Wan Storian We i Isi Mo i Klia i Beswan
1 ?From wanem plante taem, ol yangfala pablisa oli kasem intres blong man, taem oli talemaot mesej blong Kingdom? Wan risen, hemia from we oli storian long wan fasin we i isi. Sam pablisa oli ting se, blong givim wan gudfala witnes, oli mas gat gudhan blong yusum ol naesfala toktok. Be, ol ekspiriens oli soemaot se wan storian we i isi mo i klia i beswan.
2 Jisas i talemaot Kingdom blong God long fasin we i isi, mo i klia. Mo hem i trenem ol disaepol blong hem blong oli mekem i sem mak. (Mat. 4:17; 10:5-7; Luk 10:1, 9) Ol fastok, kwestin, mo pijatok we hem i yusum oli no hadwok blong kasem save long olgeta, mo oli pulum ol man blong wantem lesin mo oli kasem hat blong olgeta. (Jon 4:7-14) I gud yumi folem eksampol blong Jisas mo yumi yusum ol storian we oli isi blong man i kasem save long olgeta.
3 Mesej we yumi talemaot hem i “gud nius ya blong Kingdom.” (Mat. 24:14, NW ) Taem yumi mekem Kingdom i stamba tok blong storian blong yumi, bambae storian blong yumi i isi. I gud yumi tokbaot ol samting we man i intres long hem. Plante taem, ol woman oli intres moa long famle i bitim ol samting long saed blong politik. Wan papa i tingbaot wok mo famle blong hem fastaem. Ol yangfala oli intres long fiuja blong olgeta; ol olfala, oli wantem gudfala helt mo blong stap sefgud. Ol man oli intres moa long ol samting we oli stap hapen long eria blong olgeta i bitim ol samting we oli stap hapen long ol kantri ovasi. Afta we yu storian long wan samting we man i intres long hem, pulum tingting blong man ya i go long ol blesing we ol man we oli obei bambae oli kasem aninit long rul blong Kingdom blong God. Taem yumi jusum sam gudfala tok, we oli klia mo yusum wan vas long Baebol, hemia nao beswan rod blong pulum intres blong man we i lesin.
4 Maet yu save statem storian olsem:
◼ “Ating yu agri se ol man oli stap kasem plante sik we i no gat meresin blong hem. ?Be yu save we God i promes se i no longtaem bambae olgeta sik i finis, mo ded tu bambae i finis?” Wet long ansa, mo biaen ridim Revelesen 21:3, 4.
5 Sipos yu yusum ol storian we oli isi mo oli klia, bambae yu kasem tingting mo hat blong plante moa man we oli stap long teritori blong yu, mo yu save halpem olgeta blong kasem save long Jeova mo blong gat hop ya blong haremgud long laef blong olwe.—Jon 17:3.