?Yu Yu Sapotem Wok Blong Putum Ripot?
1 Plante stori long Baebol oli givim stret namba blong sam samting, mo ol namba ya oli givhan long yumi blong kasem save mo pijarem ol stori ya long tingting blong yumi. Eksampol, Gideon wetem 300 soldia nomo oli winim ol man Midian long faet. (Jaj 7:7) Enjel blong Jeova i kilim i ded 185,000 soldia blong Asiria. (2 King 19:35) Long lafet blong Pentekos long yia 33 K.T., raonabaot 3,000 man oli baptaes, mo smoltaem biaen namba blong ol man we oli kam Kristin i gru go kasem samwe long 5,000 man. (Wok 2:41; 4:4) Ol stori ya oli soemaot klia se ol man blong God bifo oli tekem taem blong kaontem mo raetem ol namba we oli stret blong mekem ripot blong ol samting ya.
2 Ogenaesesen blong Jeova tede i askem yumi blong givim ripot blong wok blong prij we yumi mekem evri manis. Sipos yumi wok gud folem plan ya, yumi givhan long olgeta we oli stap lukaot long wok blong prij. Ol ripot maet oli soem se ol brata sista oli nidim blong wok moa long wan haf blong minista wok, no maet i soem se i nidim moa man blong prij long samfala ples. Insaed long kongregesen, ol ripot blong prij oli halpem ol elda blong luksave hu we maet i save mekem moa wok no hu we maet i nidim we narafala i halpem hem. Mo ol ripot oli leftemap tingting blong olgeta brata sista raon long wol, from we oli soem olsem wanem wok blong talemaot Kingdom i stap gru.?Yu yu stap traem bes blong yu blong mekem se ripot ya i stret?
3 Wok Blong Yumi Wanwan: ?Long en blong manis, yu yu faenem se i had blong rimemba wanem we yu bin mekem long wok blong prij? Sipos i olsem, maet i gud we yu raetemdaon aoa mo wok we yu mekem long sem dei ya we yu prij long hem. Sam long yumi oli yusum wan smol buk no kalenda blong mekem olsem. Sam narafala oli holem wan pepa blong ripot oltaem wetem olgeta mo oli raetem aoa mo wok we oli mekem long pepa ya. Long en blong manis yu mas hareap blong givim ripot blong yu long brata we i lukaot long buk stadi blong yu. Sipos no, yu save putum ripot blong yu long bokis blong ol ripot we i stap long Haos Kingdom. Sipos yu foget blong putum ripot blong yu, yu no wet long brata we i lukaot long buk stadi se hem nao i mas kam askem ripot ya long yu. I moagud yu yu go givim ripot ya long hem. Fasin blong tinghevi long wok ya blong givim ripot i soem se yumi respektem plan we Jeova i stanemap, mo i soem lav we yumi gat long ol brata we oli gat wok blong hivimap mo kaontem ol ripot.—Luk 16:10.
4 Wok Blong Brata We i Lukaot Long Buk Stadi: Brata we i lukaot long buk stadi i lukaotgud mo i tinghevi long wok blong hem. From samting ya bambae hem i intres long wok we grup i mekem evri manis. (Prov. 27:23) Hem i save sipos olgeta pablisa wanwan oli stap joen oltaem long wok blong prij, sipos oli glad blong wok mo sipos oli mekem bes blong olgeta long wok ya. Mo hem i rere blong givhan kwiktaem sipos sam pablisa oli no joen long wok blong prij long wan ful manis. Plante taem ol pablisa oli nidim smol samting nomo olsem wan tok we i leftemap tingting, wan gudfala advaes, no sipos hem i askem olgeta blong prij wetem hem.
5 Long en blong manis, brata we i lukaot long buk stadi i meksua se olgeta pablisa long grup blong hem oli mekem wok blong olgeta wanwan blong putum ripot. Hemia i givhan long sekretari blong i save sanem olgeta ripot blong kongregesen oli go long branj ofis long namba sikis blong nekiswan manis. Klosap long en blong manis, maet i gud sipos brata we i lukaot long buk stadi i talemaot long grup blong hem se oli no mas fogetem ripot blong olgeta, mo maet hem i save karem sam pepa blong ripot i kam wetem hem long buk stadi. Sipos i gat samfala we oli stap foget oltaem blong putum ripot blong olgeta, hem i save leftemap tingting blong olgeta long kaen fasin blong oli tingbaot ripot blong olgeta.
6 Sipos yumi givim ripot blong yumi long stret taem, yumi givhan long kongregesen blong givim wan ripot we i stret mo i tru folem wok we yumi stap mekem long teritori blong yumi. ?Yu yu mekem wok blong yu blong givim ripot long stret taem evri manis?