“Tok Blong God . . . i Stap Wok”
1 Aposol Pol i raetem se: “Tok blong God i wan samting we i laef, mo i stap wok.” (Hib. 4:12) ?Hem i minim wanem taem hem i talem samting ya? Olgeta tok blong God no ol mesej insaed long Baebol, oli save gat bigfala paoa long laef blong man. Ol waes tok insaed long Baebol, i save jenisim laef blong man blong mekem i kam moa gud. Gudfala toktok mo hop long Baebol i save pulum ol man blong kam klosap long Jeova God, Man ya we i Givim Laef. Mesej blong hem i save pusum ol man we oli gat gud hat blong oli folem rod we i go kasem laef blong olwe. Be blong kasem ol gudfala frut ya, yumi mas yusum Baebol taem yumi prij long ol narafala.
2 Tekem Evri Janis Blong Ridim Wan Vas Long Baebol: I luk olsem se plante pablisa oli no stap yusum Baebol taem oli prij long wan man long haos. ?Samting ya i tru long saed blong yu? From we i luk olsem se plante man oli no gat taem blong storian longtaem, maet sloslou yu tekem fasin ya blong givim buk no ridim wan vas we i stap insaed long buk nomo. Mifala i leftemap tingting blong olgeta pablisa blong oli traehad blong ridim wan, no moa vas blong Baebol taem oli talemaot gud nius. Long rod ya, yumi mekem man i luksave se mesej we yumi talemaot i kamaot long Tok blong God.
3 I no plante man we oli gat fasin ya blong ridim Baebol. Nating se i olsem sam long olgeta oli respektem Baebol. Plante taem, ol man ya tu we oli bisi, oli save tekem smol taem blong lesin long tok blong God we yu ridim long Baebol. Taem yu ridim gud mo talem klia mining blong wan vas blong Baebol we i stret long man we i stap lesin, paoa blong tok blong Jeova i save wok long tingting blong man ya. ?Be olsem wanem blong joenem storian blong yu wetem wan vas long Baebol?
4 Traem Rod Ya Long Wok Blong Seremaot Magasin: Wan seket elda i yusum gud Baebol taem hem i joen long wok blong seremaot ol magasin. Hem i karem wan smol Baebol long poket blong hem. Afta we hem i soem magasin long man mo i tokbaot smol wan haf insaed, hem i openem Baebol blong hem mo ridim wan vas we i laenap wetem haf ya. Maet yumi save mekem olsem taem yumi askem man se: “?Wanem tingting blong yu long nambawan promes ya?” nao yumi save gohed blong ridim wan vas we yumi jusum finis.
5 Putum mak ya blong ridim wan no tu vas blong Baebol wetem evri man we oli lesin long yu. Bigfala paoa blong Baebol i save wokem rod blong ol man oli kam klosap moa long God.—Jon 6:44.