?Bambae Ogis, Hem i Wan Spesel Manis?

¹ Yia 1963 i wan spesel yia long ol man blong Jeova. ?Yu save from wanem? Long yia ya, hem i fastaem we namba blong ol pablisa i kasem wan milyan. !Sipos yu stap long trutok finis long taem ya, maet yu tingbaot yet bigfala glad blong yumi, from we namba blong ol man blong talemaot mesej blong Kingdom i kam plante moa! Naoia, long Yunaeted Stet nomo, namba blong ol pablisa i kasem wan milyan. Nating se i olsem, evri manis plante pablisa raonabaot long wol oli no stap givim ripot blong olgeta. ?Olsem wanem long yumi? ?Yumi tu i mas tingbaot samting ya? Yes yumi mas tingbaot. From we evri manis, 8 long yumi i no stap givim ripot blong olgeta.

² Agri Blong Mekem Wok Ya: Long manis Ogis, yumi stap traehad blong kasem nyufala namba blong 250 pablisa long Vanuatu. !Sipos ol traehad blong yumi oli karem frut, bambae Ogis i rili wan manis we i spesel! ?Yumi save kasem mak ya? Yes, yumi save kasem sipos yumi evriwan i joen long wok blong prij. Hemia sam advaes.

³ Sipos yu gat tingting blong go spel long manis Ogis, meksua blong spenem sam taem long wok blong prij bifo we yu go. Tekem sam traket, buklet, mo magasin wetem yu. Olsem nao, yu save prij long ol man we yu mitim olgeta taem yu go spel. Sipos i gat wan kongregesen long eria we yu yu go long hem, maet yu save spenem sam taem long wok blong prij wetem ol pablisa long ples ya.

⁴ Sipos yu yu sik no yu handikap, yu save joen yet long wok blong prij. Maet yu save prij long ol dokta, ol nes, mo olgeta we oli kam visitim yu. Yu save yusum leta mo telefon blong prij.

⁵ Be, yu no mas foget blong putum ripot blong yu kwiktaem long en blong manis. Olsem nao, oli save kaontem yu olsem wan pablisa long Ogis.

⁶ Tinghevi Long Blesing Ya: Wok blong prij i wan ‘gudfala samting we Jisas Kraes i putum long han blong yumi.’ (2 Tim. 1:​14) Yumi gat bigfala tangkyu from blesing ya we yumi kasem blong talemaot gud nyus. (1 Tes. 2:4) Taem yumi tingbaot olgeta samting we Jeova i bin mekem long yumi, samting ya i mas pusum yumi blong gohed long ful yia, blong joen long wok ya we i moa impoten long ol narafala wok. Yumi no mas letem wan samting i blokem yumi blong joen oltaem long wok blong prij. !I gud yumi mekem Ogis i kam wan spesel manis long saed blong wok blong Jeova mo gat strong tingting blong tokbaot hem long evri manis we i kam biaen!​—Ol Sam 34:1.