long ol man.
◼ “From we i gat plante problem long famle tede, ?yu bin tingbaot se, wanem rod nao i gud blong folem blong mekem famle i glad?” Wet long ansa, nao eksplenem se long Baebol, God i soemaot trufala rod blong kasem glad long famle. Ating yu save ridim Aesea 48:17. Nao openem buklet ya Samting We God i Wantem i go long stadi 8, mo poen i go long sam vas blong Baebol we oli no raetem fulwan, mo we oli givim gudfala advaes blong lidim ol wanwan memba blong famle. Ridim ol kwestin long fashaf blong stadi ya. Askem man blong haos sipos hem i glad blong ridim ol ansa. Talem long hem se bambae yu kambak wan narafala dei blong serem moa advaes blong Baebol we i save wokgud insaed long famle.
6 Pej we i stap long medel blong Kingdom Wok Blong Yumi long Maj 1997, i pulum yumi blong mekem tingting blong yumi i strong blong visitim ol man bakegen. Hem i talem se i gud blong yusum buklet ya Samting We God i Wantem, blong statem ol Baebol stadi, maet long fastaem we yu mitim man, no long taem we yu visitim hem bakegen. Samting we ol man oli nidim moa i bitim ol narafala samting, hemia blong kasem save long samting we God i wantem olgeta blong mekem, mo blong mekem ol samting ya. (Kol. 1:9, 10) Bambae yumi givhan bigwan long ol man long Epril mo Mei, sipos yumi save stat blong tijim olgeta wetem ol save we yumi gat finis, long saed blong samting we Jeova i wantem olgeta blong mekem blong kasem laef.—1 Kor. 9:23.