?Yu Yu Stap Gohed Oltaem Blong Talemaot Kingdom?
1 Yumi evriwan i glad blong harem se, Vanuatu i kasem 280 pablisa long Epril 1999, wan mak we yumi neva kasem bifo. !Hemia i rili soem se yumi joengud blong wok mo yumi gat strong tingting blong traehad! Be i klia se, long ol manis we i kam biaen, sam long ol pablisa ya oli no moa gohed oltaem olsem ol man blong talemaot Kingdom, from we long ol manis afta long Epril, kam kasem naoia, namba hem i raonabaot 264. Samting ya i soem se samwe long 6 pesen blong ol pablisa ya oli no mekem plan blong joen long wok blong prij evri manis. Yumi bilif se bambae ol haf we i kamaot biaen oli save givhan blong winim problem ya.
2 Gat Tangkiu From Blesing Ya: Yumi mas gat bigfala fasin tangkiu from blesing ya we yumi gat blong serem gud nius blong Kingdom wetem ol narafala. Wok ya i mekem hat blong Jeova i glad, mo i halpem ol man we hat blong olgeta i stret blong save rod blong laef. (Prov. 27:11; 1 Tim. 4:16) Fasin blong prij oltaem i mekem se yumi gat moa save long wok blong prij. Wok ya i givim glad long yumi mo i mekem yumi harem se yumi mekem wan gudfala samting.
3 Fulumap Ripot Blong Wok Ya: Samfala we oli joen long wok blong prij oli foget blong fulumap ripot blong wok ya long stret taem. Yumi neva mas ting se ol traehad blong yumi oli no impoten blong fulumap long ripot. (Skelem wetem Mak 12:41-44.) !Taswe i impoten se yumi fulumap ripot blong wanem we yumi bin mekem! I gud blong folem wan gudfala plan long haos, olsem fasin blong yusum wan kalenda, blong makem taem we yu spenem long wok blong prij. Samting ya bambae i givhan blong mekem se yu rimemba oltaem blong fulumap wan stret ripot mo putum kwiktaem long en blong ol wanwan manis.
4 Givhan Long Narafala: Maet i gud blong mekem moa plan blong givhan long olgeta we oli nidim help blong gohed oltaem long wok blong prij. Sekretari blong kongregesen mo ol brata we oli lidim buk stadi oli mas jusum sam pablisa we oli gat moa ekspiryens blong oli givhan long saed ya. Sipos yu gat pikinini no ol narafala Baebol studen we oli pablisa be oli no baptaes yet, trenem olgeta blong fulumap ripot blong wok blong prij evri manis.
5 Tingbaot trufala stori ya, “Glad Long Wan Longfala Laef Long Wok Blong Jeova,” long Wajtaoa blong Oktoba 1, 1997. Sista Ottilie Mydland blong Nowei i kam wan pablisa we i prij oltaem bifo we hem i baptaes long 1921. Sevente sikis yia biaen, taem hem i gat 99 yia, hem i talem se: “Mi glad tumas we mi save gohed yet olsem wan pablisa we i prij oltaem.” !Hemia wan nambawan tingting we i gud olgeta man blong Jeova oli folem!